ଢେଙ୍କାନାଳ,୭।୨(ରତନ ନାୟାର): ପୁରୀରୁ ଆସି ଢେଙ୍କାନାଳରେ ପହଞ୍ଚିଥିବା ମହାପ୍ରଭୁ ଶ୍ରୀଶ୍ରୀ ବଳଭଦ୍ରଙ୍କ ତାଳଧ୍ୱଜ ରଥ ଚକ ଏବଂ ଏକ ମୂର୍ତ୍ତି ଗୁଜ ମଙ୍ଗଳବାର ରାତି ୯ଟାରେ ସହରସ୍ଥିତ ବଳରାମ ମନ୍ଦିରରେ ସ୍ଥାନିତ ହୋଇଛି। ଯୁବରାଜ ଅମରଜ୍ୟୋତି ସିଂହଦେଓ ଏହାକୁ ପୂଜାର୍ଚ୍ଚନା କରିବା ପରେ ରଥ ଚକକୁ ମନ୍ଦିର ପରିସରରେ ସ୍ଥାନିତ କରାଯାଇଥିଲା।
ପ୍ରକାଶ ଯେ, ପୁରୀ ବିଶ୍ୱପ୍ରସିଦ୍ଧ ରଥଯାତ୍ରାର ୨୦୨୦ ମସିହାରେ ମହାପ୍ରଭୁ ବଳଭଦ୍ରଙ୍କ ତାଳଧ୍ୱଜ ରଥରେ ଲାଗିଥିବା ଏକ ଚକକୁ ଢେଙ୍କାନାଳକୁ ଅଣାଯାଇଛି। ପୁରୀରୁ ଅପରାହ୍ନ ୨ଟାରେ ଏହି ଚକକୁ ନେଇ ଏକ ସୁସଜ୍ଜିତ ଟ୍ରକ୍ ଢେଙ୍କାନାଳ ଅଭିମୁଖେ ଆସିଥିଲା। ଅପରାହ୍ନ ୫ଟାରେ ତାଳଧ୍ୱଜ ରଥ ଚକ ଢେଙ୍କାନାଳ ସହର ଉପକଣ୍ଠ କଲେଜ ବାଇପାସ୍ ଛକଠାରେ ପହଞ୍ଚିବା ପରେ ଏହାକୁ ବିପୁଳ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା। ସହସ୍ରାଧିକ ଶ୍ରଦ୍ଧାଳୁଙ୍କ ହରିବୋଲ, ହୁଳହୁଳିରେ ସମଗ୍ର ଅଞ୍ଚଳ ପ୍ରକମ୍ପିତ ହୋଇଉଠିଥିଲା। ବହୁ ସଂଖ୍ୟକ ମହିଳା ସଂକୀର୍ତ୍ତନ ମଣ୍ଡଳୀ ଯୋଗଦେଇ ହରିନାମ ପରିବେଷଣ କରିଥିଲେ। ଘଟଣାସ୍ଥଳରେ ଜିଲାପାଳ ମନୋରଞ୍ଜନ ମଲ୍ଲିକ, ଜିଲା ଦେବୋତ୍ତର ଅଧିକାରୀ ତଥା ଢେଙ୍କାନାଳ ଉପଜିଲାପାଳ ସପନ କୁମାର ନନ୍ଦ, ଯୁବରାଜ ଅମରଜ୍ୟୋତି ସିଂହଦେଓ, ପୌର ଉପାଧ୍ୟକ୍ଷ ପ୍ରକାଶଚନ୍ଦ୍ର କୁଅଁର, ଜିଲା ସଂସ୍କୃତି ଅଧିକାରୀ ସନ୍ତୋଷ କୁମାର ଶତପଥୀ ପ୍ରମୁଖ ତାଳଧ୍ୱଜ ରଥ ଚକକୁ ସ୍ବାଗତ କରିବା ସହିତ ପୂଜାର୍ଚ୍ଚନା କରିଥିଲେ। ପୁରୀରୁ ରଥଚକ ସହ ଦେବୋତ୍ତର ନିରୀକ୍ଷକ ପ୍ରଦ୍ୟୁମ୍ନ ତ୍ରିପାଠୀ, ଲୋକକଳା ସଂଘ ଉପସଭାପତି ଅବନୀ ମିଶ୍ର, ନାଟ୍ୟକାର ଶତ୍ରୁଘ୍ନ ମାଟି, ସାମାଜିକ କର୍ମୀ ରାଜ କିଶୋର ବେହେରା ପ୍ରମୁଖ ଆସିଥିଲେ। କଲେଜ ବାଇପାସ ଠାରୁ ତାଳଧ୍ୱଜ ରଥ ଚକକୁ ବିରାଟ ଶୋଭାଯାତ୍ରାରେ କୁଞ୍ଜକାନ୍ତ ଓ ଗୁଡିଆନାଳୀ ଛକଦେଇ ବସ୍ଷ୍ଟାଣ୍ଡ, ପୂର୍ତ୍ତ ବିଭାଗ କାର୍ଯ୍ୟାଳୟ ସମ୍ମୁଖ ରାସ୍ତା ଦେଇ ମହାବୀର ବଜାରକୁ ଅଣାଯାଇଥିଲା। ସେଠାରୁ ଲକ୍ଷ୍ମୀବଜାର, ଜବାହାରଚୌକ, ମୀନାବଜାର, କାଞ୍ଚନ ବଜାର, ଆନନ୍ଦ ବଜାର, ବାଜିଚୌକ, ଶାସନ ଛକ ଦେଇ ଜଗନ୍ନାଥ ରୋଡରେ ଆସି ଗଣେଶ ବଜାରରେ ପହଞ୍ଚିଥିଲା। ପରେ ରଥଗଡ଼ା, କୈବଲ୍ୟ ବଜାର ଦେଇ ପୂରା ସହର ପରିକ୍ରମା କରାଯାଇ ଶ୍ରୀଶ୍ରୀ ସିଦ୍ଧ ବଳରାମ ମନ୍ଦିରକୁ ଅଣାଯାଇଥିଲା। ସେଠାରେ ରାତି ୯ଟାରେ ପୂଜାର୍ଚ୍ଚନା ସମାପ୍ତ ହେବା ପରେ ରଥ ଚକକୁ ମନ୍ଦିର ପରିସରରେ ଅବସ୍ଥାପିତ କରାଯାଇଥିଲା। ଶୋଭାଯାତ୍ରା ବେଳେ ଜୟ ଜଗନ୍ନାଥ, ଜୟ ବଳରାମ ଧ୍ୱନିରେ ସହରରେ ଭକ୍ତିମୟ ପରିବେଶ ସୃଷ୍ଟି ହୋଇଥିଲା। ସହରର ବିଭିନ୍ନ ସ୍ଥାନରେ ବିଭିନ୍ନ ବଜାର କମିଟି, ସ୍ବୟଂ ସହାୟକ ଗୋଷ୍ଠୀ ଓ ଅନୁଷ୍ଠାନଗୁଡ଼ିକ ପକ୍ଷରୁ ତାଳଧ୍ୱଜ ରଥ ଚକକୁ ଭବ୍ୟ ସ୍ବାଗତ ପ୍ରଦାନ କରାଯାଇଥିଲା।
