ନୂଆଦିଲ୍ଲୀ,୧୨।୩: ୨୦୨୭ ବର୍ଷ ପାଇଁ ଏକ ଅଜବ ଏବଂ ଐତିହାସିକ ଟେଷ୍ଟ ମ୍ୟାଚ ଘୋଷଣା କରାଯାଇଛି। ପୁରୁଷ ଟେଷ୍ଟ କ୍ରିକେଟ ଇତିହାସର ୧୫୦ ବର୍ଷ ପୂରଣ ଉପଲକ୍ଷେ ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଏକ ଦିବା-ରାତ୍ର ଗୋଲାପୀ ବଲ ମ୍ୟାଚ ଆୟୋଜନ କରାଯିବାର କ୍ରିକେଟ ଅଷ୍ଟ୍ରେଲିଆ ଘୋଷଣା କରିଛି। ଏହି ମ୍ୟାଚ ୨୦୨୭ ମସିହାରେ ୧୧-୧୫ ମାର୍ଚ୍ଚ ପର୍ଯ୍ୟନ୍ତ ଖେଳାଯିବ। ପୂର୍ବରୁ ଅନେକ ଐତିହାସିକ କ୍ରିକେଟ ମ୍ୟାଚ ଆୟୋଜନ କରିଥିବା ମେଲବୋର୍ନ କ୍ରିକେଟ ଗ୍ରାଉଣ୍ଡ (MCG)କୁ ଏହି ମ୍ୟାଚ ପାଇଁ ଚୟନ କରାଯାଇଛି।
ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଏହି ସ୍ବତନ୍ତ୍ର ମ୍ୟାଚ ମେଲବୋର୍ନ କ୍ରିକେଟ ଗ୍ରାଉଣ୍ଡରେ ଖେଳାଯିବ ଏବଂ ଏହା ପଛରେ ଏକ ଆକର୍ଷଣୀୟ କାହାଣୀ ଲୁଚି ରହିଛି। କ୍ରିକେଟ ଇତିହାସର ପ୍ରଥମ ଟେଷ୍ଟ ମ୍ୟାଚ ୧୮୭୭ ମସିହାରେ MCG ରେ ଖେଳାଯାଇଥିଲା। ୧୯୭୭ରେ ଟେଷ୍ଟ କ୍ରିକେଟର ଇତିହାସ ୧୦୦ ବର୍ଷ ପୂରଣ କରିବାବେଳେ MCGରେ ଏକ ସୱତନ୍ତ୍ର ମ୍ୟାଚ ମଧ୍ୟ ଖେଳାଯାଇଥିଲା। ଏଥର ପାର୍ଥକ୍ୟ ଏହି ଯେ, ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ସମ୍ପୂର୍ଣ୍ଣ ଟେଷ୍ଟ ମ୍ୟାଚ ଦିନରେ ଖେଳାଯିବ ନାହିଁ କିନ୍ତୁ ଏହା ଏକ ଦିବା-ରାତ୍ର ଟେଷ୍ଟ ମ୍ୟାଚ ହେବ। ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଖେଳାଯାଉଥିବା ଏହି ଟେଷ୍ଟ ମ୍ୟାଚ ବିଶ୍ୱ ଟେଷ୍ଟ ଚାମ୍ପିଅନସିପ ସୂଚୀର ଅଂଶ ହେବ ନାହିଁ, କିନ୍ତୁ ଏହା ନିଶ୍ଚିତ ଭାବରେ ସିଜିନର ୧୨ଟି ଟେଷ୍ଟ ମ୍ୟାଚ ମଧ୍ୟରୁ ଗୋଟିଏ ହେବ।
ଇତିହାସର ପ୍ରଥମ ଟେଷ୍ଟ ମ୍ୟାଚ ୧୮୭୭ ମସିହାରେ ଖେଳାଯାଇଥିଲା। ୧୫-୧୯ ମାର୍ଚ୍ଚ ପର୍ଯ୍ୟନ୍ତ ଖେଳାଯାଇଥିବା ଏହି ମ୍ୟାଚ୍ରେ ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୨୪୫ ରନ କରିଥିଲା। ସେହି ମୁକାବିଲାରେ କଙ୍ଗାରୁ ଦଳ ପାଇଁ ଚାଲର୍ସ ବ୍ୟାନରମ୍ୟାନ ଏକାକୀ ୧୬୫ ରନର ଏକ ଚମତ୍କାର ଇନିଂସ ଖେଳିଥିଲେ। ଜବାବରେ, ଇଂଲଣ୍ଡର ପ୍ରଥମ ଇନିଂସ ୧୯୬ ରନରେ ଅଲଆଉଟ ହୋଇଯାଇଥିଲା। ଅଷ୍ଟ୍ରେଲିଆ ୪୯ ରନର ଲିଡ ନେଇ ତା’ର ଦ୍ୱିତୀୟ ଇନିଂସରେ ୧୦୪ ରନ କରିଥିଲା, ଫଳରେ ଇଂଲଣ୍ଡକୁ ଚତୁର୍ଥ ଇନିଂସରେ ଜିତିବା ପାଇଁ ୧୫୫ ରନ କରିବାକୁ ଥିଲା। କିନ୍ତୁ ଚତୁର୍ଥ ଇନିଂସରେ ଇଂଲଣ୍ଡ ଲକ୍ଷ୍ୟଠାରୁ ୪୫ ରନ ପଛରେ ରହିଲା।
