ମାଧପୁର, ୩୧ା୫ ଜଳକଷ୍ଟରେ କଟିଗଲା ଖରାଦିନ। ପିଇବା ପାଣି ପାଇଁ ଡହଳବିକଳ ହେଲେ ଲୋକେ। ଅଥଚ ୨୪ ଲକ୍ଷ ଟଙ୍କା ବ୍ୟୟରେ ନିର୍ମାଣ ହୋଇଥିବା ଓଭର ହେଡ୍ ପାଣି ଟାଙ୍କି କାମରେ ଆସିଲାନାହିଁ। କାରଣ ଟାଙ୍କି ସିନା ନିର୍ମାଣ ସରିଛି, ହେଲେ ପାଣି ଯୋଗାଣ ପାଇଁ ତିଆରି ହୋଇନି ପମ୍ପ ହାଉସ୍ କି ବିଛାଯାଇନି ପାଇପ୍। ତେଣୁ ଅନୁଗୋଳ ଜିଲା ଆଠମଲ୍ଲିକ ବ୍ଲକର ମାଧପୁର ଅଞ୍ଚଳବାସୀ ହାତପାଆନ୍ତାରେ ପାନୀୟ ଜଳ ପାଇବା ପାଇଁ ଯେଉଁ ସ୍ବପ୍ନ ଦେଖିଥିଲେ, ତାହା ଟାଙ୍କି ନିର୍ମାଣର ଦୀର୍ଘ ୩ବର୍ଷ ପରେ ବି ଅଧୁରା ରହିଯାଇଛି।
ଆଠମଲ୍ଲିକ ବ୍ଲକ ଅନ୍ତର୍ଗତ ମାଧପୁର ଅଞ୍ଚଳବାସୀଙ୍କୁ ଜଳସଙ୍କଟରୁ ମୁକ୍ତି ଦେବାକୁ ୨୦୧୮-୧୯ରେ ସ୍ଥାନୀୟ ଖେଳପଡ଼ିଆରେ ‘ବସୁଧା’ ଯୋଜନାରେ ନିର୍ମାଣ କରାଯାଇଥିଲା ଏକ ଓଭରହେଡ୍ ପାଣିଟାଙ୍କି। ୧ ଲକ୍ଷ ଲିଟର କ୍ଷମତା ବିଶିଷ୍ଟ ଏହି ଟାଙ୍କିରେ ଖର୍ଚ୍ଚ ହୋଇଛି ୨୪ ଲକ୍ଷ ଟଙ୍କା। ଗ୍ରାମ ନିକଟବର୍ତ୍ତୀ କନ୍ଧପଡ଼ା ପାନୀୟ ଜଳ ପ୍ରକଳ୍ପରୁ ପାଣି ଆସିବା ଲାଗି ଯୋଜନା କରାଯାଇଥିଲା। ଏହି ଜଳଯୋଗାଣ ପ୍ରକଳ୍ପ କାର୍ଯ୍ୟକ୍ଷମ ହେଲେ ମାଧପୁର, କୁନ୍ଦନାଳୀ, ବଲୁଆଘରା ଗ୍ରାମବାସୀ ପାଣି ପାଇପାରନ୍ତେ। ହେଲେ ଅନୁଦାନ ନ ଥିବାରୁ ପାଇପ୍ ବିଛା ସହ ପମ୍ପ ହାଉସ ନିର୍ମାଣ କାର୍ଯ୍ୟ ଅଟକି ରହିଛି। ତେଣୁ କେବଳ ଓଭରହେଡ୍ ଟାଙ୍କିରେ ସୀମିତ ରହିଯାଇଛି ଏହି ବହୁ ପ୍ରତୀକ୍ଷିତ ପ୍ରକଳ୍ପ। ଅନ୍ୟପଟେ ପ୍ରଶାସନ ଏବଂ ଜନପ୍ରତିନିଧିମାନେ ଏ ଦିଗରେ ତତ୍ପରତା ଦେଖାଉ ନ ଥିବାରୁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ତୀବ୍ର ହେବାରେ ଲାଗିଛି।
ଏ ସଂକ୍ରାନ୍ତରେ ବିଭାଗୀୟ କନିଷ୍ଠ ଯନ୍ତ୍ରୀ ଉମାକାନ୍ତ ବେହେରା କୁହନ୍ତି, ମଞ୍ଜୁର ହୋଇଥିବା ଟଙ୍କାରେ ଟାଙ୍କି ନିର୍ମାଣ ଶେଷ ହୋଇଛି। ସରକାର ଅଧିକ ଅର୍ଥ ଯୋଗାଇ ଦେଲେ ପାଇପ୍ ବିଛାଇବା ଏବଂ ପମ୍ପ ହାଉସ ନିର୍ମାଣ ହେବ। ଏହାପରେ ଜଳଯୋଗାଣ ପ୍ରକଳ୍ପ କାର୍ଯ୍ୟକ୍ଷମ ହେବ। ବିଡିଓ ସନ୍ତୋଷ କୁମାର ସାହୁ କୁହନ୍ତି, ବିଭାଗୀୟ ଅଧିକାରୀଙ୍କ ସହିତ ଆଲୋଚନା କରି ଅନୁଧ୍ୟାନ କରିବେ।
