ବରଗଡ଼,୨୨।୧୧(ପ୍ରେମାନନ୍ଦ ଖମାରୀ): ବରଗଡ଼ ଟାଉନ ଥାନା ଅଧୀନ ସାହୁଟିକ୍ରା ଅଞ୍ଚଳରେ ମଙ୍ଗଳବାର ଏକ ଅଭାବନୀୟ ଘଟଣା ଘଟିଛି। ମୋବାଇଲ ଚୋର ସନ୍ଦେହରେ ସ୍ଥାନୀୟ ଉତ୍ତ୍ୟକ୍ତ ଲୋକମାନେ ଠେଙ୍ଗା, ବାଡ଼ି ଆଦି ମାରଣାସ୍ତ୍ରରେ ପିଟି ପିଟି ୨ଜଣ ଯୁବକଙ୍କୁ ହତ୍ୟା କରିଛନ୍ତି। ମୃତକ ଦ୍ୱୟ ହେଲେ ବରଗଡ଼ ଥାନା ପଣ୍ଡରୀପଥର ନିବାସୀ ବିଜୟ ବାଗ(୨୦) ଏବଂ ବିକୁ ଜାଲ(୨୨)। ଉଭୟଙ୍କ ମୃତଦେହକୁ ବରଗଡ଼ ଜିଲା ମୁଖ୍ୟ ଡାକ୍ତରଖାନା ଶବ ସଂରକ୍ଷଣ ଗୃହରେ ରଖାଯାଇଛି। ଏହି ଘଟଣାରେ ଅନ୍ୟ ଜଣେ ସୁରଜ କର୍ମୀ (୨୨) ଗୁରୁତର ହୋଇଛନ୍ତି। ତାଙ୍କୁ ବରଗଡ଼ ଜିଲା ମୁଖ୍ୟ ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ବୁର୍ଲାସ୍ଥିତ ଭିମ୍ସାରକୁ ସ୍ଥାନାନ୍ତର କରାଯାଇଛି। ତାଙ୍କ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ରହିଛି। ସେହିପରି ମୃତାହତଙ୍କ ବାଇକ୍କୁ ମଧ୍ୟ ଉତ୍ତ୍ୟକ୍ତ ଲୋକେ ପୋଡ଼ାଜଳା କରିଥିବା ସୂଚନା ମିଳିଛି। ଚୋରି ସନ୍ଦେହରେ ଲୋକେ ଉତ୍ତେଜିତ ହୋଇ ଏଭଳି କାଣ୍ଡ ଭିଆଇଥିବା ସାଧାରଣରେ ଆଲୋଚନା ହେଉଛି। ଅନ୍ୟପକ୍ଷେ ଦିନ ଦ୍ୱିପ୍ରହରରେ ବିଚ୍ରାସ୍ତାରେ ଲୋକେ ଯେଭଳି ଆଇନକୁ ହାତକୁ ନେଇ ୨ଜଣଙ୍କୁ ପିଟି ପିଟି ହତ୍ୟା କଲେ, ସେଥିରୁ ଜିଲାର ଆଇନ ଶୃଙ୍ଖଳା ପରିସ୍ଥିତି ପଦାରେ ପଡ଼ିଯାଇଛି । ଏହି ଘଟଣା ଜିଲାବାସୀଙ୍କୁ ସ୍ତବ୍ଧ କରିଛି ।
ପ୍ରକାଶ ଯେ, ମଙ୍ଗଳବାର ଅପରାହ୍ନ ପ୍ରାୟ ୨ଟା ସମୟରେ ସାହୁଟିକ୍ରା-ଧାଙ୍ଗେର ରାସ୍ତାରେ ସ୍ଥାନୀୟ କେତେକ ଲୋକ ଚୋର ସନ୍ଦେହ କରି ୩ଜଣ ଯୁବକଙ୍କୁ ଗୋଡ଼ାଇ ଗୋଡ଼ାଇ ଠେଙ୍ଗାରେ ଆକ୍ରମଣ କରୁଥିବା ଦେଖିବାକୁ ମିଳିଥିଲା। ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ବା ବେଳକୁ ଆକ୍ରମଣରେ ଉକ୍ତ ଯୁବକମାନେ ଲହୁଲୁହାଣ ହୋଇସାରିଥିଲେ। ପୋଲିସ ସେମାନଙ୍କୁ ଉଦ୍ଧାର କରି ବରଗଡ଼ ସହରାଞ୍ଚଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲା। ସେଠାରେ ଡାକ୍ତରମାନେ ବିଜୟଙ୍କୁ ମୃତ ଘୋଷଣା କରିଥିଲେ। ସେହିପରି ବରଗଡ଼ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ବିକୁଙ୍କ ମୃତ୍ୟୁ ହୋଇଥିଲା। ଏ ନେଇ ବରଗଡ଼ ଗ୍ରାମାଞ୍ଚଳ ଥାନା ଆଇଆଇସି ଇସମାଇଲ ଏକ୍କାଙ୍କୁ ପଚାରିବାରୁ ଏହାର ତଦନ୍ତ ଚାଲିଛି ବୋଲି କହିଥିଲେ। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ବରଗଡ଼ ସାହୁଟିକ୍ରା-ଧାଙ୍ଗେର ରାସ୍ତାରେ ଗତ କିଛିଦିନ ହେଲା ଲୁଟ୍ପାଟ୍ ବଢ଼ିଛି। ମଙ୍ଗଳବାର ଲୋକମାନେ ମୃତାହତଙ୍କ ସମେତ ୪ଜଣଙ୍କୁ ଚୋର ସନ୍ଦେହରେ ଧରିବାକୁ ଗୋଡ଼ାଇଥିଲେ। ତେବେ ଉକ୍ତ ମୃତାହତ ୩ଜଣ ଲୋକଙ୍କ ହାବୁଡ଼ରେ ପଡ଼ିଥିବା ବେଳେ ଅନ୍ୟ ଜଣେ ଖସିଯିବାରେ ସକ୍ଷମ ହୋଇଥିଲେ।
