ବ୍ରହ୍ମପୁର ଅଫିସ/ଫୁଲବାଣୀ ଅଫିସ, ୧ା୪: ଭାଜପା ନେତୃତ୍ୱାଧିନ କେନ୍ଦ୍ର ସରକାରଙ୍କ ଶାସନରେ ଦୁର୍ନୀତି ଓ ଭ୍ରଷ୍ଟାଚାର ବଢ଼ିଚାଲିଛି। ପ୍ରତିବାଦ ଓ ବିରୋଧ କଲେ କେନ୍ଦ୍ରୀୟ ତଦନ୍ତ ସଂସ୍ଥା ଦ୍ୱାରା ବିଭିନ୍ନ ଭାବରେ ହଇରାଣ କରାଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଶିଳ୍ପପତି ଗୌତମ ଆଦାନୀଙ୍କ ଭିତିରି ସମ୍ପର୍କ ନିବିଡ଼ ହୋଇଛି। ଦେଶର କୋଟି କୋଟି ଲୋକଙ୍କ ସଞ୍ଚୟ ବହୁ ଲକ୍ଷ କୋଟି ଟଙ୍କା ଆଦାନୀଙ୍କ କମ୍ପାନୀରେ ନିବେଶ କରାଯାଇଛି। ଏହାର ନିରପେକ୍ଷ ତଦନ୍ତ ଯୁଗ୍ମ ସଂସଦୀୟ କମିଟି ଦ୍ୱାରା କରାଯିବାରୁ ଶାସକ ଦଳ ପକ୍ଷରୁ ହୋହାଲ୍ଲା କରାଯାଇ ଲୋକସଭାକୁ ଅଚଳ କରାଯାଇଛି। ଫଳରେ ଭାରତର ଗଣତନ୍ତ୍ର ବିପନ୍ନ ହେବାରେ ଲାଗିଥିବା ଗଞ୍ଜାମ ଜିଲା କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି। ଜିଲା କଂଗ୍ରେସ କାର୍ଯ୍ୟାଳୟ ବ୍ରହ୍ମପୁରସ୍ଥ ବାପୁଜୀ ଆଶ୍ରମରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ବରିଷ୍ଠ ନେତା ତଥା ଦଳର ପର୍ଯ୍ୟବେକ୍ଷକ କିଶୋର ଜେନା ଆହୁରି କହିଛନ୍ତି, ପ୍ରଧାନମନ୍ତ୍ରୀ ଓ ତାଙ୍କ ସରକାର ରାହୁଲ ଗାନ୍ଧୀଙ୍କ ନାଁ ଶୁଣିଲେ ଭୟଭୀତ ହେଉଛନ୍ତି। ତେଣୁ ତାଙ୍କୁ ଲୋକସଭାରୁ ଦୂରେଇ ରଖିବା ଷଡ଼ଯନ୍ତ୍ର କରିଛନ୍ତି। ଦେଶର ଗଣତନ୍ତ୍ରର ସୁରକ୍ଷା ଲାଗି ସବୁ ବିରୋଧୀ ଦଳ ଏକଜୁଟ ହୋଇ ଭାଜପା ବିରୋଧରେ ସ୍ବର ଉତ୍ତୋଳନ କରୁଛନ୍ତି। କିନ୍ତୁ ବିଜେଡି ସରକାର ଓ ଏହାର ନେତା ଚୁପ ରହିଛନ୍ତି। ଗଣତନ୍ତ୍ରକୁ ସୁଦୃଢ଼ ଏବଂ ଗଣତାନ୍ତ୍ରିକ ଅନୁଷ୍ଠାନର ମର୍ଯ୍ୟାଦା ଓ ସମ୍ମାନ ରଖିବା ବିଜେଡିର ଦାୟିତ୍ୱ ନୁହେଁ କି ବୋଲି ସେ ପ୍ରଶ୍ନ କରିଛନ୍ତି।
ସେହିପରି ଫୁଲବାଣୀରେ ମଧ୍ୟ କଂଗ୍ରେସ ପକ୍ଷରୁ ଏ ନେଇ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଛି। ସେଥିରେ ଅଭିଯୋଗ କରାଯାଇଛି, ଦେଶର ଅର୍ଥନୀତି ଦୁର୍ବଳ। ଦରଦାମ ବୃଦ୍ଧି ଜନତାଙ୍କୁ ଅଣନିଶ୍ୱାସୀ କରିଦେଇଛି । ଲୋକେ ଏଲଆଇସି, ଜାତୀୟ କରଣ ବ୍ୟାଙ୍କରେ ରଖିଥିବା ଟଙ୍କାକୁ ଆଦାନୀ କମ୍ପାନୀକୁ ଦିଆଯାଇଛି ା ଏଭଳି ପ୍ରସଙ୍ଗ ରାହୁଲ ଗାନ୍ଧି ସଂସଦରେ ଉଠାଇବାରୁ ତାଙ୍କ ବିରୋଧରେ ସରକାର ଆକ୍ରୋଶ ମୂଳକ କାର୍ଯ୍ୟାନୁଷ୍ଠାନ ନେଇଛନ୍ତି। ଏକ ମାନହାନୀ ମାମଲାରେ ତାଙ୍କୁ ୨ ବର୍ଷ ଜେଲ ହେବା ପରେ ତାଙ୍କୁ ବହିସ୍କାର କରାଯାଇଛି । କଂଗ୍ରେସ ଏହାକୁ ବରଦାସ୍ତ କରିବ ନାହିଁ । ଗଣତନ୍ତ୍ର ବଞ୍ଚାଇବାକୁ ଆନ୍ଦୋଳନ ଜାରି ରହିବ ବୋଲି ଏକ ଖବରଦାତା ସମ୍ମିଳନୀରେ କଂଗ୍ରେସ କର୍ମକର୍ତ୍ତାମାନେ କହିଛନ୍ତି । ଏହି ଖବରଦାତା ସମ୍ମିଳନୀରେ ପୂର୍ବତନ ଏମ୍ପି ନକୁଳ ନାୟକ, ପୂର୍ବତନ ବିଧାୟକ ଅଭିମନ୍ୟୁ ବେହେରା, ରାଜ୍ୟ କୃଷକ ସେଲ ସଭାପତି ଅମୀୟ ପଟ୍ଟନାୟକ, ଜିଲା କଂଗ୍ରେସ ସଭାପତି ଅନାମ ନାୟକ, ମହିଳା ନେତ୍ରୀ ରୁଦା ମଲ୍ଲିକ ପ୍ରମୁଖ ଉପସ୍ଥି୍ତ ଥିଲେ ।
