ଭୁବନେଶ୍ୱର,୫।୪(ବ୍ୟୁରୋ):ଶ୍ରୀମନ୍ଦିରର ୧୦୦ ମିଟର ଭିତରେ ନିର୍ମାଣ ପ୍ରସଙ୍ଗରେ ଭୁବନେଶ୍ୱର ଏମ୍ପି ଅପରାଜିତା ଷଡଙ୍ଗୀ ଟୁଇଟ୍ କରି ରାଜ୍ୟ ସରକାରଙ୍କ ଉପରେ ଦୋଷ ଲଦିଛନ୍ତି। ଅନ୍ୟପଟେ ବରିଷ୍ଠ ଭାଜପା ନେତା ବିଜୟ ମହାପାତ୍ର ମଧ୍ୟ ସରକାରଙ୍କ ଆଡକୁ ଅଙ୍ଗୁଳି ଉଠାଇଛନ୍ତି। ତେବେ ବିଜେଡି ନେତାଙ୍କ ପ୍ରତିକ୍ରିୟା ଏହା ଉପରେ ମିଳି ନ ଥିବାବେଳେ ମୁଖ୍ୟ ଶାସନ ସଚିବ କିନ୍ତୁ ଶ୍ରୀମନ୍ଦିର ରୋଷଘର ଚୁଲି ଭାଙ୍ଗିବା ସମସ୍ୟା ବୁଲି ଦେଖିବା ସହ ଐତିହ୍ୟ କରିଡର କଥା ଉପରେ ନିଜର ପ୍ରତିକ୍ରିୟା ରଖିଛନ୍ତି। ଅପରାଜିତା ତାଙ୍କ ଟୁଇଟ୍ରେ ଉଲ୍ଲେଖ କରିଛନ୍ତି ଯେ, ଏଏସଆଇର ଚିଠିରେ ଶ୍ରୀମନ୍ଦିର ନିଷିଦ୍ଧାଞ୍ଚଳରେ କାମ ବନ୍ଦ କରିବାକୁ ସ୍ପଷ୍ଟ ନିର୍ଦ୍ଦେଶ ରହିଛି। ଉକ୍ତ ଚିଠିଟି ଗତ ଫେବୃୟାରୀ ୫ରୁ ଲେଖା ଯାଇଥିଲେ ମଧ୍ୟ ରାଜ୍ୟ ସରକାରଙ୍କ କାର୍ଯ୍ୟ ବନ୍ଦ ହୋଇନାହିଁ ବୋଲି ସେ କହିଥିଲେ।
ବରିଷ୍ଠ ନେତା ବିଜୟ ମହାପାତ୍ର ସୋମବାର ଗଣମାଧ୍ୟମକୁ କହିଛନ୍ତି, ମନ୍ଦିର ଓ ଜିଲା ପ୍ରଶାସନ ୩ ଦିନ ଆଗରୁ ରୋଷ ଘରେ ବିଭ୍ରାଟ କଥା ଜାଣିଥିଲା। ଏହାସତ୍ତ୍ୱେ ଏଭଳି ଘଟଣା ଘଟିଲା। ସେଥିଲାଗି ଜିଲା ଓ ମନ୍ଦିର ପ୍ରଶାସନ ଦାୟୀ। ସେମାନଙ୍କ ଉପରେ ରାଜ୍ୟ ସରକାର କାର୍ଯ୍ୟାନୁଷ୍ଠାନ ନିଅନ୍ତୁ। କାହାକୁ ସୁରକ୍ଷା ଦିଆଯିବା ଉଚିତ ନୁହେଁ। ଜଣେ ଏସ୍ପି ପଦବୀର ଅଫିସର୍ ସୁରକ୍ଷା ଦାୟିତ୍ୱରେ ରହିବା କଥା। କିନ୍ତୁ କେହି ନାହାନ୍ତି ଏବଂ ଘଟଣାଦିନ କୌଣସି ସୁରକ୍ଷା ଅଧିକାରୀ ନ ଥିଲେ। ଶ୍ରୀମନ୍ଦିର ସୁରକ୍ଷା ନେଇ ଗତ ୨୦୧୯ ନଭେମ୍ବର ୪ ତାରିଖରେ ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶକୁ ରାଜ୍ୟ ସରକାର ୪ଟି କ୍ଷେତ୍ରରେ ଅବମାନନା କରିଛନ୍ତି। ଏହାସହ ଶ୍ରୀମନ୍ଦିର ଚାରିପାଖରେ ବିକାଶ ପାଇଁ ସେହି କାମ କରିହେବ ଯେଉଁଥିରେ କୌଣସି ଆପତ୍ତି ନ ଥିବ। ଟେମ୍ପଲ ଫଣ୍ଡର ଅଡିଟ ସିଏଜିଙ୍କ ଦ୍ୱାରା ହେଉନାହିଁ। ତେଣୁ ରାଜ୍ୟ ସରକାର ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଅବମାନନା କରିଛନ୍ତି। ଆର୍ଥିକ ସ୍ବାର୍ଥ ଏବଂ ମନ୍ଦ ଉଦ୍ଦେଶ୍ୟ ରଖି ବାବୁମାନେ ଏଭଳି କାମ କରୁଛନ୍ତି। ମୁଖ୍ୟମନ୍ତ୍ରୀ ଏହା ଉପରେ ସମୀକ୍ଷା ବୈଠକ କରିବା ଦରକାର। ପାର୍ଲାମେଣ୍ଟରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉଠିବା ପରେ ମଧ୍ୟ ଏଏସ୍ଆଇ ଓ ଏନ୍ଏମଏ ଚୁପ ରହିଛନ୍ତି। ଏଥିରୁ ସେମାନଙ୍କ ଅବହେଳା କଥା ଜଣାପଡୁଛି। ଏଏସ୍ଆଇ ମଧ୍ୟ କୌଣସି ଏକ୍ସପର୍ଟ ଟିମ୍ ନ ପଠାଇବା ଆଶ୍ଚର୍ଯ୍ୟଜନକ ବୋଲି ସେ କହିଛନ୍ତି। ଯେହେତୁ ବେଆଇନ କାମ ହୋଇଥିଲା ତେଣୁ ଏବେ ଖୋଳାଯାଇଥିବା ଗାତରେ ବାଲି ଭର୍ତ୍ତି ଚାଲିଛି। ଏଏସ୍ଆଇ ଏବଂ ଏନଏମଏ ଟିମ୍ ତୁରନ୍ତ ପଠାଇବାକୁ ବିଜୟ କହିଛନ୍ତି।
