ପାଟଣା,୧୪।୧(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ମୁଖ୍ୟାଳୟ ଦେଇ ପ୍ରବାହିତ ହେଉଥିବା ବୈତରଣୀ ପରମେଶ୍ବର ମହାଦେବ ମନ୍ଦିର ସଂଲଗ୍ନ ଅନୁସୟା ଘାଟରେ ମଙ୍ଗଳବାର ମୁଖ୍ୟମନ୍ତ୍ରୀ ବୁଡ଼ ପକାଇଛନ୍ତି। ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ମୁଖ୍ୟମନ୍ତ୍ରୀ ମୋହନ ଚରଣ ମାଝି ୭ ଥର ମକରବୁଡ ପକାଇ ଥିଲେ। ପ୍ରଥମେ ପୋଲ ଉପରେ ଉପସ୍ଥିତ ହଜାର ଲୋକଙ୍କୁ ଅଭିବାଦନ ଗ୍ରହଣ କରିବା ସହ ନମସ୍କାର କରି ମକର ବୁଡ ପକାଇଛନ୍ତି । କେନ୍ଦୁଝରରୁ ମଇଦାନ କେଲ ରାସ୍ତାରେ ସେ କଡା ସୁରକ୍ଷା ବ୍ୟବସ୍ଥାରେ ଆସି ପ୍ରଥମେ ଘାଟରେ ପହଞ୍ଚିଥିଲେ। ପରେ ପାପନାଶିନୀ ବୈତରଣୀରେ ବୁଡ ପକାଇ ସୂର୍ଯ୍ୟଙ୍କୁ ଅର୍ଘ୍ୟପ୍ରଦାନ କରିଥିଲେ।
ତାଙ୍କ ସହ ପାଟଣା ବିଧାୟକ ଅଖିଳ ଚନ୍ଦ୍ରଙ୍କ ସହ ବହୁ ବିଶିଷ୍ଟ ବ୍ୟକ୍ତି, ଭାଜପା ନେତା ଉପସ୍ଥିତ ରହି ତାଙ୍କୁ ସ୍ବାଗତ କରିଥିଲେ।
ପରେ ବୈତରଣୀ ସଂଲଗ୍ନ ପରମେଶ୍ବର ମହାଦେବ ଦର୍ଶନ ପରେ ପୁରାତନ ଆନନ୍ଦେଶ୍ୱର ଶିବ ମନ୍ଦିରକୁ ଯାଇ ସେଠାରେ ଜଳାଭିଷେକ କରିଥିଲେ। ଉଭୟ ମନ୍ଦିର କର୍ମକର୍ତ୍ତାମାନେ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିଥିଲେ।
ତେବେ ମୁଖ୍ୟମନ୍ତ୍ରୀଙ୍କ ବୈତରଣୀରେ ବୁଡ ପକାଇବାକୁ ନେଇ ଅଞ୍ଚଳବାସୀ ବେଶ୍ ଉତ୍ସାହିତ ରହିଥିଲେ। ଏହି ଅବସରରେ ଏସ୍ପି ନୀତିନ କୁଷଲ କରଦାଗୁଡୁ, ଜିଲାପାଳ ବିଶାଲ ସିଂ, ଉପଜିଲାପାଳ ଉମାଶଙ୍କର ଦଳେଇ ପ୍ରମୁଖ ଉପସ୍ଥିତଥିଲେ। ମୁଖ୍ୟମନ୍ତ୍ରୀଙ୍କ ସୁରକ୍ଷା ପାଇଁ ୯ ପ୍ଲାଟୁନ ପୋଲିସ ଫୋର୍ସ, ଲାଇଟ ଡିଟେକ୍ଟଟର, ଜାମର, ଡଗସ୍କ୍ବାର୍ଡ, ଭଳି କଡାସୁରକ୍ଷା ବ୍ୟବସ୍ଥା କରାଯାଇଥିଲା। ମାଜିଷ୍ଟ୍ରେଟ ଭାବେ ସାହାରପଡ଼ା ତହସିଲ ଦାର ରଞ୍ଜିତ ମହାନ୍ତ ନିୟୋଜିତ ରହିଛନ୍ତି।
ପରେ ମୁଖ୍ୟମନ୍ତ୍ରୀ ଚାକୁଣ୍ଡାପାଳ ପଞ୍ଚାୟତ ଶ୍ୟାମସୁନ୍ଦରପୁର ଗ୍ରାମର କେନ୍ଦୁଝର ଏମ୍ପି ଅନନ୍ତ ନାୟକଙ୍କ ଜିଲା ପ୍ରତିନିଧି ହରି ମହାନ୍ତ ଘରେ ମକରର ସ୍ବତନ୍ତ୍ର ପୀଠା ଛାଙ୍କଲ ଖାଇ ସଡକ ପଥରେ କେନ୍ଦୁଝର ଗସ୍ତ କରବାର କାର୍ଯ୍ୟକ୍ରମ ରହିଛି।
