ନୂଆଦିଲ୍ଲୀ,୧୫ା୪: ଅବକାରୀ ଦୁର୍ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ସିବିଆଇ ସମନ ଜାରି ପରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଏବଂ ଏନ୍ଫୋର୍ସମେଣ୍ଟ ଡାଇରେକ୍ଟୋରେଟ(ଇଡି)କୁ ସେ ସମାଲୋଚନା କରିଛନ୍ତି। କେଜ୍ରିଓ୍ବାଲ କହିଛନ୍ତି, ଅନୁସନ୍ଧାନକାରୀ ସଂସ୍ଥା ଆଫିଡାଭିଟ୍ରେ ମିଥ୍ୟା କହିଛି। ଏପରିକି ମନୀଷ ସିସୋଡିଆଙ୍କ ନାମରେ ମଧ୍ୟ ମିଥ୍ୟା ମାମଲାରେ ଅଭିଯୋଗ କରାଯାଇଥିବା କେଜ୍ରିଓ୍ବାଲ କହିଛନ୍ତି।
ସୂଚନାଯୋଗ୍ୟ, ସିବିଆଇ କେଜ୍ରିଓ୍ବାଲଙ୍କୁ ୧୬ ତାରିଖ ପୂର୍ବାହ୍ନ ୧୧ଟାରେ ତଦନ୍ତକାରୀ ଟିମ୍ ଆଗରେ ହାଜର ହୋଇ ସମନର ଜବାବ ରଖିବାକୁ କୁହାଯାଇଛି। ଏହି ମାମଲାରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ଗତ ଫେବୃୟାରୀରେ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ଗିରଫ କରିଥିଲା। ସିବିଆଇକୁ କେତେକ ନୂଆ ତଥ୍ୟ ପ୍ରମାଣ ମିଳିବା ପରେ ଜେରା ପାଇଁ ମୁଖ୍ୟମନ୍ତ୍ରୀଙ୍କୁ ଡକାଯାଇଛି।
ନିର୍ଦ୍ଦିଷ୍ଟ କେତେଜଣ ମଦ ଡିଲରଙ୍କୁ ବ୍ୟବସାୟ ପାଇଁ ଲାଇସେନ୍ସ ପ୍ରଦାନ ନିମନ୍ତେ ଦିଲ୍ଲୀ ସରକାର ଅବକାରୀ ନୀତି ୨୦୨୧-୨୨ କାର୍ଯ୍ୟକାରୀ କରିଥିବା ଅଭିଯୋଗ ହୋଇଥିଲା। ଏଥିରେ ବିପୁଳ ଲାଞ୍ଚ କରବାର ହୋଇଥିଲା। ଏପରି ଅଭିଯୋଗକୁ ଏଏପି ଖଣ୍ଡନ କରିବା ସହ ଉକ୍ତ ନୀତିକୁ ପ୍ରତ୍ୟାହାର କରିନେଇଥିଲା।
