ଅହମଦାବାଦ,୨୪।୪: ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ଗୁଜରାଟର ସୁରଟର ବାସିନ୍ଦା ଶୈଲେଶ କାଲଥିଆଙ୍କ ସମେତ ୨୬ ଜଣ ପ୍ରାଣ ହରାଇଛନ୍ତି। ଏହି ଆକ୍ରମଣରେ ଗୁଜରାଟର ଅନ୍ୟ ଦୁଇ ଜଣ ବାସିନ୍ଦା, ଭାବନଗରର ଯତୀଶ ପରମାର ଏବଂ ତାଙ୍କ ପୁଅ ସ୍ମିତ ପରମାର ମଧ୍ୟ ପ୍ରାଣ ହରାଇଥିଲେ। ଗୁରୁବାର ତିନି ମୃତକଙ୍କୁ ସେମାନଙ୍କ ଜନ୍ମସ୍ଥାନରେ ଅନ୍ତିମ ସଂସ୍କାର କରାଯାଇଥିଲା। ଶୈଳେଶ କଳାଥିଆଙ୍କ ପତ୍ନୀ ଶୀତଲବେନ ସେଦିନର ହୃଦୟଥରା କାହାଣୀ ବର୍ଣ୍ଣନା କରିଛନ୍ତି।
ଶୀତଲବେନ କହିଥିଲେ, ଜଣେ ଆତଙ୍କବାଦୀ ପ୍ରଥମେ ଆମ ପାଖକୁ ଆସିଲେ ଏବଂ ତା’ପରେ ଆମେ ହିନ୍ଦୁ ବୋଲି ଜାଣିବା ପରେ, ସେ ମୋ ସ୍ବାମୀଙ୍କୁ ଗୁଳି କଲେ। ମୋ ସ୍ବାମୀଙ୍କ ପରି, ଅନ୍ୟ ହିନ୍ଦୁ ପୁରୁଷମାନଙ୍କୁ ମଧ୍ୟ ସେମାନଙ୍କ ପିଲାମାନଙ୍କ ସାମ୍ନାରେ ଗୁଳି କରାଯାଇଥିଲା। ସ୍ବାମୀଙ୍କୁ ଗୁଳି କରିବା ପରେ, ଆତଙ୍କବାଦୀ ହସୁଥିଲେ ଏବଂ ମୃତ୍ୟୁ ପର୍ଯ୍ୟନ୍ତ ସେଠାରୁ ଯାଇ ନ ଥିଲେ। ଶୈଳେଶଙ୍କ ପୁଅ ନକ୍ସ ସୁରତରେ ତାଙ୍କ ପିତାଙ୍କ ଶେଷକୃତ୍ୟ ସମ୍ପନ୍ନ କରିଥିଲେ। ନକ୍ସ କହିଥିଲେ, ଆମେ ଗୁଳି ଫୁଟିବାର ଶବ୍ଦ ଶୁଣିବା ମାତ୍ରେ ସମସ୍ତ ପର୍ଯ୍ୟଟକ ପହଲଗାମରେ ଲୁଚିବା ପାଇଁ ଦୌଡ଼ିବାକୁ ଲାଗିଲେ। ଶେଷରେ ୨ ଜଣ ଆତଙ୍କବାଦୀ ଆମକୁ ଧରିଲେ ଏବଂ ଆମ ସମସ୍ତଙ୍କୁ ଆମର ଧର୍ମ କହିବାକୁ କହିଲେ।
ନକ୍ସ ଆହୁରି କହିଛନ୍ତି, ଆତଙ୍କବାଦୀମାନେ ଲୋକମାନଙ୍କୁ ଦୁଇଟି ଗୋଷ୍ଠୀରେ ବିଭକ୍ତ କରିଥିଲେ, ହିନ୍ଦୁ ଏବଂ ମୁସଲମାନ। ତା’ପରେ, ସେମାନେ ମୋ ବାପାଙ୍କ ସମେତ ସମସ୍ତ ହିନ୍ଦୁ ପୁରୁଷଙ୍କୁ ଗୁଳି କରି ପଳାଇଗଲେ। ଆକ୍ରମଣ ସମୟରେ ସେହି ଅଞ୍ଚଳରେ ପ୍ରାୟ ୨୦ ରୁ ୩୦ ଜଣ ପର୍ଯ୍ୟଟକ ଥିଲେ। ମୁଁ ଭୟ କରୁଥିଲି ଯେ ମୋତେ ମଧ୍ୟ ଗୁଳି କରାଯିବ। ହିନ୍ଦୁମାନଙ୍କୁ ମୁସଲମାନମାନଙ୍କଠାରୁ ଅଲଗା କରିବା ପରେ, ଆତଙ୍କବାଦୀମାନେ ସେମାନଙ୍କୁ ‘କଲ୍ମା’ ପାଠ କରିବାକୁ କହିଥିଲେ। ଯେଉଁମାନେ ମୁସଲମାନମାନେ ଏହାକୁ ପଢିଥିଲେ, ସେମାନଙ୍କୁ ଦୂରେଇ ରଖାଯାଉଥିଲା। କିନ୍ତୁ ଯେଉଁମାନେ ପଢ଼ିପାରିଲେ ନାହିଁ ସେମାନଙ୍କୁ ହତ୍ୟା କରାଗଲ। ଶୈଳେଶ ତାଙ୍କ ପତ୍ନୀ ଶୀତଲବେନ, ପୁଅ ନକ୍ସ ଏବଂ ଝିଅ ନୀତିଙ୍କ ସହିତ ପହଲଗାମରେ ଛୁଟି କାଟୁଥିଲେ।
ସୂଚନାଯୋଗ୍ୟ, କିଛିଦିନର ନୀରବତା ପରେ ଜମ୍ମୁ-କଶ୍ମୀରରେ ପୁଣି ରକ୍ତମୁଖା ହୋଇଛନ୍ତି ଆତଙ୍କବାଦୀ। ପହଲଗାମ୍ ଜିଲାରେ ସେମାନେ ମଙ୍ଗଳବାର ଅପରାହ୍ନ ୩ଟାରେ ବଡ଼ଧରଣର ଆକ୍ରମଣ କରିଛନ୍ତି। ପ୍ରାକୃତିକ ଶୋଭାରାଜି ପାଇଁ ‘ମିନି ସୁଇଜରଲାଣ୍ଡ’ ଭାବେ ପରିଚିତ ଦକ୍ଷିଣ କଶ୍ମୀରର ମୁଖ୍ୟ ପର୍ଯ୍ୟଟନସ୍ଥଳ ବୈସରନ୍ରେ ପାକିସ୍ତାନୀ ଆତଙ୍କବାଦୀ ସଙ୍ଗଠନ ଲଶ୍କର-ଇ-ତୋଇବା (ଏଲ୍ଇଟି) ସଦସ୍ୟମାନେ ଅନୂ୍ୟନ ୫୦ ରାଉଣ୍ଡ ଗୁଳି ଚଳାଇଥିଲେ। ଏହି ଅତର୍କିତ ଆକ୍ରମଣରେ ୨ ଜଣ ବିଦେଶୀଙ୍କ ସମେତ ୨୬ ପର୍ଯ୍ୟଟକଙ୍କ ମୃତ୍ୟୁ ଘଟିଥିବାବେଳେ ଅନ୍ୟ କେତେଜଣ ଆହତ ହୋଇଥିଲେ।
