ଚେନ୍ନାଇ,୧୩।୩: ତାମିଲନାଡ଼ୁରେ ଚାଲିଥିବା ଭାଷା ବିବାଦ ମଧ୍ୟରେ ଷ୍ଟାଲିନ ସରକାର ବଡ଼ ନିଷ୍ପତ୍ତି ନେଇଛନ୍ତି। ବଜେଟ ସମୟରେ ସରକାର ଟଙ୍କାର ବ୍ୟବହାରୀକ ପ୍ରତୀକ ‘₹’ ହଟାଇ ତାମିଲ ଶବ୍ଦ ‘ரூ’’ ରଖିଛନ୍ତି। ଏହାକୁ ନେଇ ନୂଆ ବିବାଦ ଉପୁଜିଛି। ଭାଜପା ଏହାକୁ ତାମିଲନାଡ଼ୁର ଅପମାନ ବୋଲି କହୁଛି।
ଏବେ ପ୍ରଶ୍ନ ଉଠୁଛି ଯେ ଷ୍ଟାଲିନ ସରକାର ଜାରି କରିଥିବା ନୂଆ ପ୍ରତୀକ ଆସିଲା କେଉଁଠୁ। କାରଣ ‘₹’କୁ ତାମିଲନାଡ଼ୁର ହିଁ ବ୍ୟକ୍ତି ଡିଜାଇନ୍ କରିଥିଲେ। ତାଙ୍କ ବାପା ଡିଏମ୍କେର ପୂର୍ବ ବିଧାୟକ ମଧ୍ୟ ଥିଲେ।
ଟଙ୍କାର ପ୍ରତୀକକୁ ଆଇଆଇଟି ମୁମ୍ବାଇର ଛାତ୍ର ଉଦୟ କୁମାର ନିର୍ମାଣ କରିଥିଲେ। ତାଙ୍କ ଜନ୍ମ ତିରୁବନ୍ନାମଲାଇ ନିକଟରେ ହୋଇଥିଲା। ଉଦୟଙ୍କ ବାପା ଧର୍ମଲିଙ୍ଗମ୍ ଡିଏମ୍କେର ପୂର୍ବ ବିଧାୟକ ଥିଲେ। ଏବେ ଏହାକୁ ନେଇ ଭାଜପା ଷ୍ଟାଲିନ ସରକାରଙ୍କୁ ଘେରିଛି।
ଭାଜପା ଆଇଟି ସେଲ୍ ମୁଖ୍ୟ ଅମିତ ମାଳବିୟ ଷ୍ଟାଲିନଙ୍କ ନିଷ୍ପତ୍ତିକୁ ତାମିଲନାଡ଼ୁର ଅପମାନ ବୋଲି ଲେଖି କହିଛନ୍ତି, ଉଦୟ କୁମାର ଧର୍ମଲିଙ୍ଗମ ଜଣେ ଭାରତୀୟ ଶିକ୍ଷାବିତ୍ ତଥା ଡିଜାଇନର, ଯିଏକି ଡିଏମ୍କେର ପୂର୍ବତନ ବିଧାୟକଙ୍କ ପୁଅ। ସେ ଭାରତୀୟ ଟଙ୍କାର ପ୍ରତୀକକୁ ଡିଜାଇନ କରିଥିଲେ, ଏହାକୁ ଭାରତବାସୀ ସ୍ବୀକାର କରିଥିଲେ। ମୁଖ୍ୟମନ୍ତ୍ରୀ ଏମ୍କେ ଷ୍ଟାଲିନ ତାମିଲନାଡ଼ୁ ବଜେଟ ୨୦୨୫-୨୬ର କାଗଜପତ୍ରରେ ଏହି ଚିହ୍ନକୁ ହଟାଇ ତାମିଲମାନଙ୍କ ଅପମାନ କରିଛନ୍ତି। ଜଣେ କିଭଳି ଏଭଳି ହାସ୍ୟାସ୍ପଦ କାମ କରିପାରେ?
ଏବେ ଭାଜପାର କଟାକ୍ଷ ପରେ ଷ୍ଟାଲିନ କେନ୍ଦ୍ର ସରକାରଙ୍କୁ ବିରୋଧ କରିବାକୁ ଯାଇ ଫସି ଯାଇଥିବା କୁହାଯାଇଛି। କାରଣ ଯେଉଁ ତାମିଲ ବ୍ୟକ୍ତିଙ୍କ ଡିଜାଇନକୁ ସାରା ଭାରତ ସ୍ବୀକାର କରିଥିଲା, ତାହାକୁ ତାମିଲନାଡ଼ୁ ସରକାର ଅସ୍ବୀକାର କରୁଥିବା ଭାଜପା କହୁଛି।
