ଦାରିଙ୍ଗବାଡି,୨ /୪ (ଅରୁଣ ସାହୁ): ପରିବେଶକୁ ସ୍ବଚ୍ଛ ରଖିବା ପାଇଁ ସରକାର କୋଟି କୋଟି ଟଙ୍କା ଅନୁଦାନ ଦେଉଛନ୍ତି। ଏଥିପାଇଁ ପଞ୍ଚାୟତ ସମିତି ଏବଂ ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଜନହିତରେ ଶୁଦ୍ଧ ପିଇବାପାଣିର ବ୍ୟବସ୍ଥା ସହ ଗୋଷ୍ଠୀ ଶୌଚାଳୟ, ବିଶ୍ରାମଗାର ଆଦି ବ୍ୟବସ୍ଥା କରାଯାଉଛି। ଏହି କ୍ରମରେ କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସିମନବାଡି ପଞ୍ଚାୟତର ଜନହିତ ପାଇଁ ଉଭୟ ପଞ୍ଚାୟତ ସମିତି ଏବଂ ପଞ୍ଚାୟତ କାର୍ଯ୍ୟାଳୟ ପକ୍ଷରୁ ସହାଭାଗିତାରେ ୩ ଲକ୍ଷ ଟଙ୍କା ବ୍ୟୟବରାଦ କରାଯାଇ ଗୋଷ୍ଠୀ ଶୌଚାଳୟ କରାଯାଇଥିଲା। ତେବେ ଏହା ଲୋକଙ୍କ ହିତ ପାଇଁ କୌଣସି ସୁବିଧା ସ୍ଥାନରେ ନିର୍ମାଣ କରାଯିବା ବଦଳରେ ତାକୁ ପଞ୍ଚାୟତ କାର୍ଯ୍ୟାଳୟ ପରିସର ମଧ୍ୟରେ ନିର୍ମାଣ କରାଯାଇଛି। ଯାହାକି ଲୋକଙ୍କ କାର୍ଯ୍ୟରେ ଆସିବା ସମ୍ଭବ ନୁହଁ ବୋଲି ଅଭିଯୋଗ ହେଉଛି। ସେହିପରି ଏହାର ଅର୍ଥକୁ ତୋଷାରପାତ କରାଯାଇଥିବା ସନ୍ଦେହ ଉପୁଜୁଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି।
ପ୍ରକାଶ ଯେ, ଉକ୍ତ ଶୌଚାଳୟ ନିର୍ମାଣ ପାଇଁ ପଞ୍ଚାୟତ ସମିତି ୨ ଲକ୍ଷ ୧୦ ଏବଂ ପଞ୍ଚାୟତ ୯୦ ହଜାର ଅର୍ଥ ବ୍ୟାୟବରାଦ କରିବାକୁ ରହିଥିବା ପଞ୍ଚାୟତ ନିର୍ବାହୀ ଅଧିକାରୀ ପ୍ରଭାତ ପ୍ରଧାନ କହିଛନ୍ତି। ସେ ଏଠାରେ ନିଯୁକ୍ତି ପାଇବା ପୂର୍ବରୁ ଉକ୍ତ କାର୍ଯ୍ୟ କରାଯାଇଥିବା ବେଳେ ତାହା ଆହୁରି ସମ୍ପୂର୍ଣ୍ଣ ହୋଇ ନ ଥିବା ଓ ତତ୍କାଳ ଗ୍ରାମ ରୋଜଗାର ସେବକ ଉକ୍ତ କାର୍ଯ୍ୟ କରିଥିବା ସେ କହିଛନ୍ତି। ତେବେ କାହା ସ୍ବାର୍ଥରେ ଉକ୍ତ ଗୋଷ୍ଠୀ ଶୌଚାଳୟ ନିର୍ମାଣ କରାଯାଇଥିଲା। ତାକୁ କାହିଁକି ସମ୍ପୂର୍ଣ୍ଣ କରି ଲୋକାର୍ପଣ କରାଯାଉନାହିଁ ସେନେଇ ତଦନ୍ତ ପାଇଁ ଦାବି ହେଉଛି। ଉକ୍ତ ଗୋଷ୍ଠୀ ଶୌଚାଳୟ ଲୋକାର୍ପଣ କରାଗଲେ ଦିବ୍ୟାଙ୍ଗ, ମହିଳା ଓ ପୁରୁଷ ସମସ୍ତଙ୍କ ପାଇଁ ଏହା ସୁବିଧା ହୋଇପାରିବ ବୋଲି ମତ ପ୍ରକାଶ ପାଇଛି।
