କନୌଜ: ଭାରତର ଅଧିକାଂଶ ରାଜ୍ୟରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଓ ଗୁଳୁଗୁଳି ଯୋଗୁଁ ସାଧାରଣ ଜୀବନଯାତ୍ରା ବ୍ୟାହତ ହୋଇଛି। ଏଥିମଧ୍ୟରେ ପାଣିପାଗ ବିଭାଗ ତରଫରୁ କେତେକ ରାଜ୍ୟରେ ହିଟ୍ ୱେଭ ଆକଳନ ଯୋଗୁ ବିଦ୍ୟାଳୟଗୁଡ଼ିକୁ ଛୁଟି ଘୋଷଣା କରାଯାଇଛି। ତେବେ ଯେଉଁଠାରେ ବିଦ୍ୟାଳୟ ଖୋଲା ରହିଛି, ପ୍ରଚଣ୍ଡ ରୌଦ୍ରତାପ ଯୋଗୁ ଅଭିଭାବକମାନେ ପିଲାଙ୍କୁ ସ୍କୁଲ ପଠାଉନାହାଁନ୍ତି। ଏଭଳି ସ୍ଥିତିରେ ଉତ୍ତରପ୍ରଦେଶର କନୌଜ ଜିଲାର ଏକ ପ୍ରାଥମିକ ବିଦ୍ୟାଳୟର ଶିକ୍ଷକମାନେ ପିଲାମାନଙ୍କୁ ସ୍କୁଲ ଆଣିବା ପାଇଁ ଏକ ନିଆରା ଉପାୟ ଆପଣାଇଛନ୍ତି। ସେମାନେ ଉକ୍ତ ବିଦ୍ୟାଳୟର ଏକ ଶ୍ରେଣୀଗୃହକୁ ପାଣିରେ ପରିପୂର୍ଣ୍ଣ ଗୋଟିଏ ସୁଇମିଂ ପୁଲ୍ରେ ପରିଣତ କରିଛନ୍ତି। ଶିକ୍ଷକମାନଙ୍କର ଏହି କୌଶଳ କାମ କରିଛି। ପ୍ରଚଣ୍ଡ ତାତି ସତ୍ତ୍ୱେ ସୁଇମିଂ ପୁଲ୍ରେ ଗାଧୋଇବା ଏବଂ ମଜା କରିବା ବାହାନାରେ ପିଲାମାନେ ବିଦ୍ୟାଳୟରେ ପହଞ୍ଚିଛନ୍ତି। ଶ୍ରେଣୀଗୃହରେ ନିର୍ମିତ ଏହି ସୁଇମିଂ ପୁଲ୍ରେ ପିଲାମାନେ ମଜା ନେଉଥିବାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ରିପୋର୍ଟ ଅନୁଯାୟୀ ଏହି ଭିଡିଓ କନୌଜ ଜିଲାର ଉମର୍ଦା ବ୍ଲକର ମେହସୋନାପୁରସ୍ଥିତ ଏକ ପ୍ରାଥମିକ ବିଦ୍ୟାଳୟର। ଏଠାରେ କିଛିଦିନ ହେବ ତାପମାତ୍ରା ଲଗାତର ୪୦ରୁ ୪୨ଡିଗ୍ରୀ ସେଲ୍ସିୟସରେ ପହଞ୍ଚିଥିଲା। ତେଣୁ ଅଭିଭାବକମାନେ ପିଲାଙ୍କୁ ସ୍କୁଲକୁ ପଠାଉ ନ ଥିଲେ। ବିଦ୍ୟାଳୟରେ ପିଲାମାନଙ୍କ ଉପସ୍ଥାନ ବୃଦ୍ଧି କରିବା ପାଇଁ ପ୍ରଧାନ ଶିକ୍ଷକଙ୍କ ନେତୃତ୍ୱରେ ଶିକ୍ଷକମାନେ ଶ୍ରେଣୀଗୃହକୁ ସୁଇମିଂ ପୁଲ୍ ଭାବେ ପରିଣତ କରିଥିଲେ।
