ନୂଆଦିଲ୍ଲୀ: ଜୋ ବାଇଡେନ୍ ଆମେରିକା ରାଷ୍ଟ୍ରପତି ନିର୍ବାଚନରେ ବିଜୟୀ ହେବା ପରଠାରୁ ଶପଥ ଗ୍ରହଣ କରିବା ପୂର୍ବ ସମୟ ଯାଏ ଆମେରିକା ଶେୟାର ବଜାର ରେକର୍ଡ ସ୍ତରରେ ରହିଥିଲା। ବିଶ୍ୱ ସ୍ତରର ରିସର୍ଚ୍ଚ ସଂସ୍ଥା ସିଏଫ୍ଆର୍ଏ ମୁତାବକ ଏହି ସମୟରେ ଏସ୍ ଆଣ୍ଡ ପି ଇଣ୍ଡେକ୍ସ ୧୩% ବଢିଛି। ଆମେରିକା ରାଷ୍ଟ୍ରପତି ନିର୍ବାଚନ ଫଳାଫଳ ଘୋଷଣା ପରେ ଶପଥ ଗ୍ରହଣ ହେବା ଯାଏ ସେଠାକାର ଶେୟାର ବଜାରର ହୋଇଥିବା ଅଭିବୃଦ୍ଧି ବର୍ତ୍ତମାନ ପର୍ଯ୍ୟନ୍ତ ସବୁଠାରୁ ଊର୍ଦ୍ଧ୍ୱରେ ରହିଛି। ଏହା ପୂର୍ବରୁ ପୁରୁଣା ରେକର୍ଡ ଜନ୍ ଏଫ୍.କେନେଡିଙ୍କ ନାମରେ ରହିଥିଲା। ୨୦ ଜାନୁୟାରୀ ୧୯୬୧ରେ କେନେଡି ଶପଥ ନେଇଥିଲେ। ସେହି ସମୟରେ ତାଙ୍କ ଜିତିବା ଏବଂ ଶପଥ ନେବା ସମୟର ୭୩ ଦିନ ମଧ୍ୟରେ ଏସ୍ ଆଣ୍ଡ ପି ୫୦୦ ସୂଚକାଙ୍କ ୮.୮% ବଢିଥିଲା। ତାଙ୍କ ଶପଥ ନେବାର ପରବର୍ତ୍ତୀ ୧୦୦ ଦିନରେ ବଜାର ୮.୯% ଊର୍ଦ୍ଧ୍ୱରେ ରହିଥିଲା।
୨୦୧୬ରେ ଯେତେବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ନିର୍ବାଚନରେ ହିଲାରୀ କ୍ଲିଣ୍ଟନଙ୍କୁ ହରାଇଥିଲେ ତାଙ୍କ ଶପଥ ନେବା ସମୟ ଯାଏ ଶେୟାର ବଜାରରେ ୬% ବୃଦ୍ଧି ପରିଲକ୍ଷିତ ହୋଇଥିଲା। ଟ୍ରମ୍ପ୍ଙ୍କ କାର୍ଯ୍ୟକାଳର ପ୍ରଥମ ୧୦୦ ଦିନରେ ବଜାର ଆଉ ୫% ବଢିଥିଲା। ଟ୍ରମ୍ପ୍ ଏବଂ ବାଇଡେନ୍ଙ୍କ କ୍ଷେତ୍ରରେ ଏକ ପାର୍ଥକ୍ୟ ଦେଖାଯାଇଥାଏ। ଟ୍ରମ୍ପ୍ଙ୍କୁ ଏକ ମଜଭୁତ ଅର୍ଥ ବ୍ୟବସ୍ଥା ମିଳିଥିଲା। ମାତ୍ର ବାଇଡେନ୍ ଏଭଳି ଏକ ସମୟରେ ରାଷ୍ଟ୍ରପତି ଭାର ସମ୍ଭାଳିଛନ୍ତି ଯେତେବେଳେ କି କରୋନା ସାରା ବିଶ୍ୱର ଅର୍ଥ ବ୍ୟବସ୍ଥାକୁ ସଙ୍କଟ ସ୍ଥିତିକୁ ଠେଲିଦେଇଛି।
୨୦୦୦ ନଭେମ୍ବରରେ ଯେତେବେଳ ଜର୍ଜ ଡବ୍ଲ୍ୟୁ. ବୁଶ୍ ରାଷ୍ଟ୍ରପତି ନିର୍ବାଚିତ ହୋଇଥିଲେ ତାଙ୍କ ଶପଥ ନେବା ଯାଏ ସେଠାକାର ଶେୟାର ବଜାର ୬% ହ୍ରାସ ହୋଇଥିଲା। ୨୦୦୮ ନଭେମ୍ବରରେ ବାରାକ ଓବାମା ରାଷ୍ଟ୍ରପତି ନିର୍ବାଚିତ ହୋଇଥିଲେ। ୨୦୦୯ରେ ସେ ଶପଥ ନେଇଥିଲେ। ସେହି ସମୟରେ ବଜାର ୨୦% ହ୍ରାସ ହୋଇଥିଲା। ଲେହମ୍ୟାନ ବ୍ରଦର୍ସ ଘଟଣା କାରଣରୁ ସେହି ସମୟରେ ନିବେଶକ ଆଶଙ୍କାରେ ରହିଥିଲେ।
ଟ୍ରମ୍ପ୍ଙ୍କ ପୂର୍ବରୁ ବାରାକ ଓବାମା, ଜର୍ଜ ବୁଶ ଏବଂ ବିଲ୍ କ୍ଲିଣ୍ଟନ ୮ ବର୍ଷ ଲେଖାଏ କ୍ଷମତାରେ ରହିଛନ୍ତି। କ୍ଲିଣ୍ଟନଙ୍କୁ ପୂର୍ବରୁ ଜର୍ଜ ଏଚ୍.ବ୍ଲ୍ୟୁ. ବୁଶ୍ ୪ ବର୍ଷ ଯାଏ ରାଷ୍ଟ୍ରପତି ଥିଲେ। ବୁଶ ସିନିୟରଙ୍କଠାରୁ ଟ୍ରମ୍ପଙ୍କ ଯାଏ ବିଚାର କଲେ ସବୁଠାରୁ ଭଲ ସମୟ କ୍ଲିଣ୍ଟନଙ୍କର ରହିଥିଲା। ତାଙ୍କର ୮ ବର୍ଷ କାର୍ଯ୍ୟକାଳ ମଧ୍ୟରେ ଏସ୍ ଆଣ୍ଡ ପି ୫୦୦ ଇଣ୍ଡେକ୍ସ ୨୧୧% ବଢିଛି। ଜର୍ଜ ବୁଶ ସିନିୟରଙ୍କ ସମୟରେ ସୂଚକାଙ୍କ ୩୯.୫% ହ୍ରାସ ପାଇଥିଲା। ସେଠାକାର ଅନ୍ୟ କୌଣସି ରାଷ୍ଟ୍ରପତିଙ୍କ ତୁଳନାରେ କ୍ଲିଣ୍ଟନଙ୍କ ସମୟରେ ଶେୟାର ବଜାର ଅଧିକ ରିଟର୍ନ ପ୍ରଦାନ କରିଛି।
