ଭୁବନେଶ୍ୱର,୮।୫(ଅନୁରାଧା ମହାରଣା): ଗତ କିଛି ମାସ ଧରି ଦେଶରେ ମୁଦ୍ରାସ୍ଫୀତିରେ ମନ୍ଥରତା ଦେଖାଦେଇଛି। ମାର୍ଚ୍ଚରେ ଖୁଚୁରା ମୁଦ୍ରାସ୍ଫୀତି ହାର ୯ ମାସ ମଧ୍ୟରେ ସର୍ବନିମ୍ନ ସ୍ତରକୁ ଖସି ଆସିଥିଲା। ତେବେ ଖୁଚୁରା ମୁଦ୍ରାସ୍ଫୀତି ହାର ରିଜର୍ଭ ବ୍ୟାଙ୍କର ଲକ୍ଷ୍ୟଠାରୁ ଅଧିକ ରହିଛି। ଦରବୃଦ୍ଧି ଆଶଙ୍କା ନେଇ ଖାଉଟି ଚିନ୍ତାରେ ପଡ଼ିଛନ୍ତି। ଏପ୍ରିଲ ମାସରେ ମୁଦ୍ରାସ୍ଫୀତି ସଂଖ୍ୟାରେ କିଛି ବୃଦ୍ଧି ଘଟିପାରେ ବୋଲି ଆଶଙ୍କା କରାଯାଉଛି। ଏପ୍ରିଲ ମାସରେ ପନିପରିବା ମୁଦ୍ରାସ୍ଫୀତି ୧୦ ପ୍ରତିଶତରୁ ଅଧିକ ହେବ ବୋଲି ଆଶା କରାଯାଉଛି। ଆଳୁ ଦର ବୃଦ୍ଧି ଏଥିପାଇଁ ଦାୟୀ ବୋଲି କୁହାଯାଉଛି। ଗତ ଏକ ମାସ ମଧ୍ୟରେ ଆଳୁ ମୂଲ୍ୟରେ ୧୨ ପ୍ରତିଶତରୁ ଅଧିକ ବୃଦ୍ଧି ଘଟିଛି। ଖାଦ୍ୟ ମୁଦ୍ରାସ୍ଫୀତିରେ ପନିପରିବାର ଅଂଶ ୧୫ ପ୍ରତିଶତରୁ ଅଧିକ। ଏଭଳି ପରିସ୍ଥିତିରେ ଆଳୁର ମୂଲ୍ୟ ବୃଦ୍ଧି ସମସ୍ୟା ବଢ଼ାଇପାରେ। ଗ୍ରାହକ ବ୍ୟାପାର ବିଭାଗର ମୂଲ୍ୟ ମନିଟରିଂ ଡିଭିଜନ ସୂଚନାନୁସାରେ ମେ ୪ ସୁଦ୍ଧା ଆଳୁର ଖୁଚୁରା ମୂଲ୍ୟ କିଲୋଗ୍ରାମ ପିଛା ୨୮.୨ ଟଙ୍କାକୁ ବୃଦ୍ଧି ପାଇଛି। ୧ ମାସ ପୂର୍ବେ ଆଳୁର ଖୁଚୁରା ମୂଲ୍ୟ କିଲୋଗ୍ରାମ ପିଛା ୨୫.୨୭ ଟଙ୍କା ଥିବାବେଳେ ୧ବର୍ଷ ପୂର୍ବେ ଖୁଚୁରା ବଜାରରେ ଆଳୁ କିଲୋଗ୍ରାମ ପିଛା ୨୦.୬୦ ଟଙ୍କା ଥିଲା। ତେବେ ପିଆଜ ଏବଂ ଟମାଟୋ ଦରରେ ସାମାନ୍ୟ ହ୍ରାସ ଖାଉଟିଙ୍କୁ କିଛି ପରିମାଣରେ ଆଶ୍ୱସ୍ତି ଦେଇଛି। ମାସିକ ଭିତ୍ତିରେ ପିଆଜର ହାରାହାରି ଖୁଚୁରା ମୂଲ୍ୟ କିଲୋଗ୍ରାମ ପିଛା ୩୨.୨୨ ଟଙ୍କାକୁ ଖସି ଆସିଛି। ୧ ମାସ ପୂର୍ବରୁ କିଲୋଗ୍ରାମର ମୂଲ୍ୟ ୩୨.୫୩ ଟଙ୍କା ଥିଲା। ସେହିଭଳି ଟମାଟୋର ହାରାହାରି ମୂଲ୍ୟ ମଧ୍ୟ ୧ ମାସ ପୂର୍ବରୁ ହ୍ରାସ ପାଇଛି। ତେବେ ୧ବର୍ଷ ପୂର୍ବେ ପିଆଜର ହାରାହାରି ମୂଲ୍ୟ କିଲୋଗ୍ରାମ ୨୨.୩୭ ଟଙ୍କା ଥିଲା। ମାର୍ଚ୍ଚ ମାସରେ ଖୁଚୁରା ମୁଦ୍ରାସ୍ଫୀତି ହାର ୪.୮୫ ପ୍ରତିଶତ ଥିଲା, ଯାହା ୯ ମାସ ମଧ୍ୟରେ ସର୍ବନିମ୍ନ ସ୍ତର । ଏହାପୂର୍ବରୁ ଫେବୃଆରୀରେ ଖୁଚୁରା ମୁଦ୍ରାସ୍ଫୀତି ହାର ୫.୦୯ ପ୍ରତିଶତ ଏବଂ ଜାନୁଆରୀରେ ୫.୧୦ ପ୍ରତିଶତ ଥିଲା। ଅନ୍ୟପଟେ ଭାରତୀୟ ରିଜର୍ଭ ବ୍ୟାଙ୍କ ଖୁଚୁରା ମୁଦ୍ରାସ୍ଫୀତିକୁ ୪ ପ୍ରତିଶତରୁ କମ୍ କରିବାକୁ ଲକ୍ଷ୍ୟ ଧାର୍ଯ୍ୟ କରିଛି। ଏପ୍ରିଲ ମାସ ପାଇଁ ଖୁଚୁରା ମୁଦ୍ରାସ୍ଫୀତି ଆକଳନ ମେ ୧୩ରେ ପ୍ରକାଶ ପାଇବ।
