ବାରିପଦା ଅଫିସ,୧୨।୬ କେନ୍ଦ୍ର ସରକାରଙ୍କ ଆଦିବାସୀ ମନ୍ତ୍ରଣାଳୟ ପକ୍ଷରୁ ଏକ ତିନିଜଣିଆ ପ୍ରତିନିଧି ଦଳ ଶନିବାର ମୟୂରଭଞ୍ଜ ଜିଲା ଗସ୍ତରେ ଆସି ମିଶନ ଜୀବିକା ଓ ମିଶନ ସୁବିଦ୍ୟା ଯୋଜାନର ସମୀକ୍ଷା କରିଛନ୍ତି। ଏଥିରେ ଆଦିବାସୀ ମନ୍ତ୍ରଣାଳୟର ଉପସଚିବ ମନୋଜ କୁମାର ସିଂ, ଏନ୍ଇଏସ୍ଟିର ଯୁଗ୍ମ କମିଶନର ବିପିନ ଚନ୍ଦ୍ର ରାତୁରୀ ଓ ପରାମର୍ଶଦାତା ପ୍ରମୋଦ କୁମାର ଅଗ୍ରୱାଲ, ରାଜ୍ୟ ସରକାରଙ୍କ ପକ୍ଷରୁ ଫାଇନାନ୍ସ ମ୍ୟାଜେନର ସୁଶାନ୍ତ କୁମାର ବେହେରା, କେନ୍ଦ୍ର ଆଦିବାସୀ ବ୍ୟାପାର ଓ ଜଳଶକ୍ତି ମନ୍ତ୍ରୀଙ୍କ ପ୍ରତିନିଧି ହେମନ୍ତ କୁମାର ଶାହା ସମୀକ୍ଷା ବୈଠକରେ ଯୋଗ ଦେଇଥିଲେ। ଆଇଟିଡିଏର ପ୍ରକଳ୍ପ ଅଧିକାରୀ ବସନ୍ତ କୁମାର ସେଠୀ, ସ୍ବତନ୍ତ୍ର ଅଧିକାରିଣୀ ବିଦ୍ୟୁତଲତା ମହାପାତ୍ର, ସହକାରୀ ଅଧିକ୍ଷଣ ଯନ୍ତ୍ରୀ ଗଣପତି ଜେନା, ପ୍ରକଳ୍ପ ପରିଚାଳକ ଗଙ୍ଗାଧର ପ୍ରଧାନ, ବିଷୟବସ୍ତୁ ବିଶେଷଜ୍ଞ ଅମରେଶ ଚନ୍ଦ୍ର ବେହେରା, ସମସ୍ତ ଜୀବିକା ବିଶେଷଜ୍ଞ, ଏଫ୍ଆର୍ଏ ଜିଲା ସଂଯୋଜକ ପ୍ରଶାନ୍ତ ରାୟ ପ୍ରମୁଖ ଆଲେଚନାରେ ଅଂଶଗ୍ରହଣ କରି ଯୋଜନାଗୁଡ଼ିକର ରୂପରେଖ ସମ୍ପର୍କରେ ଅବଗତ କରିଛନ୍ତି। ଉକ୍ତ ବୈଠକରେ କେନ୍ଦ୍ରୀୟ ପ୍ରତିନିଧିମାନଙ୍କ ସହ ବାରିପଦାର ଜନୈକ ବ୍ୟବସାୟୀଙ୍କ ଉପସ୍ଥିତି ଓ କାଗଜପତ୍ର ତନଖି ସମୟରେ ବିଭିନ୍ନ ପ୍ରଶ୍ନବାଚୀ ସୃଷ୍ଟି କରି ଅଧିକାରୀମାନଙ୍କ ମନୋବଳକୁ ଦୁର୍ବଳ କରିବା ନେଇ ଅସନ୍ତୋଷ ପ୍ରକାଶ ପାଇଛି। ସରକାରୀ କାର୍ଯ୍ୟକ୍ରମରେ ସାମିଲ ହୋଇ ଏଭଳି ସମୀକ୍ଷା କରିବା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।