ନୂଆଦିଲ୍ଲୀ,୧୬।୩: ଜମି ବଦଳରେ ଚାକିରି ଦୁର୍ନୀତି ମାମଲାରେ ଆରଜେଡି ନେତା ତଥା ବିବାହର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କୁ ଦିଲ୍ଲୀ ହାଇକୋର୍ଟରୁ ମଧ୍ୟ କୌଣସି ଆଶ୍ୱସ୍ତି ମିଳିନାହିଁ। ମାର୍ଚ୍ଚ ୨୫ରେ ତେଜସ୍ବୀଙ୍କୁ ସିବିଆଇ ସମ୍ମୁଖରେ ହାଜର ହେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ସିବିଆଇ କୋର୍ଟରେ କହିଛି ଯେ, ମାର୍ଚ୍ଚରେ ତେଜସ୍ବୀଙ୍କୁ ଗିରଫ କରାଯିବ ନାହିଁ।
ଜମି ବଦଳରେ ଚାକିରି ଦେବା ଦୁର୍ନୀତି ମାମଲାରେ ପଚରାଉଚରା ପାଇଁ ସିବିଆଇ ତେଜସ୍ବୀଙ୍କୁ ସମନ ଜାରି କରିଛି। ସିବିଆଇ ସମନ ଉପରେ ରୋକ ଲଗାଇବାକୁ ସେ ଦିଲ୍ଲୀ ହାଇକୋର୍ଟ ଯାଇଥିଲେ ତେଜସ୍ବୀ।
ଏହି ସ୍କାମ ମାମଲାରେ ଚଳିତ ମାସରେ ତେଜସ୍ବୀ ଯାଦବଙ୍କୁ ପଚରାଉଚରା ପାଇଁ ସିବିଆଇ ନୋଟିସ ଦେଇଥିଲା। ମାର୍ଚ୍ଚ ୧୪ରେ ତୃତୀୟ ଥର ପାଇଁ ସିବିଆଇର ପଚରାଉଚରାକୁ ଆସିନାହାଁନ୍ତି। ଏହାପୂର୍ବରୁ ମାର୍ଚ୍ଚ ୪ ଏବଂ ମାର୍ଚ୍ଚ ୧୧ରେ ତେଜସ୍ବୀ ପଚରାଉଚରା ପାଇଁ ଅଧିକାରୀଙ୍କ ନିକଟରେ ହାଜର ହୋଇ ନ ଥିଲେ, ଯାହା ପରେ ତାଙ୍କୁ ମାର୍ଚ୍ଚ ୧୪ ରେ ଡକାଯାଇଥିଲା। ସିବିଆଇର ସମନ ପାଇବା ପରେ ତେଜସୱୀ ଯାଦବ ଦିଲ୍ଲୀ ସିବିଆଇ କାର୍ଯ୍ୟାଳୟରେ ପଚରାଉଚରା ନ କରିବାକୁ ଅନୁରୋଧ କରିଥିଲେ। ସେ କହିଥିଲେ, ବର୍ତ୍ତମାନ ବିଧାନସଭା ଅଧିବେଶନ ଚାଲିଛି, ତେଣୁ ତାଙ୍କୁ ଏପ୍ରିଲ ୫ ପରେ ଡକାଯିବା ଉଚିତ୍।
ଏହାପୂର୍ବରୁ ଦିଲ୍ଲୀର ସ୍ପେଶାଲ ରାଉସ ଆଭେନ୍ୟୁ କୋର୍ଟ ଆରଜେଡି ନେତା ତଥା ପୂର୍ବତନ ରେଳମନ୍ତ୍ରୀ ଲାଲୁ ପ୍ରସାଦ ଯାଦବ, ସ୍ତ୍ରୀ ରାବ୍ରି ଦେବୀ ଏବଂ ଝିଅ ମିସା ଭାରତୀଙ୍କୁ ଜମି ବଦଳରେ ଚାକିରି ଦୁର୍ନୀତି ମାମଲାରେ ଜାମିନ ପ୍ରଦାନ କରିଥିଲେ। ମାର୍ଚ୍ଚ ୨୯ରେ ଅଧିକ ଶୁଣାଣି ପାଇଁ କୋର୍ଟ ଏହି ମାମଲା ତାଲିକାଭୁକ୍ତ କରିଥିଲେ।
