କଟକ,୨୪।୧୦: ଭାରତୀୟ ଷ୍ଟେଟ୍ ବ୍ୟାଙ୍କ ଅଫିସର୍ସ ବହୁମୁଖୀ ସମବାୟ ସମିତିର ୩୯ତମ ବାର୍ଷିକ ସାଧାରଣ ସଭା ରବିବାର ସ୍ଥାନୀୟ ଶହୀଦ ଭବନଠାରେ ଅନୁଷ୍ଠିତ ହୋଇଯାଇଛି। ଏହି ପରିପ୍ରେକ୍ଷୀରେ ଏସ୍ବିଆଇ ଅଫିସରମାନଙ୍କ ଦ୍ବାରା ଗଠିତ ସମବାୟ ସମିତିର ରାଜ୍ୟସ୍ତରୀୟ ବାର୍ଷିକ ସାଧାରଣ ସଭା ଅରୁଣ କୁମାର ବିଶୋଇଙ୍କ ସଭାପତିତ୍ୱରେ କାର୍ଯ୍ୟ ପ୍ରାରମ୍ଭ ହୋଇଥିଲା। ଏପରିକି ସମିତିର ଅନ୍ୟତମ ସଦସ୍ୟ ନବ କିଶୋର ସାହୁ ଉପସ୍ଥିତ ଅତିଥି ଓ ଅନ୍ୟମାନଙ୍କର ପରିଚୟ ପ୍ରଦାନ ସହ ସମ୍ପାଦକୀୟ ବିବରଣୀ ପାଠ କରିଥିଲେ।
ଓଡ଼ିଶାର ବରିଷ୍ଠ ଶିକ୍ଷାବିତ ଡ. ସତ୍ୟକାମ ମିଶ୍ର ମୁଖ୍ୟ ଅତିଥି ଭାବେ ଯୋଗ ଦେଇ ସମବାୟ ସମିତିର ଭୂମିକା ଉପରେ ସବିଶେଷ ଆଲୋକପାତ କରିଥିଲେ। ସେହିଭଳି ଅଫିସର ସଂଘର ସଭାପତି ଅମିତାଭ ଦାସ ଉଲ୍ଲେଖ କରିଥିଲେ ଯେ, ଐକ୍ୟବଦ୍ଧତା ଯୋଗେ ସମିତି ତଥା ସଂଘର ଉତ୍ତରୋତ୍ତର ଉନ୍ନତି ସମ୍ପାଦିତ ହୋଇପାରିଛି। ଏପରିକି ଏକତା ଦ୍ୱାରା ସଫଳତା ମିଳିଥାଏ। ସେ ଆଗାମୀ ଦିନରେ ମଧ୍ୟ ସମସ୍ତ ସଦସ୍ୟଙ୍କର ସହଯୋଗ କାମନା କରିଥିଲେ। ସମିତିର ସଭାପତି ଅରୁଣ କୁମାର ବିଶୋଇ ସ୍ବାଗତ ଭାଷଣ ପ୍ରଦାନ କରିବା ସଙ୍ଗେ ସଙ୍ଗେ ସଭାକୁ ସୁଚାରୁ ରୂପେ ପରିଚାଳନା କରିଥିଲେ। ସେହିପରି ଷ୍ଟେଟ୍ ବ୍ୟାଙ୍କ ଷ୍ଟାଫ୍ ଆସୋସିଏଶନ ଭୁବନେଶ୍ୱର ସର୍କଲର ସଭାପତି ସ୍ବାଧୀନ କୁମାର ଦାଶ, ସମ୍ପାଦକ ରଘୁନାଥ ପ୍ରସାଦ ଦାସ ପ୍ରମୁଖ ଉକ୍ତ ବୈଠକରେ ଉଦ୍ବୋଧନ ଦେଇଥିଲେ। ପରିଶେଷରେ ସମିତିର କୋଷାଧ୍ୟକ ତନ୍ମୟ ଦାଶଗୁପ୍ତା ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।
