ଜଗତ୍ସିଂହପୁର,୯ା୮(ପ୍ରମୋଦ କୁମାର ନାୟକ):ଜଗତ୍ସିଂହପୁର ଥାନା ଅଞ୍ଚଳର ଜଣେ ନାବାଳିକାଙ୍କୁ ପ୍ରେମ ବିବାହ ପରେ ପ୍ରତାରଣା କରିଛନ୍ତି ଜଣେ ପୋଲିସ ସବ୍ ଇନ୍ସପେକ୍ଟର (ଏସ୍ଆଇ)। ସେ ହେଉଛନ୍ତି ବାଲେଶ୍ୱର ଜିଲା ବାଲିଆପାଳ ଥାନା ରତେଇ ଗାଁର ଅମିତ୍ ପାଢ଼ୀ। ନାବାଳିକାଙ୍କ ଅଭିଯୋଗ ଅନୁଯାୟୀ, ସାମାଜିକ ଗଣମାଧ୍ୟମରୁ ପ୍ରେମ ଓ ପରେ ବିବାହ କରି ଅମିତ୍ ତାଙ୍କୁ ନିଜ ଘରେ ରଖିଥିଲେ। ମାତ୍ର ପରେ ନାବାଳିକାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଇ ତାଙ୍କ ଘରେ ଛାଡ଼ି ଦେଇଛନ୍ତି। ଏନେଇ ଜଗତ୍ସିଂହପୁର ଥାନାରେ ମାମଲା (ନଂ.୨୯୦/୨୫) ରୁଜୁ ହୋଇଛି। ଅମିତ୍ଙ୍କୁ ନିଲମ୍ବନ କରାଯାଇଥିଲେ ମଧ୍ୟ ଅଭିଯୋଗ ପ୍ରାୟ ୪ ମାସ ପରେ ପୋଲିସ ଗିରଫ କରୁନାହିଁ ବୋଲି ନାବାଳିକା ଓ ତାଙ୍କ ମା’ ଶୁକ୍ରବାର ଗଣମାଧ୍ୟମ ଆଗରେ କହିଛନ୍ତି। ଏପରିକି ତାଙ୍କ ଅଗୋଚରରେ ଝିଅକୁ ଅମିତ ବିବାହ କରିଥିବା ନାବାଳିକାଙ୍କ ମା’ ପ୍ରକାଶ କରିଛନ୍ତି।
ନାବାଳିକା ୧୦ମ ଶ୍ରେଣୀରେ ପଢ଼ୁଥିବାବେଳେ ଫେସ୍ବୁକ୍ରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। ସେତେବେଳେ ଏସ୍ଆଇ ପାଢ଼ୀ ପୁରୀରେ କାର୍ଯ୍ୟରତ ଥିଲେ। ଉଭୟେ ପ୍ରଥମେ ମନ୍ଦିର ଓ ପରେ ଏକ ହୋଟେଲରେ ବିବାହ କରିଥିବା କୁହାଯାଉଛି। ବିବାହ ପରେ ବୋହୂ ହିସାବରେ ନାବାଳିକା ତାଙ୍କ ଶାଶୁଘରେ ରହୁଥିଲେ। କିନ୍ତୁ ପରେ ଶାଶୁ, ଶ୍ୱଶୁର ଓ ସ୍ବାମୀ ନିର୍ଯାତନା ଦେଇ ତାଙ୍କୁ ଘରକୁ ପଠାଇ ଦେଇଥିବା ନେଇ ସେ ଦର୍ଶାଇଛନ୍ତି।
ଜଗତ୍ସିଂହପୁର ଥାନାରେ ଅଭିଯୋଗ କରିବା ସତ୍ତ୍ବେ ପୋଲିସ କୋର୍ଟକୁ ଚାର୍ଜଶିଟ୍ ଦେଉ ନ ଥିବା ପୀଡ଼ିତା ତାଙ୍କ ମା ଅଭିଯୋଗ କରିଛନ୍ତି। ଏସ୍ପି ଭବାନୀଶଙ୍କର ଉଦ୍ଗାତା କହିଛନ୍ତି, ଅମିତ ପୁରୀରେ ତାଲିମ ନେଉଥିବାବେଳେ ପୀଡ଼ିତା ଏହି ଅଭିଯୋଗ କରିଥିଲେ। ପୋଲିସ ମାମଲା ରୁଜୁ ପରେ ଜଗତ୍ସିଂହପୁର ଥାନା ଅତିରିକ୍ତ ଆଇଆଇସିଙ୍କ ମାଧ୍ୟମରେ ତଦନ୍ତ ଚଲାଇଛି। ନାବାଳିକା ଥାନାରେ ଅଭିଯୋଗ କରିବା ପୂର୍ବରୁ ଅମିତଙ୍କୁ ଏବିଷୟରେ ଜଣାଇଥିଲେ। ଏହାପରେ ଅଭିଯୁକ୍ତ ଏସ୍ଆଇ ପୁରୀରୁ ଫେରାର ହୋଇଯାଇଥିଲେ। ଏ ନେଇ ଏସ୍ପି ଉଦ୍ଗାତା ପୁରୀ ଏସ୍ପିଙ୍କ ଦୃଷ୍ଟି ଆକର୍ଷଣ କରିବା ପରେ ତାଙ୍କୁ କାର୍ଯ୍ୟରୁ ନିଲମ୍ବନ କରାଯାଇଛି। ସେବେଠାରୁ ଅମିତ ଫେରାର ଅଛନ୍ତି। ତାଙ୍କୁ ଧରିବା ପାଇଁ ଯୋଜନା ଚାଲିଛି। ଏହା ଭିତରେ ଅମିତଙ୍କ ପରିବାର ଲୋକେ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ତଳ କୋର୍ଟରୁ ଜାମିନ ପାଇଛନ୍ତି। କେବଳ ଅମିତଙ୍କୁ ଗିରଫ କରାଯିବା ବାକି ରହିଛି। ଏବେ ବିବାହ କେଉଁଠି ଓ କିପରି ହୋଇଛି ସେନେଇ ଅନୁଧ୍ୟାନ ଚାଲିଛି। ନାବାଳିକାଙ୍କ ମା’ଏ ବିବାହ ବିଷୟରେ ଜାଣିଥିଲେ କି ନାହିଁ ସେନେଇ ତଦନ୍ତ ଚାଲିଥିବା ଏସ୍ପି ଉଦ୍ଗାତା କହିଛନ୍ତି।