ଚତରା,୩।୪ : ଝାଡଖଣ୍ଡର ଚତରା ଜିଲାରେ ସୋମବାର ଏକ ଏନକାଉଣ୍ଟରରେ ସୁରକ୍ଷା ବାହିନୀ ପାଞ୍ଚ ଜଣ ମାଓବାଦୀଙ୍କ ମୃତ୍ୟୁ ଘଟିଛି। ସେମାନଙ୍କ ମଧ୍ୟରୁ ଦୁଇ ଜଣଙ୍କ ଉପରେ ୨୫ ଲକ୍ଷ ଟଙ୍କା ପୁରସ୍କାର ଥିବାବେଳେ ତିନିଜଣଙ୍କ ଉପରେ ପ୍ରତ୍ୟେକ ପାଞ୍ଚ ଲକ୍ଷ ଟଙ୍କା ପୁରସ୍କାର ରହିଥିଲା।
ଏଥିସହିତ ସୁରକ୍ଷା ବାହିନୀ ନକ୍ସଲମାନଙ୍କଠାରୁ ୨ଟି ଏକେ-୪୭ ବନ୍ଧୁକ ଜବତ କରିଛନ୍ତି। ଅନ୍ୟ ମାଓବାଦୀଙ୍କ ସନ୍ଧାନରେ ସର୍ଚ୍ଚ ଅପରେଶନ ଜାରି ରହିଛି ବୋଲି ଝାଡଖଣ୍ଡ ପୋଲିସ ସୂଚନା ଦେଇଛି। ସୁରକ୍ଷା ବାହିନୀ ପାଲାମୁ-ଚତରା ସୀମାରେ ମାଓବାଦୀଙ୍କ ବିରୋଧରେ ସର୍ଚ୍ଚ ଅପରେଶନ ଆରମ୍ଭ କରିଥିଲେ। ଲାଭାଲୋଙ୍ଗ ପୋଲିସ ଷ୍ଟେଶନ ଅଞ୍ଚଳରେ ମାଓବାଦୀଙ୍କୁ ଏନକାଉଣ୍ଟର କରାଯାଇଛି।
ଏହି ସର୍ଚ୍ଚ ଅପରେଶନରେ ସିଆରପିଏଫ୍ କୋବ୍ରା ବାଟାଲିୟନ, ଜେଏପି, ଆଇଆରବି ଏବଂ ପାଲାମୁ ତଥା ଚତରା ଜିଲାର ସୁରକ୍ଷା ବାହିନୀ ନିୟୋଜିତ ହୋଇଥିଲେ । ନକ୍ସଲମାନଙ୍କ ଅନ୍ୟ ସହଯୋଗୀଙ୍କୁ ଖୋଜିବା ପାଇଁ ଜଙ୍ଗଲରେ ସର୍ଚ୍ଚ ଅପରେଶନ ଚାଲିଛି।
