ଦାମସକସ,୮।୧୨: ସିରିଆର ବିଦ୍ରୋହୀମାନେ ପୁଣି ଥରେ ସରକାରଙ୍କୁ ଅସୁବିଧାରେ ପକାଇବା ଆରମ୍ଭ କରିଛନ୍ତି। ରାଷ୍ଟ୍ରପତି ବଶର ଅଲ-ଅସଦ ଦେଶ ଛାଡିଥିବା ଖବର ରହିଛି। ସମସ୍ତ ଘଟଣାକ୍ରମ ହେତୁ ବର୍ତ୍ତମାନ ଇସ୍ରାଏଲ ମଧ୍ୟ ଭୟଭୀତ ଅନୁଭବ କରୁଛନ୍ତି। ଏକ ଭୟ ରହିଛି ଯେ ଲେବାନନ ଏବଂ ଗାଜା ପରେ ବର୍ତ୍ତମାନ ସିରିଆରୁ ମଧ୍ୟ ଆକ୍ରମଣ ହୋଇପାରେ। ଇସ୍ରାଏଲ ଏବଂ ସିରିଆ ମଧ୍ୟରେ ବଢୁଥିବା ତିକ୍ତତାକୁ ନେଇ ଇସ୍ରାଏଲର ବୈଦେଶିକ ମନ୍ତ୍ରୀ ଗିଦିୟନ ସାର ଉଦବେଗ ପ୍ରକାଶ କରିଛନ୍ତି। ସୂଚନାଯୋଗ୍ୟ, ସିରିଆ ସଶସ୍ତ୍ର ବାହିନୀ ଗୋଲାନ ହାଇଟ୍ସ ଅଞ୍ଚଳର ବଫର୍ ଜୋନରେ ପ୍ରବେଶ କରିଛି । ମିଳିତ ଜାତିସଂଘର ପର୍ଯ୍ୟବେକ୍ଷକଙ୍କୁ ସେମାନେ ଆକ୍ରମଣ କରିଛନ୍ତି। ଏହି କାରଣରୁ, ଗୋଲାନ ହାଇଟ୍ସରେ ଉପସ୍ଥିତ ଥିବା ଲୋକମାନଙ୍କ ପାଇଁ ଇସ୍ରାଏଲ ଚିନ୍ତିତ।
ଇସ୍ରାଏଲର ବୈଦେଶିକ ମନ୍ତ୍ରୀ ଏକ୍ସରେ ପୋଷ୍ଟ କରି ଚିନ୍ତା ପ୍ରକଟ କରିଛନ୍ତି। ସେ ଏକ୍ସରେ ଲେଖିଛନ୍ତି- ଗତ ୨୪ଘଣ୍ଟା ମଧ୍ୟରେ ସଶସ୍ତ୍ର ବାହିନୀ ଇସ୍ରାଏଲ ସହ ଅଂଶୀଦାର ହୋଇଥିବା ସୀମାର ବଫର୍ ଜୋନାର ପ୍ରବେଶ କରିଛି । ଜାତିସଂଘର ପର୍ଯ୍ୟବେକ୍ଷକଙ୍କୁ ଆକ୍ରମଣ କରାଯାଉଛି। ୧୯୭୪ରେ ଇସ୍ରାଏଲ ଏବଂ ସିରିଆ ମଧ୍ୟରେ ହୋଇଥିବା ଚୁକ୍ତି ଭଙ୍ଗ ହୋଇପାରେ ବୋଲି ଇସ୍ରାଏଲ ଭୟ କରିଛି। ଗୋଲାନ ହାଇଟ୍ସରେ ରହୁଥିବା ଇସ୍ରାଏଲ ନାଗରିକଙ୍କ ସୁରକ୍ଷା ପାଇଁ ଚିନ୍ତା ଅଛି। ସିରିଆର ଆଭ୍ୟନ୍ତରୀଣ ବିବାଦରେ ଇସ୍ରାଏଲ ହସ୍ତକ୍ଷେପ କରିବ ନାହିଁ। ତେବେ ଇସ୍ରାଏଲ ସେନା ମୁଖ୍ୟ ଲେଫ୍ଟନାଣ୍ଟ ଜେନେରାଲ ହରଜୀ ହାଲେଭି କହିଛନ୍ତି ଯେ ଇସ୍ରାଏଲ ପ୍ରତିରକ୍ଷା ବାହିନୀ ଯେକୌଣସି ପରିସ୍ଥିତି ପାଇଁ ପ୍ରସ୍ତୁତ। ଆମେ ପରିସ୍ଥିତି ଉପରେ ନଜର ରଖିଛୁ।
