ପାଟଣା,୨୯ା୭(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଓ ସାହାରପଡ଼ା ବ୍ଲକରେ ନୂତନ ସବ୍ରେଜିଷ୍ଟ୍ରାର କାର୍ଯ୍ୟାଳୟ ଖୋଲାଯିବ। ଏନେଇ ବୋର୍ଡ ଅଫ୍ ରେଭିନ୍ୟୁ ଇନ୍ସପେକ୍ଟର ଜେନେରାଲ ଅଫ୍ ରେଜିଷ୍ଟ୍ରେଶନ କଟକ ବିଜ୍ଞପ୍ତି ପ୍ରକାଶ କରିଛନ୍ତି।
ରାଜ୍ୟରେ ୧୨୯ଟି ସବ୍ରେଜିଷ୍ଟ୍ରାର ଖୋଲାଯିବା ନେଇ ୨୭ ଜୁଲାଇ ୨୦୨୨ରେ ବିଜ୍ଞପ୍ତି ନଂ ୨୮୫୮ରେ ପ୍ରକାଶ ପାଇଛି। ପ୍ରଥମ ପର୍ଯ୍ୟାୟରେ ଏହି ସବୁ ସବ୍ରେଜିଷ୍ଟ୍ରି କାର୍ଯ୍ୟାଳୟ ତହସିଲ ମଧ୍ୟରେ କାର୍ଯ୍ୟ କରିବ ବୋଲି ନିର୍ଦ୍ଦେଶ ଦିଆଯାଇଛି।
ସୂଚନାଯୋଗ୍ୟ, ପାଟଣା ନିର୍ବାଚନ ମଣ୍ଡଳୀର ପାଟଣା, ସାହାରପଡ଼ାରେ ସବ୍ରେଜିଷ୍ଟ୍ରି କାର୍ଯ୍ୟାଳୟ ନ ଥିବାରୁ ସାଧାରଣ ଲୋକେ ଜମିଜମା ବିକ୍ରି ଖରିଦ ରେଜିଷ୍ଟ୍ରି, ବ୍ୟାଙ୍କ ଲୋନ୍ ପାଇଁ ନାହିଁ ନ ଥିବା ହଇରାଣ ହରକତ ହୋଇ କେନ୍ଦୁଝର ରେଜେଷ୍ଟ୍ରି ଅଫିସ କିମ୍ବା ଘଟଗାଁ ସବ୍ ରେଜିଷ୍ଟ୍ରି ଅଫିସ ଉପରେ ନିର୍ଭରଶୀଳ ହେଉଥିଲେ। ଏନେଇ ବିଭିନ୍ନ ଗଣମାଧ୍ୟମରେ ବାରମ୍ବାର ଖବର ପ୍ରକାଶ ପାଇବା ସହ ବୁଦ୍ଧିଜୀବୀ ଓ ବିରୋଧୀ ଦଳ ନେତା ଦାବି କରିଥିଲେ। ପାଟଣା ଓ ସାହାରପଡ଼ାରେ ସବ୍ରେଜିଷ୍ଟ୍ରି ଘୋଷଣା ହେବା ପରେ ଅଞ୍ଚଳବାସୀଙ୍କ ମଧ୍ୟରେ ଆନନ୍ଦ ଖେଳିଯାଇଛି।
