ଦାରିଙ୍ଗବାଡ଼ି,୨୮ା୩(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟ ପରିସରରେ ଶୁକ୍ରବାର ‘ଆମେ ଜାଣିବା, ଆମେ ଜିଣିବା’ ସମ୍ପର୍କରେ ଆଲୋଚନା ହୋଇଥିଲା। ଏହି ଅବସରରେ ମୁଖ୍ୟ ଅତିଥି ଭାବେ ଦାରିଙ୍ଗବାଡ଼ି ସିଡିପିଓ ସନ୍ଧ୍ୟାରାଣୀ ପଣ୍ଡା ଯୋଗଦେଇଥିବା ବେଳେ ମୁଖ୍ୟ ବକ୍ତା ଭାବେ ବ୍ଲକ ସମ୍ପ୍ରସାରଣ ଅଧିକାରୀ ବିଶ୍ୱଜିତ ଜାଲି, ସମ୍ମାନିତ ଅତିଥି ଭାବେ ବିଦ୍ୟାଳୟର ଇନଚାର୍ଜ ପ୍ରିନ୍ସପାଲ ସୋନାଲିକା ପୃଷ୍ଟି, ବିଦ୍ୟାଳୟ ପରିଚାଳନା କମିଟିର ସଭାନେତ୍ରୀ ଆଶାଲତା ପ୍ରଧାନ ପ୍ରମୁଖ ଯୋଗଦେଇଥିଲେ।
ବିଦ୍ୟାଳୟର ପ୍ରଧାନଶିକ୍ଷକ ନରେନ୍ଦ୍ର ବେହେରାଙ୍କ ଅଧ୍ୟକ୍ଷତା ଏହି କାର୍ଯ୍ୟକ୍ରମରେ ବିଦ୍ୟାଳୟର ଅଂଶୀଦାର ହେଉଛନ୍ତି ଅଭିଭାବକ। ତେଣୁ ଅଭିଭାବକ, ଶିକ୍ଷୟିତ୍ରୀ-ଶିକ୍ଷକ ଏବଂ ଛାତ୍ରୀଛାତ୍ରଙ୍କ ମଧ୍ୟରେ ସମନ୍ବୟ ରହିଲେ ଛାତ୍ରୀଛାତ୍ରଙ୍କ ବିକାଶ ହୋଇପାରିବ। ଶିକ୍ଷାନୁଷ୍ଠାନରେ କେବଳ ପିଲାଙ୍କୁ ଛାଡି ଅଭିଭାବକ ନିଜ ଦାୟିତ୍ୱରୁ ଓହରିଗଲେ ପିଲାମାନଙ୍କ ବିଷୟରେ ଜାଣିବା କଷ୍ଟକର। ତେଣୁ ହଷ୍ଟେଲରେ ରହି ପଢ଼ୁଥିବା ଛାତ୍ରୀଛାତ୍ରଙ୍କ ପାଠପଢ଼ା, ଅନ୍ୟ ଖେଳକୁଦ ଓ ବିଦ୍ୟାଳୟ ଯାତାୟାତ ଏବଂ ସେମାନଙ୍କ ମାନସିକ ଶାରୀରିକ ପରିବର୍ତ୍ତନ ଆଦି ଅଭିଭାବକମାନେ ଜାଣିବା ଦରକାର। ବିଶେଷକରି ଛାତ୍ରୀମାନଙ୍କ ବିଷୟରେ ଅଭିଭାବକମାନେ ଅଧିକ ଦାୟିତ୍ୱ ନେବା ଦରକାର। ଜଣେ ଛାତ୍ରୀ କାହା ସହ ସାଙ୍ଗସାଥୀ ହେଉଛି ସେ କ’ଣ କରୁଛି ସେ ସମ୍ପର୍କରେ ନିହାତି ଗୁରୁତ୍ୱ ଦେବା ଦରକାର ବୋଲି ସିଡିପିଓ କହିଥିଲେ।
ସେହିପରି ସରକାରଙ୍କ ପକ୍ଷରୁ ଛାତ୍ରୀଛାତ୍ରଙ୍କ ମାଗଣା ପାଠ ପଢ଼ାଇବା ପାଇଁ କ’ଣ ସବୁ ପ୍ରଦାନ କରାଯାଉଛି ସେ ସମ୍ପର୍କରେ ମୁଖ୍ୟ ବକ୍ତା ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ବିଶ୍ୱଜିତ ଜାଲି ଉପସ୍ଥିତ ଅଭିଭାବକମାନଙ୍କୁ ଅବଗତ କରିଥିଲେ। ପିଲାଙ୍କୁ ପାଠ୍ୟପୁସ୍ତକ ସମେତ ୟୁନିଫର୍ମ, କାଜୁଆଲ ଡ୍ରେସ, ଜୋତା, ହାଉସ ଡ୍ରେସ, ମଶାରୀ, ଖଟ, କମ୍ବଳ, ଟ୍ରେ, ବିଭିନ୍ନ ପ୍ରକାର ବୃତ୍ତି ପ୍ରଦାନ, ଆଦି ସରକାର ଯୋଗାଉଥିବା କହିଥିଲେ। ସେହିପରି ବିଜ୍ଞାନ ଶିକ୍ଷକ ରମାକାନ୍ତ ଦେଶୀନାୟକ ଉପସ୍ଥିତି ଅଭିଭାବକମାନଙ୍କୁ ଛାତ୍ରୀଛାତ୍ରଙ୍କୁ ସରକାରଙ୍କ ପକ୍ଷରୁ ଦିଆଯାଉଥିବା ବୃତ୍ତି ଓ ଛାତ୍ରୀଛାତ୍ରଙ୍କ ଅଧିକାର ସମ୍ପର୍କରେ ଅବଗତ କରିଥିଲେ। କାର୍ଯ୍ୟକ୍ରମକୁ ବିଦ୍ୟାଳୟର ସହକାରୀ ଶିକ୍ଷକ ସାରଦା ପ୍ରସାଦ ମଙ୍ଗରାଜ ପରିଚାଳନା କରିଥିଲେ ।
