ନୂଆଦିଲ୍ଲୀ,୨୧।୨: ଦେଶର ସର୍ବବୃହତ୍ ବୈଦ୍ୟୁତିକ ଯାତ୍ରୀବାହୀ ଯାନ ନିର୍ମାତା ଟାଟା ମୋଟର୍ସ ଏବଂ ରାଇଡ୍ ଶେୟାରିଂ ପ୍ଲାଟଫର୍ମ କମ୍ପାନୀ ଉବର ସହ ସୋମବାର ଏକ ବାଣିଜି୍ୟକ ରାଜିନାମା ହୋଇଥିବା ଜଣାପଡିଛି। ଉକ୍ତ ରାଜିନାମା ଅନୁସାରେ ଟାଟା ମୋଟର୍ସ ଉବରକୁ ୨୫୦୦୦ ବୈଦ୍ୟୁତିକ ଯାନ (ଇଭି) ବା ଇଭି କାର୍ ଯୋଗାଇବ। ବିଶେଷକରି ଟାଟା ମୋଟର୍ସ ତା’ର ନୂଆ ଇଭି ମଡେଲ ‘ଏକ୍ସପ୍ରେସ-ଟି’ର ୨୫୦୦୦ୟୁନିଟ୍ ଉବରକୁ ଯୋଗାଇ ଦେବାକୁ ଯାଉଛି। ଏ ନେଇ ସୋମବାର ଉଭୟ ଟାଟା ମୋଟର୍ସ ଏବଂ ଉବର ପକ୍ଷରୁ ମିଳିତ ଭାବେ ସୂଚନା ଦିଆଯାଇଛି। ସେହିଭଳି ଉକ୍ତ ଡିଲକୁ ଇଭି ଯାନ କ୍ଷେତ୍ରରେ ଆଜି ପର୍ଯ୍ୟନ୍ତ ହୋଇଥିବା ସବୁଠୁ ବଡ଼ ଡିଲ୍ ବୋଲି କୁହାଯାଉଛି। ଏପରିକି ଉଭୟ କମ୍ପାନୀଙ୍କ ମଧ୍ୟରେ ହୋଇଥିବା ରାଜିନାମା ଅନୁଯାୟୀ ଉବର ଏହି ଇଭି କାରକୁ ଏହାର ପ୍ରିମିୟମ ସେବାରେ ନିୟୋଜିତ କରିବ। ସେହିପରି ପ୍ରାରମ୍ଭିକ ପର୍ଯ୍ୟାୟରେ ଉବର ଦିଲ୍ଲୀ ଏନସିଆର, ମୁମ୍ବାଇ, କୋଲକାତା, ଚେନ୍ନାଇ, ହାଇଦ୍ରାବାଦ, ବେଙ୍ଗାଲୁରୁ ଏବଂ ଅହମଦାବାଦ ଭଳି ସହରରେ ଉକ୍ତ ଇଭି କାର୍ ସେବା ଯୋଗାଇବ। ଏପରିକି ଟାଟା ମୋଟର୍ସ ପର୍ଯ୍ୟାୟକ୍ରମେ ଉବରକୁ ସମସ୍ତ ୨୫୦୦୦ ଯାନ ହସ୍ତାନ୍ତର କରିବ ବୋଲି ଜଣାପଡିଛି। ଯାହାକି ଚଳିତ ମାସରୁ ହିଁ ଆରମ୍ଭ ହେବ ବୋଲି ଜଣାଯାଇଛି। ଏ ସମ୍ପର୍କରେ ଟାଟା ମୋଟର୍ସର ପାସେଞ୍ଜର ଯାନ ଏବଂ ଟାଟା ପାସେଞ୍ଜର ମୋବିଲିଟିର ପରିଚାଳନା ନିର୍ଦ୍ଦେଶକ ଶୈଳେଶ ଚନ୍ଦ୍ରା କହିଛନ୍ତି, ଭାରତର ଏକ ପ୍ରମୁଖ ରାଇଡ୍ ଶେୟାରିଂ ପ୍ଲାଟଫର୍ମ ସହ ସହଭାଗିତାକୁ ନେଇ ଆମେ ବହୁତ ଖୁସି ଅଛୁ। ଏପରିକି ଉକ୍ତ ଡିଲ୍ ଗ୍ରାହକଙ୍କୁ ପରିବେଶ ଅନୁକୂଳ ଯାତ୍ରା ତଥା ସବୁଜ-ସ୍ବଚ୍ଛ ଯାତ୍ରା ପ୍ରଦାନ କରିବ। ଏହି ସହଭାଗିତା ଭବିଷ୍ୟତରେ ଇଭି ସେଗମେଣ୍ଟରେ ଏକ ବୈପ୍ଳବିକ ପରିବର୍ତ୍ତନ ଆଣିବ ବୋଲି ଆଶା କରାଯାଉଛି। ବିଶେଷ କରି ଭାରତୀୟ ବଜାରରେ ଆମର ସ୍ଥିତିକୁ ସୁଦୃଢ଼ କରିବାରେ ଏହା ବେଶ୍ ସହାୟକ ହେବ। ସେହିପରି ଉବର ଇଣ୍ଡିଆ ଏବଂ ଦକ୍ଷିଣ ଏସିଆର ଅଧ୍ୟକ୍ଷ ପ୍ରଭଜିତ ସିଂହ କହିଛନ୍ତି, ଉବର ଭାରତରେ ଶେୟାରିଂ ରାଇଡ୍ ଯୋଗାଇବା କ୍ଷେତ୍ରରେ ସ୍ଥାୟିତ୍ୱ ପାଇଁ ପ୍ରତିବଦ୍ଧ ରହିଛି। ଏପରିକି ଟାଟା ମୋଟର୍ସ ସହ ହୋଇଥିବା ବାଣିଜି୍ୟକ ସହଭାଗିତା ଏକ ପ୍ରମୁଖ ମାଇଲଖୁଣ୍ଟ ହେବ।
