ନାଗପୁର,୧।୩: ମହାରାଷ୍ଟ୍ରର ନାଗପୁର ଜିଲାରେ ରବିବାର ଏକ ଭୟଙ୍କର ଦୁର୍ଘଟଣା ଘଟିଛି। ନାଗପୁର ଜିଲାର କାଟୋଲ ତହସିଲରେ ଏକ ବିସ୍ଫୋରକ କାରଖାନାରେ ବିସ୍ଫୋରଣ ଘଟି ଅତି କମରେ ୧୫ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ଗୁରୁତର ଆହତ ହୋଇଛନ୍ତି। ପୋଲିସ କହିଛି ଯେ ବିସ୍ଫୋରଣରେ ୧୫ ଜଣଙ୍କର ମୃତ୍ୟୁ ହୋଇଛି।
ସୂଚନା ଅନୁଯାୟୀ, କାଟୋଲ ତହସିଲର ରାଉଲଗାଓଁରେ ଥିବା ଖଣି ଏବଂ ଶିଳ୍ପ ବିସ୍ଫୋରକ ଉତ୍ପାଦନକାରୀ କମ୍ପାନୀ SBL ଏନର୍ଜି ଲିମିଟେଡର କାରଖାନାରେ ବିସ୍ଫୋରଣ ଘଟିଛି। ସମ୍ବାଦ ସରବରାହ ସଂସ୍ଥା PTI SBL ଏନର୍ଜି ଲିମିଟେଡର ପ୍ରତିନିଧିମାନଙ୍କୁ ଉଦ୍ଧୃତ କରି କହିଛି ଯେ କମ୍ପାନୀର ଡେଟୋନେଟର ପ୍ୟାକିଂ ୟୁନିଟରେ ସକାଳ ୭ ରୁ ୭ଟା ୧୫ ମଧ୍ୟରେ ଏହି ଘଟଣା ଘଟିଛି।
ପୋଲିସ କହିଛି ଯେ ଆହତମାନଙ୍କୁ ତୁରନ୍ତ ନାଗପୁରର ଏକ ହସ୍ପିଟାଲରେ ଭର୍ତ୍ତି କରାଯାଇଛି। ନାଗପୁର ଗ୍ରାମାଞ୍ଚଳର ପୋଲିସ ଅଧିକ୍ଷକ ହର୍ଷ ପୋଦ୍ଦାର କହିଛନ୍ତି ଯେ SBL ଏନର୍ଜି ଲିମିଟେଡରେ ବିସ୍ଫୋରଣରେ ୧୫ଜଣଙ୍କର ମୃତ୍ୟୁ ହୋଇଛି ଏବଂ ୧୮ ଜଣ ଗୁରୁତର ଆହତ ହୋଇଛନ୍ତି। କମ୍ପାନୀର ଜଣେ ଅଧିକାରୀ କହିଛନ୍ତି ଯେ ଉଦ୍ଧାର କାର୍ଯ୍ୟ ଚାଲିଛି ଏବଂ ସେମାନେ ଖୁବ ଶୀଘ୍ର ଏକ ବିବୃତ୍ତି ଜାରି କରିବେ।
