ନୂଆଦିଲ୍ଲୀ,୨୩।୯: ପେଗାସସ୍ ମାମଲାର ଯାଞ୍ଚ୍ ପାଇଁ ସୁପ୍ରିମ୍କୋର୍ଟଙ୍କ ଦ୍ୱାରା ବିଶେଷଜ୍ଞ କମିଟି ଗଠନ କରାଯିବ। ଏନେଇ ଶୀର୍ଷ କୋର୍ଟଙ୍କ ପକ୍ଷରୁ ସଙ୍କେତ ଦିଆଯାଇଛି। କମିଟିର ଗଠନ ସମ୍ପର୍କିତ ଆଦେଶ ଆସନ୍ତା ସପ୍ତାହରେ ଆସିବାର ସମ୍ଭାବନା ରହିଛି। କେତେକ ବିଶେଷଜ୍ଞ ବ୍ୟକ୍ତିଗତ କାରଣରୁ କମିଟିରେ ସାମିଲ ହେବାକୁ ଚାହୁଁ ନ ଥିବାରୁ ଆଦେଶ ଜାରି ପ୍ରକିୟା ବିଳମ୍ବ ହେଉଥିବା ପ୍ରଧାନ ବିଚାରପତି ଏନ୍.ଭି. ରମନା କହିଛନ୍ତି।
ପେଗାସସ୍ ଗୁପ୍ତଚରୀ ମାମଲାରେ ସେପ୍ଟେମ୍ବର ୧୩ରେ ସବୋର୍ଚ୍ଚ ନ୍ୟାୟାଳୟ ଆଦେଶ ସଂରକ୍ଷିତ ରଖିଥିଲେ। ଶୁଣାଣି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ବିଶେଷଜ୍ଞମାନଙ୍କର ଏକ ନିରପେକ୍ଷ କମିଟି ଗଠନ ଲାଗି ପ୍ରସ୍ତାବ ଦିଆଯାଇଥିଲା। କମିଟି କୋର୍ଟର ତଦାରଖ ଦ୍ୱାରା କାର୍ଯ୍ୟ କରି ରିପୋର୍ଟ ପ୍ରଦାନ କରିବେ।
ତେବେ ଆବେଦନକାରୀଙ୍କ ପକ୍ଷରୁ ଏହାର ବିରୋଧ କରାଯାଇଥିଲା। ଆବେଦନକାରୀ କୋର୍ଟ କମିଟି ଗଠନ କରୁନ୍ତୁ ବୋଲି ଦାବି କରିଥିଲେ। ଆଇନଜୀବୀ ସି.ୟୁ .ସିଂ କହିଛନ୍ତି ଯେ, କୋର୍ଟ କମିଟି ଗଠନ ଉପରେ ଚିନ୍ତା କରୁଛନ୍ତି। ମାମଲାର ଶୁଣାଣି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ବିସ୍ତୃତ ସତ୍ୟପାଠ ଦାଖଲ କରିବାକୁ ମନା କରାଯାଇଥିଲା।
