ଭୁବନେଶ୍ୱର,୨୧।୬(ବ୍ୟୁରୋ):ଭୁବନେଶ୍ୱର ମହାନଗର ନିଗମ (ବିଏମ୍ସି) ପାଇଁ ରାଜ୍ୟ ସରକାର ବଡ ଘୋଷଣା କରିଛନ୍ତି। ପୂର୍ବରୁ ବିଏମ୍ସିକୁ ୩ଟି ଜୋନରେ ବିଭକ୍ତ କରାଯାଇଥିବାବେଳେ ଖୁବ୍ଶୀଘ୍ର ଆଉ ୩ଟି ଜୋନ ସୃଷ୍ଟି ହେବାକୁ ଯାଉଛି। ଫଳରେ ରାଜଧାନୀ ଭୁବନେଶ୍ୱରକୁ ମୋଟ୍ ୬ଟି ଜୋନ୍ରେ ଭାଗ କରାଯାଇ ପରିଚାଳନା କରାଯିବ। ପ୍ରତି ଜୋନ୍ରେ ଅଧିକ ଅଧିକାରୀ ନିଯୁକ୍ତ ହେବା ସହ ସହରବାସୀଙ୍କୁ ହାତପାହାନ୍ତାରେ ବିଏମ୍ସି ପକ୍ଷରୁ ସମସ୍ତ ସେବା ମିଳିପାରିବ ବୋଲି ସୋମବାର ବିଦାୟକାଳୀନ ସମ୍ବର୍ଦ୍ଧନା ସଭାରେ ପୂର୍ବତନ କମିଶନର ସଞ୍ଜୟ କୁମାର ସିଂହ ସୂଚନା ଦେଇଛନ୍ତି। ଅପରପକ୍ଷେ ସରକାରଙ୍କ ଏପରି ନିଷ୍ପତ୍ତିକୁ ମେୟର ସୁଲୋଚନା ଦାସ ସ୍ବାଗତ ଜଣାଇବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି। ନୂଆ ଜୋନ ହେବାଦ୍ୱାରା ଅଧିକାରୀଙ୍କ ଉପରେ ଭାର କମିବା ସହ ସେମାନେ ଆହୁରି ଦକ୍ଷ ହୋଇପାରିବେ ବୋଲି ମେୟର କହିଛନ୍ତି।
ପୂର୍ବରୁ ଉତ୍ତର ଜୋନ୍ ଅଧୀନରେ ୨୧ଟି ୱାର୍ଡ଼, ଦକ୍ଷିଣ ପଶ୍ଚିମ ଜୋନ୍ରେ ୨୧ ଏବଂ ଦକ୍ଷିଣ ପୂର୍ବ ଜୋନ୍ ଅଧୀନରେ ୨୫ଟି ୱାର୍ଡ଼ ରହିଛି। ଏବେ ଆଉ ୩ ଜୋନ୍ ସୃଷ୍ଟି ହେଲେ ପ୍ରତି ଜୋନ୍ ପାଇଁ ଓ୍ବାର୍ଡ ସଂଖ୍ୟା କମିଯିବା ଓ ଏହାଦ୍ୱାରା ବିଏମସିର ବିଭିନ୍ନ ଯୋଜନା ଅଧିକ ଫଳପ୍ରଦ ହେବ ବୋଲି ଆଶା କରାଯାଉଛି। ତେବେ ୱାର୍ଡ଼ ସଂଖ୍ୟା ଓ ସୀମାକୁ ନେଇ ବିଏମ୍ସି ପକ୍ଷରୁ କୌଣସି ସୂଚନା ମିଳି ନ ଥିଲେ ମଧ୍ୟ ଏଥିରେ ମଧ୍ୟ କିଛି ଅଂଶରେ ପରିବର୍ତ୍ତନ ହୋଇପାରେ ବୋଲି ଅନୁମାନ କରାଯାଉଛି। ସେହିପରି ପ୍ରୋଭିଜନାଲ ପେନସନ୍ ଓ ପେନ୍ଶନ ପାଇବା ପାଇଁ ହନ୍ତସନ୍ତ ହେଉଥିବା ଅବସରପ୍ରାପ୍ତ କର୍ମଚାରୀଙ୍କୁ ଆଉ ସମସ୍ୟା ହେବନାହିଁ। ଏଥିସହ ବିଏମ୍ସି କମିଶନରଙ୍କୁ ଅବସରକାଳୀନ ଭତ୍ତା ମଞ୍ଜୁରି ପାଇଁ କ୍ଷମତା ମିଳିଛି। ଏ ନେଇ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି।
