ଅବୁଧାବୀ,୧୬।୧୨: ଆଇପିଏଲ୍ ୨୦୨୬ର ମିନି ନୀଲାମୀରେ ଭାରତୀୟ ଯୁବ ଖେଳାଳିମାନଙ୍କ ଉପରେ ଟଙ୍କା ବର୍ଷା ହୋଇଛି। ଏଥର ଅନେକ ଯୁବ ଖେଳାଳି ଉପରେ ଫ୍ରାଞ୍ଚାଇଜିଗୁଡ଼ିକ ବଡ଼ ବାଜି ଲଗାଇଛନ୍ତି। ପ୍ରଶାନ୍ତ ବୀର ଏବଂ କାର୍ତ୍ତିକ ଶର୍ମାଙ୍କୁ ୧୪.୨ କୋଟି ଟଙ୍କା ଲେଖାଏ ମିଳଥିବା ବେଳେ ଜମ୍ମୁ-କଶ୍ମୀରର ଦ୍ରୁତ ବୋଲର ଆକିବ ନବୀ ଡାର୍ ମଧ୍ୟ ବଡ଼ ଧନରାଶି ପାଇଛନ୍ତି। ଏହି ଯୁବ ଖେଳାଳିମାନଙ୍କ ମଧ୍ୟରେ ଆଉ ଜଣେ ନାମ ହେଉଛି ତେଜସ୍ବୀ ଦହିୟା, ଯାହାଙ୍କୁ କୋଲକାତା ନାଇଟ ରାଇଡର୍ସ (କେକେଆର୍) ନିଜ ଦଳରେ ସାମିଲ କରିଛି। ତେଜସ୍ବୀ ଦହିୟାଙ୍କ ବେସ୍ ପ୍ରାଇସ୍ ମାତ୍ର ୩୦ ଲକ୍ଷ ଟଙ୍କା ଥିଲା, କିନ୍ତୁ ନୀଲାମୀରେ ତାଙ୍କୁ ୧୦ ଗୁଣ ଅଧିକ ମୂଲ୍ୟ ମିଳିଛି।
କୋଲକାତା ନାଇଟ ରାଇଡର୍ସ ତେଜସ୍ବୀ ସିଂହ ଦହିୟାଙ୍କୁ ୩ କୋଟି ଟଙ୍କାର ବଡ଼ ମୂଲ୍ୟରେ କିଣିଛି। ମୁମ୍ବାଇ ଇଣ୍ଡିଆନ୍ସ ପ୍ରଥମେ ଏହି ଖେଳାଳି ଉପରେ ବାଜି ଲଗାଇଥିଲା। ପରେ କେକେଆର୍ ଏହି ଦୌଡ଼ରେ ପ୍ରବେଶ କରିଥିଲା। ୮୫ ଲକ୍ଷ ଟଙ୍କାର ବୋଲି ପାର୍ ହେବା ପରେ ରାଜସ୍ଥାନ ରୟାଲ୍ସ ମଧ୍ୟ ତାଙ୍କ ଉପରେ ବାଜି ଲଗାଇଥିଲା। ତଥାପି କେକେଆର୍ ଶେଷରେ ୩ କୋଟି ଟଙ୍କାର ବାଜି ଲଗାଇ ଏହି ଖେଳାଳିଙ୍କୁ ନିଜର କରିନେଇଛି।
ତେଜସ୍ବୀ ଦହିୟା ଦିଲ୍ଲୀର ଆକ୍ରମଣାତ୍ମକ ଉଇକେଟକିପର୍ ବ୍ୟାଟ୍ସମ୍ୟାନ। ଏହି ଖେଳାଳିଙ୍କ ଟି-୨୦ରେ ଔସତ ୫୬.୫ ରହିଛି। ସେ ଦିଲ୍ଲୀ ପାଇଁ ୪ଟି ଟି-୨୦ ଇନିଂସରେ୧୧୩ ରନ କରିଛନ୍ତି ଏବଂ ତାଙ୍କ ଷ୍ଟ୍ରାଇକ୍ ରେଟ ପାଖାପାଖି ୧୭୦ ରହିଥିଲା। ତେଜସ୍ବୀ ଦିଲ୍ଲୀ ପ୍ରିମିଅର୍ ଲିଗ୍ରେ ମାତ୍ର ୧୨ ବଲ୍ରେ ଅର୍ଦ୍ଧଶତକ ହାସଲ କରି ସମସ୍ତଙ୍କ ଧ୍ୟାନ ଆକର୍ଷଣ କରିଥିଲେ। ଏହା ସହ ଦିଲ୍ଲୀର ଏକ ଟୁର୍ନାମେଣ୍ଟରେ ସେ ୬ ବଲ୍ରେ ୬ ଛକା ମାରି ରେକର୍ଡ ଗଢ଼ିଥିଲେ। ଦିଲ୍ଲୀ ପ୍ରିମିଅର୍ ଲିଗ୍ରେ ତେଜସ୍ବୀ ଦହିୟା ୧୯୦ର ଷ୍ଟ୍ରାଇକ ରେଟ୍ରେ ୩୩୯ ରନ କରିଥିଲେ। ଏହି ଟୁର୍ନାମେଣ୍ଟରେ ସେ ଚୌକାଠାରୁ ଅଧିକ ଛକ୍କା ମାରିଥିଲେ। ଗତ ସିଜନ୍ରେ ସେ ୨୯ଟି ଛକା ଏବଂ ୨୦ଟି ଚୌକା ମାରିଥିଲେ।
View this post on Instagram
କୋଲକାତା ନାଇଟ ରାଇଡର୍ସ ତେଜସ୍ବୀ ଦହିୟା ବ୍ୟତୀତ ସ୍ପିନର ପ୍ରଶାନ୍ତ ସୋଲଙ୍କିଙ୍କୁ ୩୦ ଲକ୍ଷ ଟଙ୍କାରେ କିଣିଛି। କାର୍ତ୍ତିକ ତ୍ୟାଗୀଙ୍କୁ ମଧ୍ୟ କେକେଆର୍ ୩୦ ଲକ୍ଷ ଟଙ୍କାରେ ନିଜ ଦଳରେ ସାମିଲ କରିଛି। ଅନ୍ତର୍ଜାତୀୟ ଖେଳାଳିମାନଙ୍କ ମଧ୍ୟରେ ମଥୀଶା ପଥିରାନା, ଫିନ ଆଲେନ ଏବଂ କ୍ୟାମେରନ ଗ୍ରୀନ ଉପରେ କେକେଆର୍ ବଡ଼ ଦାଆଁ ଲଗାଇଛି। ଏହି ମିନି ନୀଲାମୀରେ ଯୁବ ପ୍ରତିଭାମାନଙ୍କର ଏକ ସ୍ବପ୍ନ ପୂରଣ ହୋଇଛି ଏବଂ ଆଗାମୀ ଆଇପିଏଲ ସିଜନ୍କୁ ଆହୁରି ରୋଚକ କରିଛି।
