ପୁରୀ,୧୪।୩(ଅଜିତ୍ କୁମାର ମହାନ୍ତି): ପବିତ୍ର ଫାଲୁଗନ ମାସ ପୂର୍ଣ୍ଣିମା ତଥା ଦୋଳ ପୂର୍ଣ୍ଣିମା ଅବସରରେ ଶୁକ୍ରବାର ଶ୍ରୀମନ୍ଦିରରେ ଶ୍ରୀବିଗ୍ରହଙ୍କ ସୁନାବେଶ ବା ରାଜରାଜେଶ୍ୱର ବେଶ ସମ୍ପନ୍ନ ହେବା ସହ ଦୋଳବେଦୀରେ ଦୋଳ ପୂର୍ଣ୍ଣିମା ନୀତି ପାଳିତ ହୋଇଯାଇଛି।
ମହାପ୍ରଭୁଙ୍କ ଦ୍ୱାଦଶ ଯାତ୍ରା ମଧ୍ୟରୁ ଅନ୍ୟତମ ପ୍ରମୁଖ ଯାତ୍ରା ହେଉଛି ଦୋଳଯାତ୍ରା ବା ଦୋଳପୂର୍ଣ୍ଣମୀ। ଶ୍ରୀମନ୍ଦିରରେ ଫାଲଗୁନ ଶୁକ୍ଳ ଦଶମୀଠାରୁ ଚୈତ୍ର ଶୁକ୍ଳ ପ୍ରତିପଦା ପର୍ଯ୍ୟନ୍ତ ଏକ ସପ୍ତାହ ବ୍ୟାପୀ ଦୋଳଉତ୍ସବ ଓ ଦୋଳଯାତ୍ରା ଅନୁଷ୍ଠିତ ହୋଇଥାଏ। ତେବେ ମହାପ୍ରଭୁଙ୍କ ଦୋଳତ୍ସବ ଓ ସୁନାବେଶ ଦର୍ଶନର ସୁଯୋଗ ଶ୍ରଦ୍ଧାଳୁମାନେ ପାଇ କୁତାର୍ଥ ହୋଇଛନ୍ତି।
ଶ୍ରୀମନ୍ଦିରରେ ମଙ୍ଗଳ ଆଳତୀ ଓ ଅବକାଶ ନୀତି ପରେ ଖଇକୋରା ଭୋଗ କରାଯାଇ ମହାପ୍ରଭୁଙ୍କୁ ସୁନାବେଶରେ ସଜ୍ଜିତ କରିଥିଲେ ସେବାୟତ। ଏହି ବେଶ ଦର୍ଶନ ପାଇଁ ଓ ଦୋଳତ୍ସବରେ ସାମିଲ ହେବା ପାଇଁ ଶ୍ରୀମନ୍ଦିରରେ ପ୍ରବଳ ଜନସମାଗମ ହୋଇଥିଲା। ନିଦ୍ଧାରିତ ସମୟଠାରୁ ନୀତିରେ ବିଳମ୍ବ ଯୋଗୁ ବହୁତ ଭକ୍ତ ଘଣ୍ଟାଘଣ୍ଟା ଧରି ଅପେକ୍ଷା କରିବାକୁ ପଡିଥିଲା।
ଶ୍ରୀମନ୍ଦିରରେ ମହାପ୍ରଭୁଙ୍କ ସୁନାବେଶ ଓ ଅନ୍ୟାନ୍ୟ ନୀତିକାନ୍ତି ସରିବା ପରେ ଆଜ୍ଞାମାଳ ପାଇଁ ମହାପ୍ରଭୁଙ୍କ ଚଳନ୍ତିପ୍ରତିମା ଦୋଳଗୋବିନ୍ଦ, ଭୂଦେବୀ, ଶ୍ରୀଦେବୀ ରତ୍ନ ସିଂହାସନର ଚାରିପାଖରେ ୭ ଘେରା ପରିକ୍ରମା କରିଥିଲେ। ପରେ ନାଭିକଟା ମଣ୍ଡପକୁ ବିଜେ କରିଥିଲେ । ସେଠାରେ ଚଳନ୍ତି ପ୍ରତିମାଙ୍କ ବନକ ଲାଗି ନୀତି କରାଯାଇ ଭୋଗ ବନ୍ଦାପନା କରାଯାଇଥିଲା ।
ନୀତି ସମ୍ପନ୍ନ ପରେ ଚଳନ୍ତି ପ୍ରତିମାଙ୍କୁ ମଣି ବିମାନରେ ବିଜେ କରାଯାଇ ଶ୍ରୀମନ୍ଦିର ଭିତର ବେଢା ୭ଥର ପ୍ରଦିକ୍ଷଣ କରିଥିଲେ । ଭକ୍ତଙ୍କ ହରିବୋଲ, ହୁଳହୁଳି ଧ୍ୱନି ସହ ଫଗୁ, ଅବିର ଖେଳ ମଧ୍ୟରେ ଠାକୁରଙ୍କ ବିମାନ ଦୋଳବେଦୀକୁ ବିଜେ କରି ଦୋଳବେଦୀ ତଳେ ଓ ଉପରେ ଏବଂ ଦୋଳି ଚାରିପାଖରେ ସାତଘେରା ଲେଖାଏଁ ଏପରୀ ମୋଟ ୨୧ ଘେରା ପ୍ରଦକ୍ଷଣ କରିବା ପରେ ବେଦୀରେ ବସି ଝୁଲିଥିଲେ।
ପରେ ମହାପ୍ରଭୁଙ୍କ ଅନ୍ୟନ୍ୟ ନୀତି, କାନ୍ତି ଦୋଳବେଦୀରେ ଅନୁଷ୍ଠିତ ହୋଇଥିଲା। ଦୋଳବେଦୀ ସେ ସମସ୍ତ ନୀତିକ୍ରାନ୍ତି ସାରି ବିଳମ୍ବିତ ରାତିରେ ଠାକୁର ଠାକୁରାଣୀ ଶ୍ରୀମନ୍ଦିରକୁ ବାହୁଡା ବିଜେ କରିବେ।
ସେହିପରି ଚୈତ୍ର ମାସ କୃର୍ଷ୍ଣ ପ୍ରତିପ୍ରଦା ତିଥି ଶନିବାର ଅବସରରେ ଚନ୍ଦନ ଅନୁକୂଳ ନୀତି ସମ୍ପନ୍ନ ହୋଇଛି । ମଧ୍ୟାହ୍ନ ଧୂପ ପରେ ଆଜ୍ଞାମାଳ ପାଇ ଦୋଳଗୋବିନ୍ଦ, ଶ୍ରୀଦେବୀ ଏବଂ ଭୂବେଦୀ ମଣି ବିମାନରେ ଚନ୍ଦନଚକଡାକୁ ବୀଜେ କରି ସେଠାରେ ଚନ୍ଦନ ଅନୁକୂଳ ନୀତି ସମ୍ପାଦନ କରି ଶ୍ରୀମନ୍ଦିରକୁ ବାହୁଡା ବିଜେ କରିବେ।
