ଭବାନୀପାଟଣା,୧।୬(ସ୍ବ.ପ୍ର.): କଳାହାଣ୍ଡି ଜିଲା ଜୁନାଗଡ଼ ସମନ୍ବିତ ଶିଶୁ ବିକାଶ ସେବା ପ୍ରକଳ୍ପ କାର୍ଯ୍ୟାଳୟ (ଆଇସିଡିଏସ)ରେ ଦୁର୍ନୀତିର ଗନ୍ଧ ଏବେ ବାରି ହେଉଛି। ବର୍ତ୍ତମାନ ଚାଉଳ ଯୋଗାଣକାରୀ ସଂସ୍ଥା ନିଷ୍ପାପ ଶିଶୁଙ୍କ ଜୀବନ ପ୍ରତି ଖେଳ ଖେଳୁଛନ୍ତି। ଅଙ୍ଗନୱାଡି କେନ୍ଦ୍ରକୁ ଯୋଗାଣ ହେଉଥିବା ଚାଉଳରେ ବାଲି, ଗୋଡି, ମାଟି ମିଶାଇ ନିଜେ ଅଖାବୋରାକୁ ହାତରେ ସିଲେଇ କେନ୍ଦ୍ରକୁ ଯୋଗାଣ କରାଯାଉଥିବା ନେଇ ଖୋଦ ଅଙ୍ଗନୱାଡି କର୍ମୀ ଅଭିଯୋଗ କରିଛନ୍ତି। ଅନ୍ୟପକ୍ଷରେ କେନ୍ଦ୍ରକୁ ୩ରୁ ୬ ବର୍ଷର ଶିଶୁକୁ ଯୋଗାଣ ହେଉଥିବା ଚାଉଳ ମଧ୍ୟ ବାଟମାରଣା ହେଉଛି। ସମ୍ପୃକ୍ତ ଯୋଗାଣକାରୀ ସଂସ୍ଥା ଚାଉଳ ଯୋଗାଣ କରୁ ନ ଥିବା ନେଇ ବିଭାଗୀୟ ଅଧିକାରୀମାନେ ଅଗତ ଥିଲେ ସୁଦ୍ଧା ମଧୁଚନ୍ଦ୍ରିକା ଯୋଗୁ ଚୁପ ରହୁଛନ୍ତି।
ଜୁନାଗଡ଼ ବ୍ଲକ ମାଲିଗୁଡା ସେଖପଡାରେ ଥିବା ମିନିଅଙ୍ଗନୱାଡି କେନ୍ଦ୍ରରେ ଗତ କିଛି ଦିନ ତଳେ ୫ ବସ୍ତା ଚାଉଳ ଯୋଗାଣ ହୋଇଥିଲା। ଏହି ଅଖାବସ୍ତାରେ ଥିବା ଚାଉଳ କେଉଁଠି ମଧ୍ୟ ୫୦ କେଜି ଚାଉଳ ନ ଥିଲା। କେଉଁ ବସ୍ତାରେ ୩୫ କେଜି ତ ଆଉ କେଉଁଟି ୪୦ କେଜି ରହିଥିଲା। ଅନ୍ୟ କିଛି ବସ୍ତା ଚାଉଳ ସଫା ଥିବା ବେଳେ ଆଉ ୨ଟି ବସ୍ତା ଚାଉଳରେ ବାଲି, ଗୋଡି, ମାଟି ମିଶିଥିଲା। ଏହାକୁ ନେଇ ଅଭିଭାବକଙ୍କ ମଧ୍ୟରେ ଉଦବେଗ ପ୍ରକାଶ ପାଇଛି। ଜୁନାଗଡ଼ ଆଇସିଡିଏସ ଅଧୀନ ୧୦ଟି ସେକ୍ଟର ଅଛି। ଏହି ସେକ୍ଟର ଅଧୀନରେ ଗ୍ରାମାଞ୍ଚଳର ଓ ସହରାଞ୍ଚଳ ମିଶି ୨୪୮ଟି ଅଙ୍ଗନୱାଡି କେନ୍ଦ୍ର ଅଛି। ୨୪୮ଟି କେନ୍ଦ୍ରରେ ୧୦ ହଜାର ୩୧୩ଜଣ ୩ରୁ ୬ ବର୍ଷର ଶିଶୁଙ୍କୁ ଗରମ ରନ୍ଧାଖାଦ୍ୟ ଦିଆଯାଉଛି। ଜୁନାଗଡ଼ ଆଇସିଡିଏସ୍ ଅଧୀନରେ ଥିବା ଅଙ୍ଗନୱାଡି କେନ୍ଦ୍ରକୁ ନବରଙ୍ଗପୁରର ଜିଲାର ଏକ ସଂସ୍ଥା ଚାଉଳ ଯୋଗାଣ କରିଥାଏ। ଚାଉଳ ଯୋଗାଣକାରୀ ସଂସ୍ଥା ବର୍ଷକୁ ୪ଥର ଚାଉଳ ଯୋଗାଉଥିବା ବେଳେ ପ୍ରତି ୩ ମାସରେ ଥରେ ସମ୍ପୃକ୍ତ ଯୋଗାଣକାରୀ ସଂସ୍ଥା ଅଙ୍ଗନୱାଡି କେନ୍ଦ୍ରକୁ ଚାଉଳ ଯୋଗାଣ କରିଥାଏ। ଏଥିରେ ପ୍ରଥମେ ଏପ୍ରିଲରୁ ଜୁନ, ଦ୍ୱିତୀୟରେ ଜୁଲାଇରୁ ସେପ୍ଟେମ୍ବର, ତୃତୀୟରେ ଅକ୍ଟୋବର ରୁ ଡିସେମ୍ବର ଓ ଚତୁର୍ଥରେ ଜାନୁୟାରୀରୁ ମାର୍ଚ୍ଚ ପର୍ଯ୍ୟନ୍ତ ଚାଉଳ ଯୋଗାଣ ହୋଇଥାଏ। ଜୁନାଗଡ଼ ଆଇସିଡିଏସ ଅଧୀନରେ ୧୦ ହଜାର ୧୧୩ ଜଣ ୩ରୁ ୬ ବର୍ଷର ଶିଶୁ ରନ୍ଧା ଖାଦ୍ୟ ଖାଇଥାନ୍ତି। ପ୍ରତିଦିନ ଜଣେ ଶିଶୁଙ୍କୁ ୮୦ ଗ୍ରାମ ହିସାବରେ ମାସକୁ ୨ କେଜି ଚାଉଳ ଦିଆଯାଇଥାଏ। ଜଣେ ଶିଶୁ ପିଛା ବର୍ଷକୁ ୨୪ କେଜି ହିସାବରେ୧୦ ହଜାର ୩୧୩ ଶିଶୁଙ୍କୁ ପ୍ରତିବର୍ଷ ୨ ହଜାର ୪୭୫ କୁଇଣ୍ଟାଲ ୨ କେଜି ଚାଉଳ ଯୋଗାଣ ହୋଇଥଏ। ଗୋଟିଏ ଚାଉଳ ଭର୍ତ୍ତି ଅଖାବୋରାରେ ୫୦ କେଜି ଚାଉଳ ରହିଥାଏ। ହେଲେ ଯୋଗାଣକାରୀ ସଂସ୍ଥା ଓ ଆଇସିଡିଏସ ମଧୁଚନ୍ଦ୍ରିକା ଯୋଗୁ ୫୦ କେଜି ଚାଉଳ ଅଙ୍ଗନୱାଡି କେନ୍ଦ୍ରକୁ ଗଲେ ତାହା କେତେବେଳେ ୩୫ କେଜି ତ ଆଉ କେତେବେଳେ ୪୦ କେଜି ହୋଇଥାଏ। ପ୍ରତି ବସ୍ତାରୁ ୧୦ରୁ ୧୫ କେଜି ଚାଉଳ କମ୍ ରହିଥାଏ। କମ ଚାଉଳ ଯୋଗାଣ ଯୋଗୁ କେନ୍ଦ୍ରରେ ଶିଶୁମାନଙ୍କୁ ଅନେକ ସମୟରେ ରନ୍ଧାଖାଦ୍ୟ ବନ୍ଦ କରି ଦିଆଯାଏ। କିଛି ଅଙ୍ଗନୱାଡି କର୍ମୀ ଚାଉଳ ମିଳିବା ଆଶାରେ ଉଦ୍ଧାରରେ ଚାଉଳ ଆଣି ଶିଶୁମାନଙ୍କୁ ଖାଇବାକୁ ଦେଇଥାନ୍ତି। ପରେ ଯଦି ଅଧିକାରୀମାନଙ୍କୁ ଏ ନେଇ ଅଭିଯୋଗ କଲେ ତାଙ୍କର ନାଲି ଆଖିର ଶିକାର ମଧ୍ୟ ହେଉଥିବା ଅଭିଯୋଗ ହେଉଛି। ଏହା ଉପରେ ଏକ ଭିଜିଲାନ୍ସସ୍ତରୀୟ ତଦନ୍ତ କରାଗଲେ ବହୁ ରହସ୍ୟ ଉନ୍ମୋଚିତ ହେବ ବୋଲି ସାଧାରଣରେ ଦାବି ହୋଇଛି। ଏ ନେଇ ଜୁନାଗଡ଼ ସିଡ଼ିପିଓ ଶୈଳଜା ଦାଶଙ୍କୁ ପଚାରିବାରୁ ମୁଁ ନୂଆରେ ଆସିଛି କ’ଣ ହୋଇଛି ବୁଝୁଛି ବୋଲି କହିଥିଲେ।
