ଭେଡେନ,୧୫।୩(ହୃଷୀକେଶ ଖମାରୀ): ବରଗଡ ଜିଲା ଭେଡେନ ବ୍ଲକ ପପଙ୍ଗାଠାରେ ରବିବାରରୁ ରାଜ୍ୟସ୍ତରୀୟ ଡୁମାଳ ମହାସଭା ଆରମ୍ଭ ହୋଇଥିବା ବେଳେ ସୋମବାର ପର୍ଯ୍ୟନ୍ତ ଏହି ମହାସଭା ଚାଲିବ। ଏହି ଅବସରରେ ପ୍ରଥମେ ବକଟି ଉମା ମାହେଶ୍ୱରୀ ମନ୍ଦିରରୁ ମା’ ମାହେଶ୍ୱରୀଙ୍କର ଶାଳକା ବାଡ଼ି, ଛତ୍ର, ବଇରଗ, ଆଲମଙ୍କୁ ସଞ୍ଚାର ବାଦ୍ୟ, ପଞ୍ଚବାଦ୍ୟ ତାଳେ ତାଳେ ବରୁଆମାନେ ନାଚି ନାଚି ବିରାଟ ପଟୁଆରରେ ମହିଳାମାନଙ୍କ ସହ କଳସ ଯାତ୍ରାରେ ସଭାସ୍ଥଳକୁ ଅଣାଯାଇଥିଲା । ପୂଜାସ୍ଥଳରେ ମା’ ମାହେଶ୍ୱରୀଙ୍କର ପୂଜା କରାଯିବା ପରେ ଅତିଥିମାନଙ୍କ ଦ୍ୱାରା ମଞ୍ଚରେ ଦୀପ ପ୍ରଜ୍ବଳନ କରାଯାଇ ପ୍ରଥମ ଅଧିବେଶନର ସଭାକାର୍ଯ୍ୟ ଆରମ୍ଭ କରାଯାଇଥିଲା ।
ବୁଲୁ ଖମାରୀ ଓ ଲକ୍ଷ୍ମୀକାନ୍ତ ଖମାରୀ ମା’ ମାହେଶ୍ୱରୀଙ୍କର ମାଲେଶ୍ରୀ ଗାନ କରିଥିଲେ । ଅତିଥିମାନଙ୍କ ପରିଚୟ ପ୍ରଦାନ ସହ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ମହାସଭାର ଅଧ୍ୟକ୍ଷ ତଥା ବରଗଡ ଜିଲା ସଭାପତି ଗଣେଶ ପ୍ରଧାନଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ବରଗଡ଼ ଏମପି ପ୍ରଦୀପ କୁମାର ପୁରୋହିତ ମୁଖ୍ୟ ଅତିଥି, ଡୁମାଳ ପରିଷଦର ରାଜ୍ୟ ସଭାପତି ଦୟାସାଗର ମେଣ୍ଡଳୀ, ରାଜ୍ୟ ମହିଳା ସଭାନେତ୍ରୀ ହେମାବତୀ କରନ, ରାଜ୍ୟ ଯୁବ ସଭାପତି ଦୟାନିଧି ଖମାରୀ, ରାଜ୍ୟ ସମ୍ପାଦକ ଉଦିତ ପ୍ରତାପ ଦେହୁରୀ, ରାଜ୍ୟ ଉପସଭାପତି ସୁଦାମ ଚରଣ ଖମାରୀ, ଲୋକନାଥ ମାହାର, ରାଜ୍ୟ କୋଷାଧକ୍ଷ ବିପିନ ବିହାରୀ ପାତ୍ର, ପୂର୍ବତନ ରାଜ୍ୟ ସଭାପତି ସୁଧୀର କର୍ଣ୍ଣ, କାର୍ଯ୍ୟକାରୀ ସଦସ୍ୟ ଭୂଷଣ ପାତ୍ର, ପ୍ରଫୁଲ୍ଲ କୁମାର ବଘାର, କୃଷ୍ଣଚନ୍ଦ୍ର ମହାକୁର, ଦେବଯାନୀ ମେସୁଆ, ବୌଦ୍ଧ ଜିଲା ସଭାପତି ସୀତାଂଶୁ ଶେଖର ମହାକୁଡ଼, ସୁବର୍ଣ୍ଣପୁର ଜିଲା ସଭାପତି ଅଶ୍ୱିନୀ ମହାକୁର, ବଲାଙ୍ଗୀର ଜିଲା ସଭାପତି ଶ୍ରୀଯୁକ୍ତ ଶରତ ମହାକୁର, କଟକ ଜିଲା ସଭାପତି ପ୍ରଭାକର ପ୍ରଧାନ, ଖୋର୍ଦ୍ଧା ଜିଲା ସଭାପତି ବାମଦେବ ବଘାର, କନ୍ଧମାଳ ଜିଲା ସଭାପତି ବିମଳ କିଶୋର ମହାକୁଡ଼, ଦେବଗଡ଼ ଜିଲା ସମ୍ପାଦକ ଦିବ୍ୟକାନ୍ତ ପାତ୍ର, ରାଜ୍ୟ ଯୁବ ସମ୍ପାଦକ ବିଜୟ ରଞ୍ଜନ କର୍ମୀ ପ୍ରମୁଖ ସମ୍ମାନିତ ଅତିଥିଭାବେ ମଞ୍ଚାସୀନ ଥିଲେ ।
ସଭାମଞ୍ଚରେ ଡୁମାଳ ସମାଜର ସାଙ୍ଗଠନିକ ଏବଂ ସାମାଜିକ ନିୟମାବଳୀ, ସ୍ମରଣିକା ପତ୍ରିକା ନବଜାଗରଣ, ଶାକ୍ତ କବି ତଥା ବେଜି ପଦ୍ମନ କର୍ଣ୍ଣଙ୍କ ଦ୍ୱାରା ରଚିତ କୁସୁମାଞ୍ଜଳି ପୁସ୍ତକ ଉନ୍ମୋଚିତ ହୋଇଥିଲା। ମୁଖ୍ୟ ଅତିଥି ପୁରୋହିତ ଡୁମାଳ ସମାଜର ବରଗଡ଼ ଜିଲାରେ ଆବଶ୍ୟକ ହେଉଥିବା ଭବ୍ୟ ଡୁମାଳ ସଂସ୍କୃତି ଭବନ ନିର୍ମାଣ ପାଇଁ ସମସ୍ତ ପ୍ରକାର ଆର୍ଥିକ ସହାୟତା ପ୍ରଦାନ ପାଇଁ ଘୋଷଣା କରିଥିଲେ । ରାଜ୍ୟ ସଭାପତିମେଣ୍ଡଳଳୀ ବିବରଣୀ ପାଠ କରିଥିଲେ । ସମ୍ପାଦକ ଦେହୁରୀ ରାଜ୍ୟ ଡୁମାଳ ପରିଷଦର ୩ବର୍ଷର ବାର୍ଷିକ ବୈଠକ, କାର୍ଯ୍ୟକ୍ରମ ଓ କାର୍ଯ୍ୟପନ୍ଥାର ବିବରଣୀ ଉପସ୍ଥାପନା କରିଥିଲେ । ଦ୍ଵିତୀୟ ଅଧିବେଶନରେ ଡୁମାଳ ଜାତିର ମହିଳାମାନଙ୍କୁ ନେଇ ମହିଳା ଅଧିବେଶନ ହୋଇଥିଲା। ରାଜ୍ୟ ସଭାନେତ୍ରୀ କରନ ଏଥିରେ ସଭାପତିତ୍ୱ କରିଥିଲେ । ଏହି ଅଧିବେଶନରେ କଳାପଥର ମହାବିଦ୍ୟାଳୟର ଓଡ଼ିଆ ଅଧ୍ୟାପିକା ଦେବଯାନୀ ମେସୁଆ, ସିଣ୍ଡୋଲ ମହାବିଦ୍ୟାଳୟର ସଂସ୍କୃତ ଅଧ୍ୟାପିକା ଯଶୋବନ୍ତୀ ଭୋଇ, ଉଲୁଣ୍ଡା ମହାବିଦ୍ୟାଳୟର ଅଧ୍ୟାପିକା ମୀନାକୁମାରୀ ପ୍ରଧାନ, ବରଗଡ ଜିଲା ପ୍ରତିନିଧି ରୀନା କମ୍ପ, ସନ୍ତୋଷିନୀ ଦନ୍ତା, ଗାୟତ୍ରୀ ପ୍ରଧାନ, ପପଙ୍ଗା ଗ୍ରାମ ପଞ୍ଚାୟତର ସମିତିସଭ୍ୟା ମନ୍ଦାକିନୀ କର୍ଣ୍ଣ, ଅତାବିରା ଜୋନ -୪ର ପୂର୍ବତନ ଜିଲା ପରିଷଦ ସଭ୍ୟା ଶ୍ରୀମତୀ ମୀରା ବଘାର ପ୍ରମୁଖ ଯୋଗଦାନ କରିଥିଲେ ।
ତୃତୀୟ ଅଧିବେଶନରେ ରାଜ୍ୟ ସଭାପତି ମେଣ୍ଡଳୀଙ୍କ ସଭାପତିତ୍ୱରେ ବିଭିନ୍ନ ଜାତିଭିତ୍ତିକ ଅଭିଯୋଗର ସମାଧାନ କରାଯାଇଥିଲା । ବରଗଡ଼, ସମ୍ବଲପୁର, ସୁବର୍ଣ୍ଣପୁର, ବୌଦ୍ଧ, ବଲାଙ୍ଗୀର, ଅନୁଗୁଳ, ଦେବଗଡ଼, ଖୋର୍ଦ୍ଧା, ନୟାଗଡ, କନ୍ଧମାଳ, କଟକ ସମେତ ୧୧ ଜିଲାର ଜିଲା ସମ୍ପାଦକ ,ସମସ୍ତ କେନ୍ଦ୍ରର ସଭାପତି, ସମ୍ପାଦକ, କାର୍ଯ୍ୟକାରୀ ସଦସ୍ୟ, ସଦସ୍ୟବୃନ୍ଦ, ମହିଳା ସଦସ୍ୟା, ଜାତିଭାଇ ଏବଂ ମା’ ମାହେଶ୍ୱରୀ ସେନାର ସଦସ୍ୟମାନେ ଯୋଗଦାନ କରିଥିଲେ । ଶିକ୍ଷକ କେଶବ ଚନ୍ଦ୍ର ଛନ୍ଦ ମଞ୍ଚ ପରିଚାଳନା କରିଥିଲେ । ରାଜ୍ୟ ଯୁବ ସମ୍ପାଦକ କର୍ମୀ ଧନ୍ୟବାଦ ଅର୍ପଣ କରିଥିଲେ । ସନ୍ଧ୍ୟାରେ ଛୁମକୁ ଛୁମା ସାଂସ୍କୃତିକ ଅନୁଷ୍ଠାନ, ସିଂହେନପାଲି ଓ ମାଁ ସମଲେଶ୍ୱରୀ ସଂସ୍କୃତି ଗବେଷଣା କେନ୍ଦ୍ର, ତୋରାର କଳାକାରମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।