ନୂଆଦିଲ୍ଲୀ, ୪।୮ : ଭାରତ ୭୫ ତମ ସ୍ବାଧୀନତା ଦିବସ ପାଳନ କରିବାକୁ ଯାଉଛି। ଏହି ସମୟରେ ଇଣ୍ଟେଲିଜେନ୍ସ ବ୍ୟୁରୋ(ଆଇବି) ଦିଲ୍ଲୀ ପୋଲିସକୁ ଆତଙ୍କବାଦୀ ଆକ୍ରମଣ ଆଶଙ୍କା ସମ୍ପର୍କରେ ସତର୍କ ରହିବାକୁ କହିଛି। ଖବର ମୁତାବକ ବ୍ୟୁରୋ ଦ୍ୱାରା ୧୦ ପୃଷ୍ଠାର ରିପୋର୍ଟ ଜାରି କରାଯାଇଛି । ଯେଉଁଥିରେ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦ, ଲଶ୍କର-ଇ-ତୋଏବା ସହିତ ଉଦୟପୁର ଏବଂ ଅମରାବତୀ କାଣ୍ଡ ସମ୍ପର୍କରେ ମଧ୍ୟ ଉଲ୍ଲେଖ କରାଯାଇଛି।
ରିପୋର୍ଟ ମୁତାବକ, ଆଇବି ଏହାର ରିପୋର୍ଟରେ ଆତଙ୍କବାଦୀ ଆକ୍ରମଣ ଆଶଙ୍କା ବିଷୟରେ କହିଛି। ଏଥିସହ ଅଗଷ୍ଟ ୧୫ ପାଇଁ ଦିଲ୍ଲୀ ପୋଲିସକୁ ଲାଲ କିଲ୍ଲାରେ ପ୍ରବେଶ ପାଇଁ କଡା ନିୟମ ଲାଗୁ କରିବାକୁ କୁହାଯାଇଛି। ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ହତ୍ୟା ସମ୍ପର୍କରେ ମଧ୍ୟ ରିପୋର୍ଟରେ ଆଇବି ପକ୍ଷରୁ କୁହାଯାଇଛି। ନିକଟରେ ଦିଲ୍ଲୀ ପୋଲିସ ମଧ୍ୟ ସ୍ବାଧୀନତା ଦିବସରେ ଟ୍ରାଫିକ ସମ୍ପର୍କରେ ଏକ ଗାଇଡ଼ଲାଇନ ଜାରି କରିଥିଲା।
ଉଦୟପୁର ଏବଂ ଅମରାବତୀରେ ଘଟିଥିବା ଘଟଣାକୁ ଦୃଷ୍ଟିରେ ରଖି ଏଜେନ୍ସିମାନେ ପୋଲିସକୁ ଆତଙ୍କବାଦୀ ଗୋଷ୍ଠୀ ତଥା ଜନଗହଳି ପୂର୍ଣ୍ଣ ଅଞ୍ଚଳରେ ସେମାନଙ୍କ କାର୍ଯ୍ୟକଳାପ ପ୍ରତି ସଜାଗ ରହିବାକୁ କହିଛନ୍ତି। ରିପୋର୍ଟ ଅନୁଯାୟୀ, ଜୈଶ ଏବଂ ଲଶ୍କର ଆତଙ୍କବାଦୀଙ୍କୁ ସହାୟତା ଯୋଗାଇ ପାକିସ୍ତାନର ଆଇଏସଆଇ ଆତଙ୍କବାଦୀ ଆକ୍ରମଣ ପାଇଁ ଷଡ଼ଯନ୍ତ୍ର କରୁଥିବା ରିପୋର୍ଟରେ କୁହାଯାଇଛି। ବଡ ନେତା ତଥା ଗୁରୁତ୍ୱପୂର୍ଣ୍ଣ ସ୍ଥାନଗୁଡିକୁ ଟାର୍ଗେଟ କରିବାକୁ ଆତଙ୍କବାଦୀଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ଆଇବି ସୂଚନା ଦେଇଛି।
