ଭୁବନେଶ୍ୱର,୮।୪: ୱାକଫ ବିଲ ଭୋଟିଂ ନେଇ ରାଜନୀତି ସରଗରମ ହୋଇଛି। ରାଜ୍ୟ ରାଜନୀତିରେ ଝଡ଼ ସୃଷ୍ଟି ହୋଇଥିବା ବେଳେ କାହା ହାତରେ ବିଜେଡି ଭବିଷ୍ୟତ ତାହାକୁ ନେଇ ଏବେ ପ୍ରଶ୍ନ ଉଠୁଛି।
ମଙ୍ଗଳବାର ପ୍ରସନ୍ନ ଆଚାର୍ଯ୍ୟ, କଳିକେଶ ସିଂଦେଓ, ପ୍ରତାପ ଦେବ ଓ ଅନଙ୍ଗ ଉଦୟ ସିଂହଦେଓ ନବୀନ ନିବାସରେ ପହଞ୍ଚି ଥିଲେ। ସେଠାରେ ଳୀୟ ସ୍ଥିତି ନେଇ ନବୀନଙ୍କ ସହ ଆଲୋଚନା କରିଥିଲେ।
ସୂଚନା ଯୋଗ୍ୟ,
: ବିଜୁ ଜନତା ଦଳର ଭବିଷ୍ୟତ ଭିକେ ପାଣ୍ଡିଆନଙ୍କ ଆଗରେ ପଛରେ ଘୁରି ବୁଲୁଛି। ସେ ଯେମିତି ଚାହିଁବେ ଦଳର ଭବିଷ୍ୟତ ସେପରି ହେବ। କାରଣ ଦଳର ଅଧେ ନେତା ପାଣ୍ଡିଆନଙ୍କ ସମର୍ଥନ କରୁଥିବା ବେଳେ ଅଧେ ଖୋଲାଖୋଲି ବିରୋଧ କରୁଛନ୍ତି। ଏଭଳି ସ୍ଥିତିରେ ଓ୍ବକ୍ଫ ବିଲ୍ରେ ଭୋଟିଂ ଦଳର ଆଭିମୁଖ୍ୟକୁ ଗୋଳମାଳିଆ କରିଦେଇଛି।
ବିଜେଡିର ବରିଷ୍ଠ ନେତା ଦେବାଶିଷ ସାମନ୍ତରାୟ, ବଦ୍ରି ପାତ୍ର, ଗଣେଶ୍ୱର ବେହେରା, ଭୂପିନ୍ଦର ସିଂହ, ପ୍ରଫୁଲ୍ଲ ଘଡେଇ ଆଦି ପ୍ରତ୍ୟେକ୍ଷ ଏବଂ ପରୋକ୍ଷରେ ପାଣ୍ଡିଆନଙ୍କୁ ଆଙ୍ଗୁଳି ନିର୍ଦ୍ଦେଶ କରିଛନ୍ତି। ଏଥିସହିତ ସେମାନେ ଦଳରେ କାହାର ପତିଆରା ଚାଲିଛି ତାହା ପ୍ରକାଶ କରିବା ସହିତ ନବୀନଙ୍କୁ ସାମ୍ନାକୁ ଆସିବାକୁ କହିଛନ୍ତି।
ଏଭଳି ସ୍ଥିତିରେ ପାଣ୍ଡିଆନଙ୍କ ସପକ୍ଷବାଦୀ ନେତାମାନେ ମଧ୍ୟ ସାମ୍ନାକୁ ଆସିଛନ୍ତି। ରାଜ୍ୟସଭା ଏମପି ମାନସ ମଙ୍ଗରାଜ, ନିରଞ୍ଜନ ବିଶି, ସୁଲତା ଦେଓ ଏବଂ ସୁଭାଶିଷ ଖୁଣ୍ଟିଆ, ସୁବାଷ ସିଂହ ଆଦି ଓକିଲାତି କରିଛନ୍ତି।
ପାଣ୍ଡିଆନଙ୍କୁ ଅଯଥା ବଦନାମ କରାଯାଉଛି ଲେଖିଛନ୍ତି ଏମପି ନିରଞ୍ଜନ ବିଶି। ”ଦେବାଶିଷ ସାମନ୍ତରାୟଙ୍କ ମନ୍ତବ୍ୟକୁ ନିନ୍ଦା କରୁଛି ବୋଲି ସେ ଲେଖିଛନ୍ତି। କିଛି ଅଭିସନ୍ଧି ରଖି ଦେବାଶିଷ ଏପରି କରିଥିବା ସେ କହିଛନ୍ତି।” ସେହିପରି ଦେବାଶିଷଙ୍କ ମନ୍ତବ୍ୟକୁ ମାନସ ମଙ୍ଗରାଜ ନିନ୍ଦା କରିଛନ୍ତି। ସେ ଲେଖିଛନ୍ତି ”ରାଜନୀତିରୁ ୧୦ ମାସ ହେଲା ଅବସର ନେଇ ସାରିଛନ୍ତି ପାଣ୍ଡିଆନ। କିଛି ନ୍ୟସ୍ତ ସ୍ବାର୍ଥ୍ୟ କାରଣରୁ ଦେବାଶିଷ ଏପରି କହିଛନ୍ତି। ନବୀନ ନିବାସରେ ଅପ୍ରିତିକର ପରିସ୍ଥିତି ସୃଷ୍ଟି କରିବାରୁ ନିବୃତ୍ତ ରୁହନ୍ତୁ।”
ସେପଟେ ୱାକ୍ଫ ସସ୍ପେନ୍ସରେ ନୂଆ ଟୁଇଷ୍ଟ ଆଣିଛନ୍ତି ସାଂସଦ ଶୁଭାଶିଷ ଖୁଣ୍ଟିଆ । ନବୀନ ଦଳର ନେତା ତାଙ୍କ ନିର୍ଦ୍ଦେଶରେ ସବୁ ହୁଏ ବୋଲି ସେ କହିଛନ୍ତି।
ସେପଟେ କଟକ ମେୟର ସୁବାସ ସିଂ ଦେବାଶିଷଙ୍କୁ ନିନ୍ଦା ଓ ପାଣ୍ଡିଆନଙ୍କୁ ପ୍ରଶଂସାରେ ପୋତିଛନ୍ତି। ସେ କହିଛନ୍ତି, ”ଦେବାଶିଷ ବାବୁଙ୍କ କଥା ନ କହିଲେ ଭଲ, କିଏ ଅଧିକାର ଦେଲା। ପାର୍ଟି ଫୋରମ୍ରେ ନ କହି ଗଣମାଧ୍ୟମରେ କାହିଁକି କହିଲେ। ପାଣ୍ଡିଆନଙ୍କୁ ନିନ୍ଦିତ କରିବା ଅର୍ଥ ବିଜେଡିକୁ ଦୁର୍ବଳ କରିବା। ଗୋଟିଏ IAS ଅଫିସର ଖୋଜି ପାଆନ୍ତୁ, ଯିଏ ରାତି ୪ରୁ କାମ କରନ୍ତି। ମିଡିଆରେ ବାଇଟ୍ ଦେଇ ଦେବାଶିଷ ବାବୁ ବିଭ୍ରାନ୍ତି ଚାହୁଁଛନ୍ତି। ଭୋଟ ନ ଦେଇ କକ୍ଷ ତ୍ୟାଗ କରିବା ଅର୍ଥ କଣ ବୁଝି ପାରୁ ନାହାନ୍ତି। ଦଳ ନବୀନ ବାବୁଙ୍କ ନେତୃତ୍ବରେ ମଜଭୂତ ହୋଇ ରହିଛି। ସେହିପରି ପୂର୍ବତନ ବିଧାୟକ ପ୍ରଭାତ ତ୍ରିପାଠୀଙ୍କୁ ମଧ୍ୟ ସୁବାଷ ସମାଲୋଚନା କରିଛନ୍ତି। ସେ ବିଜେଡିରେ ନାହାନ୍ତି, କଣ ଦଳ ବାବଦରେ କହିବେ ବୋଲି କହିଛନ୍ତି।”
ତେବେ ରାଜ୍ୟ ସଭା ଏମପି ସସ୍ମିତ ପତ୍ର ରାଜ୍ୟସଭାରେ ଓ୍ବକ୍ଫ ବିଲ୍ ସପକ୍ଷରେ ଭୋଟ ଦେବା ପରେ ଏହି ବିବାଦ ବିଜେଡି ପାଇଁ ମୁଣ୍ଡ ବିନ୍ଧାର କାରଣ ପାଲଟିଛି। ଏହି ବିଲ୍ ଭୋଟିଂ ସମୟରେ ଏମପି ମାନେ ନିଜ ବିବେକ ଅନୁଯାୟୀ ଭୋଟ ଦେଇପାରିବେ,ଏଥିପାଇଁ ଦଳ ପକ୍ଷରୁ କୌଣସି ହୁଇପ୍ ଜାରି ହୋଇ ନ ଥିବା ଏକ୍ସ ‘ରେ ପୋଷ୍ଟ କରି କହିଥିଲେ। ଏହାପରେ ସେ ବିଲ୍ ସପକ୍ଷରେ ଭୋଟ ଦେଇଥିଲେ। କିଛି ଏମପି ବିଲ୍ ବିପକ୍ଷରେ ମଧ୍ୟ ଭୋଟ ଦେଇଥିଲେ।
ତେବେ ଏହି ଘଟଣା ସାମ୍ନାକୁ ଅନେକ ବରିଷ୍ଠ ନେତା ଖାଲାଖୋଲି ସସ୍ମିତଙ୍କୁ ସମାଲୋଚନା କରିବା ସହିତ ତାଙ୍କର ଏପ୍ରକାର ନିଷ୍ପତ୍ତି ନେବାର ଓୌକାତ ନଥିବା କଥା କହିଥିଲେ। ଦଳର ବରିଷ୍ଠ ନେତା ବଦ୍ରି ପାତ୍ର କହିଥିଲେ ଯେ, ଏଭଳି ନିଷ୍ପତ୍ତି ନେବାର ସାହସ ସସ୍ମିତଙ୍କର ନାହିଁ। ଦଳ ସମଦୂରତା ନୀତି ରଖି ଚାଲୁଥିଲା, ନିଷ୍ପତ୍ତି ଅନୁରୂପ ହେଲାନି, କିଏ ଗୋଟେ ଖେଳ କଲା। କେଉଁଠି ଖେଳ ହୋଇଛି ତାହା ଜାଣିବା ଆବଶ୍ୟକ। ତଦନ୍ତରେ ଜଣାପଡ଼ିବ କାହା ନିର୍ଦେଶରେ ଏଭଳି ହେଲା। ଦଳ ଏବେ ବିଶ୍ବାସ ସଙ୍କଟରେ ବୋଲି ବଦ୍ରି କହିଛନ୍ତି।
ଏହାପରେ ବଡ଼ ବିସ୍ଫୋରଣ ଘଟାଇଥିଲେ ବିଜେଡି ଏମ୍ପି ଦେବାଶିଷ ସାମନ୍ତରାୟ। ସେ କହିଛନ୍ତି, ସସ୍ମିତ ଭିଲେନ ନୁହଁନ୍ତି, ମୁଖ୍ୟ ପରାମର୍ଶଦାତା ହିଁ ଏହା ପଛରେ ଅଛନ୍ତି ବୋଲି କହିଛନ୍ତି। ଦୁଇ ଦୁଇଟି ମିଟିଂରେ ନବୀନ ବିଲ୍କୁ ବିରୋଧ କରିବୁ କହିଥିଲେ। ପୁଣି କାହିଁକି ନିଷ୍ପତ୍ତି ବଦଳିଗଲା, ନବୀନ ବାବୁ ବିଚାର କରିବା କଥା। ସସ୍ମିତ ଭିଲେନ ନୁହଁନ୍ତି, ସସ୍ମିତ ନିର୍ଦ୍ଦେଶ ନିଅନ୍ତି, ଦିଅନ୍ତି ନାହିଁ ବୋଲି ଦେବାଶିଷ କହିଛନ୍ତି।
ବିଜେଡିର ବରିଷ୍ଠ ନେତା ପ୍ରଫୁଲ୍ଲ ଘଡ଼ାଇ ସୋମବାର ଓ୍ବକ୍ଫ ବିଲକୁ ନେଇ ସେ କହିଛନ୍ତି ”କାହିଁକି ନିଷ୍ପତ୍ତି ବଦଳିଲା, କିଏ ବଦଳାଇଲା ସେ ସମ୍ପର୍କରେ ନବୀନ ସାମ୍ନାକୁ ଆସି ସ୍ପଷ୍ଟ କରିବା ଦରକାର। ସବୁ କଥା ନବୀନ ଜାଣିଛନ୍ତି। ସେ ସାମ୍ନାକୁ ଆସି ଦଳରୁ ଦ୍ୱନ୍ଦ୍ୱ ଦୂର କରନ୍ତୁ। ଏହି ଘଟଣାକୁ ନେଇ ବିଜେଡି ବ୍ୟାକ୍ ଫୁଟ୍କୁ ଚାଲିଗଲା। ନବୀନ ସତ କଥା କ’ଣ କୁହନ୍ତୁ। ପ୍ରକୃତରେ ଦଳରେ କ’ଣ ଘଟିଛି ତାହା ନବୀନ ହିଁ କହିପାରିବେ।”
ବିଜେଡିର ବରିଷ୍ଠ ନେତା ଭୂପିନ୍ଦର ସିଂ କହିଛନ୍ତି, ”ଏକା ସସ୍ମିତ ନହନ୍ତି, ଏଥିରେ ଏକାଧିକ ବ୍ୟକ୍ତି ସମ୍ପୃକ୍ତ ଅଛନ୍ତି। ବର୍ତ୍ତମାନ କାଳବୈଶାଖୀ ଚାଲିଛି, ପବନର ବେଗ ଅଧିକ ରହିଛି। ଏଥିରେ ଦଳ ଯେ, କ୍ଷତି ସହିବନି ତାହାକୁ ଆମେ ଅସ୍ବୀକାର କରିବା ନାହିଁ। ଉକ୍ତ ଘଟଣାର ଅନୁଧ୍ୟାନ କରାଯିବ। କୌଣସି ବ୍ୟକ୍ତିଙ୍କର ସାହସ ନାହିଁ ଯେ, କି ଦଳର ନିଷ୍ପତ୍ତି ବଦଳାଇ ଦେଇପାରିବେ।”
ଗଣେଶ୍ୱର ବେହେରା କହିଛନ୍ତି, ”ବିଲ୍କୁ ସମର୍ଥନ କରି ସସ୍ମିତ ଦଳ ଲାଗି ଅଡ଼ୁଆ ପରିସ୍ଥିତି ସୃଷ୍ଟି କରିଛନ୍ତି। ତାଙ୍କ ଭଳି ଜଣେ ଅଭିଜ୍ଞ ଏମ୍ପିଙ୍କଠାରୁ ଏଭଳି ଆଶା କରାଯାଉ ନ ଥିଲା। ଦଳର ପରାମର୍ଶ ନ ନେଇ ନିଷ୍ପତ୍ତି ନେବାର କ୍ଷମତା ସସ୍ମିତଙ୍କର ନାହିଁ। ରାଜ୍ୟ ସଭାରେ ସସ୍ମିତ ଏକାକୀ, ସ୍ବାଧୀନ ଭାବେ ନିଷ୍ପତ୍ତି ନେଇଛନ୍ତି। ଧର୍ମନିରପେକ୍ଷତା ଉପରେ ବିଶ୍ୱାସ କରୁଥିବା ଦଳ ଉପରେ ପ୍ରଶ୍ନବାଚୀ ସୃଷ୍ଟି କରିଛି।”
