ମାଥିଲି/ ମାଲକାନଗିରି,୧୪ା୯ (ଡି.ଏନ୍.ଏ.): ଗତ ଦୁଇ ସପ୍ତାହ ଧରି ମାଲକାନଗିରି ଜିଲା ମାଥିଲି ବ୍ଲକ ସାଲିମି ପଞ୍ଚାୟତର ହଳଦୀକୁଣ୍ଡ ଗ୍ରାମରେ ଅଜଣା ରୋଗ ବ୍ୟାପିଛି। ତେବେ ଏଥିରେ ୮ଜଣଙ୍କ ମୃତ୍ୟୁ ହୋଇଥିବା ସରକାରୀ ଭାବେ କୁହାଯାଉଥିବା ବେଳେ ପ୍ରକୃତରେ ୧୪ ଜଣଙ୍କ ମୃତ୍ୟୁ ହୋଇଥିବା ଗ୍ରାମବାସୀ କହିଛନ୍ତି। ଅନ୍ୟପକ୍ଷରେ ଏହି ଅଜଣା ରୋଗରେ ମଙ୍ଗଳବାର ଜଣେ ୧୦ ବର୍ଷର ଛାତ୍ରଙ୍କ ମୃତ୍ୟୁ ହୋଇଛି। ସେ ବାପନଗୁଡା ଗ୍ରାମର ମଙ୍ଗଳା ପଡିଆମୀଙ୍କ ପୁଅ ସନ୍ତୋଷ ବୋଲି ଜଣାପଡିଛି। ସେ କଂସାରିପୁଟ ବିଦ୍ୟାଳୟରେ ଦ୍ୱିତୀୟ ଶ୍ରେଣୀରେ ପଢୁଥିଲେ।
ଏହି ଅଜଣା ରୋଗର ମୃତ୍ୟୁକୁ ନେଇ ପୂର୍ବରୁ ଜିଲା ସଦର ମହକୁମା ଓ ମାଥିଲି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଡାକ୍ତରମାନେ ହଳଦୀକୁଣ୍ଡ ଗ୍ରାମକୁ ଯାଇ ଆକ୍ରାନ୍ତ ରୋଗୀଙ୍କ ଚିକିତ୍ସା କରିବା ସହ ରକ୍ତ, ପାନୀୟ ଜଳ ନମୁନା ପରୀକ୍ଷା ପାଇଁ ପରୀକ୍ଷାଗାରକୁ ପଠାଇଥିଲେ। ଏହି ରୋଗର କାରଣ ସେହି ଅଞ୍ଚଳରେ ଅତ୍ୟଧିକ ମଦ୍ୟପାନ ଏବଂ କିଛି ବାସିଖାଦ୍ୟ ଖାଇଥିବାରୁ ହୋଇଥିବା ରିପୋର୍ଟରେ ଉଲ୍ଲେଖ ଥିବା ଜିଲା ମୁଖ୍ୟ ଚିକିତ୍ସାଧିକାରୀ ସେତେବେଳେ ପ୍ରକାଶ କରିଥିଲେ। ଜିଲା ମୁଖ୍ୟ ଚିକିତ୍ସାଧିକାରୀଙ୍କ ମନ୍ତବ୍ୟକୁ ଅନେକେ ନିନ୍ଦା କରିଛନ୍ତି। ବାପନଗୁଡା ଗ୍ରାମର ସନ୍ତୋଷଙ୍କ ମୃତ୍ୟୁ ନେଇ ଗ୍ରାମବାସୀ କହିଛନ୍ତି, ସେ ସୋମବାର ବିଦ୍ୟାଳୟରୁ ଆସି ଖାଦ୍ୟ ଖାଇ ଶୋଇଲା ପରେ ତାଙ୍କ ଗୋଡହାତ ଫୁଲି ଯାଇଥିଲା। ମଙ୍ଗଳବାର ସକାଳେ ମୃତ୍ୟୁବରଣ କଲେ। ତେବେ ସନ୍ତୋଷଙ୍କ ଏପରି ମୃତ୍ୟୁକୁ କ’ଣ ମଦ୍ୟପାନଜନିତ ବୋଲି କୁହାଯିବ କି ବୋଲି ଗ୍ରାମବାସୀ ପ୍ରଶ୍ନ ଉଠାଇଛନ୍ତି। ଅନ୍ୟପକ୍ଷରେ ବପନଗୁଡ଼ାରେ ଏକ ଡାକ୍ତରୀ ଟିମ୍ ପହଞ୍ଚତ୍ ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ଦେଉଥିବା ଦେଖିବାକୁ ମିଳିଛି। ତୁରନ୍ତ ହଳଦୀକୁଣ୍ଡ ଗ୍ରାମକୁ ଭୁବନେଶ୍ୱର କିମ୍ବା କଟକରୁ ସ୍ବତନ୍ତ୍ର ବିଶେଷଜ୍ଞ ଡାକ୍ତରୀ ଟିମ୍ ପଠାଇ ରୋଗର କାରଣ ନିରୂପଣ କରିବା ସହ ଏହାର ପ୍ରତିକାର କରିବା ଲାଗି ପଞ୍ଚାୟତର ପୂର୍ବତନ ଜିଲା ପରିଷଦ ସଭ୍ୟ କୁଶ ତାତି ଦାବି କରିଛନ୍ତି।
