ବରଗଡ଼ ଅଫିସ,୮।୧: ବରଗଡ଼ ପୌର ପରିଷଦ ଅଧୀନ ୱାର୍ଡ ନଂ-୧ ନିଗମାନନ୍ଦ ବିହାର ବାସିନ୍ଦା ପୂଜା ଓ କଲ୍ଲୁ ଯାଦବଙ୍କ ୧୪ମାସର ପୁଅ ସାଇଙ୍କୁ ଚିକିତ୍ସା ସେବା ମିଳିଛି । ସାଇ ସଳଖ ଭାବେ ମୁଣ୍ଡ ରଖିପାରୁ ନ ଥିବାବେଳେ ଚଲାବୁଲା କିମ୍ବା ଉଠାବସା କରି ପାରୁ ନାହାନ୍ତି । ଏ ନେଇ ଗୁରୁବାର ଧରିତ୍ରୀରେ ଖବର ପ୍ରକାଶ ପାଇବା ପରେ ତାଙ୍କୁ ଚିକିତ୍ସା ସେବା ଯୋଗାଇ ଦେବା ପାଇଁ ରାଷ୍ଟ୍ରୀୟ ବାଲ୍ ସ୍ବାସ୍ଥ୍ୟ କାର୍ଯ୍ୟକ୍ରମ (ଆର୍ବିଏସ୍କେ) ବରଗଡ଼ ଆଗେଇ ଆସିଛି । ଜିଲା ପ୍ରଶାସନର ନିର୍ଦ୍ଦେଶକ୍ରମେ ଆର୍ବିଏସ୍କେର ମୋବାଇଲ ହେଲ୍ଥ ଟିମ୍ର ଡା. ସୁବ୍ରତ ମହାପାତ୍ର, ଫାର୍ମାସିଷ୍ଟ ଚୂଡ଼ାମଣି ଦେବତା (ଏମ୍ଏଚ୍ଟି) ସାଇଙ୍କ ଘରକୁ ଯାଇ ସ୍ବାସ୍ଥ୍ୟ ପରୀକ୍ଷା କରିଥିଲେ । ସାଇଙ୍କ ବିକାଶର ଅଭିବୃଦ୍ଧି ଠିକ୍ ଭାବେ ହୋଇ ପାରୁ ନ ଥିବା ସେମାନେ ଜାଣିବାକୁ ପାଇଥିଲେ । ଟିମ୍ ଶିଶୁପୁତ୍ରକୁ ତାଙ୍କ ମା’ଙ୍କ ସହିତ ନେଇ ବରଗଡ଼ ଜିଲା ମୁଖ୍ୟ ଡାକ୍ତରଖାନାରେ ଥିବା ଜିଲା ସହଳ ସାଧନା କେନ୍ଦ୍ର(ଡିଇଆଇସି)କୁ ନେଇଥିଲେ। ସେଠାର ଫିଜିଓଥେରାପିଷ୍ଟଙ୍କ ଦ୍ୱାରା ଶିଶୁକୁ ଥେରାପି ପ୍ରଦାନ କରାଯାଇଥିଲା । ସାଇକୁ ଡିଇଆଇସି ସାମ୍ନାରେ ରହିଥିବା ପୁଷ୍ଟି ସାଧନା କେନ୍ଦ୍ର(ଏନଆରସି)ରେ ଭର୍ତ୍ତି କରାଯିବ ବୋଲି ଆର୍ବିଏସ୍କେ ମ୍ୟାନେଜର ରାକେଶ ମହାପାତ୍ର ସୂଚନା ଦେଇଛନ୍ତି । ଆସନ୍ତା ୫ରୁ ୬ମାସ ମଧ୍ୟରେ ଶିଶୁର ମୋଲିଡିଲେର ଉନ୍ନତି ନିଶ୍ଚୟ ଜଣାପଡ଼ିବ ଏବଂ ଶିଶୁପୁତ୍ର ଠିକ୍ ଭାବେ ଚଲାବୁଲା କରିପାରିବ ବୋଲି ଫିଜିଓଥେରାପିଷ୍ଟ ଆଦିତ୍ୟ ଭୋଇ ପ୍ରକାଶ କରିଛନ୍ତି ।
