ନୂଆଦିଲ୍ଲୀ: ଆର୍ଥତ୍କ ବର୍ଷ ୨୦୨୧-୨୨ ଲାଗି ସାଧାରଣ ବଜେଟ ପ୍ରକ୍ରିୟାକୁ ଅର୍ଥ ମନ୍ତ୍ରଣାଳୟ ଚଳିତ ମାସ ୧୬ରୁ ଆରମ୍ଭ କରିବ। ଗୁରୁବାର ଏ ନେଇ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି। ନରେନ୍ଦ୍ର ମୋଦି ସରକାରଙ୍କ ଦ୍ୱିତୀୟ ପାଳିରେ ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କ ଏହା ତୃତୀୟ ବଜେଟ ହେବ। ଚଳିତ ଆର୍ଥତ୍କ ବର୍ଷ କରୋନା ଯୋଗୁ ଅର୍ଥ ବ୍ୟବସ୍ଥା ସଙ୍କଟ ସ୍ଥିତି ଦେଇ ଗତି କରୁଛି। ଏହା ଯୋଗୁ ଜିଡିପି ଅଭିବୃଦ୍ଧି କ୍ଷତିଗ୍ରସ୍ତ ହୋଇଥିବା ବେଳେ ରାଜସ୍ବ ସଂଗ୍ରହ ମଧ୍ୟ କମୁଛି। ଏଭଳି ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ବଜେଟରେ ସ୍ଥାନ ପାଇବ ବୋଲି କୁହାଯାଉଛି। ପ୍ରତିବର୍ଷ ସରକାର ଏଭଳି ପ୍ରାକ୍ ବଜେଟ ପ୍ରସ୍ତୁତି ବୈଠକ ଡାକିଥାନ୍ତି। ଆସନ୍ତା ଆର୍ଥତ୍କ ବର୍ଷ ଲାଗି ବଜେଟର ରୂପରେଖ କିଭଳି ରହିବ ଏହି ବୈଠକରେ ବିଭିନ୍ନ ଆଲୋଚନା ପର୍ଯ୍ୟାଲୋଚନା କରାଯାଇଥାଏ। ବଜେଟ ଲାଗି ଧାର୍ଯ୍ୟ ପୂର୍ବାନୁମାନକୁ ବ୍ୟୟ ସଚିବ ଏବଂ ଆର୍ଥତ୍କ ପରାମର୍ଶଦାତାଙ୍କ ସହ ଆଲୋଚନା କରିବା ପରେ ଚୂଡ଼ାନ୍ତ ନିଷ୍ପତ୍ତି ନିଆଯାଇଥାଏ।
ପ୍ରାକ୍ ବଜେଟ ପ୍ରସ୍ତୁତି ବୈଠକ ୧୬ ଅକ୍ଟୋବରରୁ ଆରମ୍ଭ ହୋଇ ନଭେମ୍ବର ପ୍ରଥମ ସପ୍ତାହ ଯାଏ ଚାଲିବ। ଏହି ସମୟ ମଧ୍ୟରେ ମନ୍ତ୍ରଣାଳୟ ବିଭିନ୍ନ କାର୍ଯ୍ୟପନ୍ଥା ଗ୍ରହଣ କରିବ ବୋଲି ଜଣାପଡ଼ିଛି। ୨୦୨୧-୨୨ର ସାଧାରଣ ବଜେଟ ଫେବୃୟାରୀ ପହିଲାରେ ଆସିପାରେ। ଫେବୃୟାରୀ ଶେଷ ବେଳକୁ ବଜେଟ ଉପସ୍ଥାପନ କରିବା ପରମ୍ପରା ବିଗତ ଦିନରୁ ଚାଲି ଆସିଥିବା ବେଳେ ନରେନ୍ଦ୍ର ମୋଦିଙ୍କ ସରକାର ସମୟରେ ଏଥିରେ ପରିବର୍ତ୍ତନ କରାଯାଇଛି। ୨୦୧୭ରେ ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟ୍ଲୀ ଫେବୃୟାରୀ ପହିଲାରେ ବଜେଟ ଉପସ୍ଥାପନ କରିଥିଲେ। ଏହାଦ୍ୱାରା ଏପ୍ରିଲରେ ଆର୍ଥତ୍କ ବର୍ଷ ଆରମ୍ଭ ହେବା ସମୟରୁ ହିଁ ବିଭିନ୍ନ ମନ୍ତ୍ରଣାଳୟକୁ ଅର୍ଥ ରାଶି ଆବଣ୍ଟନ କରାଯାଇଥାଏ। ଏହା ସହ ଘରୋଇ ବଜାରର କମ୍ପାନୀଗୁଡ଼ିକୁ ସେମାନଙ୍କ ବିଜ୍ନେସ ଏବଂ ଟିକସ ପ୍ଲାନ୍ କରିବା ଲାଗି ସମୟ ମିଳିଯାଇଥାଏ।
