ନୂଆଦିଲ୍ଲୀ,୬।୧୧: ବିହାରର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ସୁପ୍ରିମକୋର୍ଟଙ୍କଠାରୁ ଏକ ବଡ଼ ଆଶ୍ୱସ୍ତି ପାଇଛନ୍ତି। ଗୁଜରାଟୀ ଲୋକଙ୍କ ଉପରେ ଦେଇଥିବା ବିବାଦୀୟ ବିବୃତ୍ତି ସଂପର୍କକୁ ନେଇ ତାଙ୍କ ବିରୋଧରେ ହୋଇଥିବା ଅପରାଧିକ ମାନହାନୀ ଅଭିଯୋଗର କାର୍ଯ୍ୟାନୁଷ୍ଠାନ ସ୍ଥଗିତ ରଖାଯାଇଛି। ବର୍ତ୍ତମାନ କୋର୍ଟ ଏହି ମାମଲାର ଶୁଣାଣି କରିବେ ନାହିଁ। ଜାନୁୟାରୀ ୨୦୨୪ରେ ତେଜସ୍ବୀଙ୍କ ମାମଲାର ଶୁଣାଣି ପାଇଁ ଦୁଇ ବିଚାରପତି ଖଣ୍ଡପୀଠ ଆଦେଶ ଦେଇଛନ୍ତି।
ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ତାଙ୍କ ଓକିଲ ଅଜୟ ବିକ୍ରମ ସିଂଙ୍କ ଜରିଆରେ ମାମଲା ସ୍ଥାନାନ୍ତର କରିବାକୁ ଚାହୁଁଥିଲେ। ସର୍ବୋଚ୍ଚ ନ୍ୟାୟାଳୟ ନିକଟରେ ପହଞ୍ଚିବା ପରେ ଜାନୁୟାରୀରେ କୋର୍ଟ ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ସ୍ଥିର କରିଛନ୍ତି। ଯାଦବଙ୍କ ବିରୋଧରେ ଗୁଜରାଟ କୋର୍ଟରେ ଭାରତୀୟ ଦଣ୍ଡବିଧି ସଂହିତା (ଆଇପିସି)ର ଧାରା ୪୯୯ ଏବଂ ୫୦୦ଅନୁଯାୟୀ ଏକ ଅଭିଯୋଗ ଦାଖଲ କରାଯାଇଛି।
