ଜୋହାନ୍ସବର୍ଗ,୩।୧: ଦକ୍ଷିଣ ଆଫ୍ରିକା ବିପକ୍ଷରେ ଏଠାରେ ଚାଲିଥିବା ଦ୍ୱିତୀୟ ଟେଷ୍ଟ ମ୍ୟାଚ୍ରେ ବିପର୍ଯ୍ୟୟର ସମ୍ମୁଖୀନ ହୋଇଛି ଟିମ୍ ଇଣ୍ଡିଆ। ପ୍ରଥମ ଦିନର ୨ୟ ସେସନ ଶେଷ ସୁଦ୍ଧା ଭାରତ ୫ ଉଇକେଟ ହରାଇ ୧୪୬ ରନ୍ କରିଛି। ରିଷଭ ପନ୍ତ ୧୩ ଓ ରବିଚନ୍ଦ୍ରନ ଅଶ୍ୱିନ ୨୪ ରନ୍ କରି ଅପରାଜିତ ଅଛନ୍ତି।
ଭ୍ରମଣକାରୀ ଦଳର ବ୍ୟାଟରଙ୍କ ବିପକ୍ଷରେ ଘରୋଇ ବୋଲରଙ୍କ ପାଇଁ ମୁଖ୍ୟ ଅସ୍ତ୍ର ପାଲଟିଛି ଶର୍ଟ ପିଚ୍ ବଲ। ଏପର୍ଯ୍ୟନ୍ତ ଆଉଟ୍ ହୋଇଥିବା ୫ରୁ ୪ ବ୍ୟାଟର ଶର୍ଟ ପିଚ୍ ବଲରେ କ୍ୟାଚ୍ ଆଉଟ୍ ହୋଇ ପ୍ୟାଭିଲିଅନ ଫେରିଛନ୍ତି। ପ୍ରଥମ ଥର ପାଇଁ ଅଧିନାୟକ ଭାର ସମ୍ଭାଳିଥିବା ଲୋକେଶ ରାହୁଲ (୫୦ ରନ୍, ୯ ଚୌକା) ଅର୍ଦ୍ଧଶତକ ପୂରଣ କରିବା ପରେ ଆଉଟ୍ ହୋଇଥିଲେ। ମୟଙ୍କ ଅଗ୍ରଓ୍ବାଲ (୨୬), ଚେତେଶ୍ୱର ପୂଜାରା (୩), ହନୁମା ବିହାରୀ (୨୦)ଙ୍କ ଭଳି ରାହୁଲ ମଧ୍ୟ ଶର୍ଟ ପିଚ୍ରେ ହରାଇଥିଲେ ଉଇକେଟ। ବରିଷ୍ଠ ମଧ୍ୟକ୍ରମ ବ୍ୟାଟର ଅଜିଙ୍କ୍ୟ ରାହାନେ ପ୍ରଥମ ବଲରେ ଖାତା ଖୋଲିବା ପୂର୍ବରୁ ଆଉଟ୍ ହୋଇଥିଲେ। ଘରୋଇ ବୋଲରଙ୍କ ମଧ୍ୟରେ ମାର୍କୋ ଜାନସେନ ଓ ଡୁଆନେ ଓଲିଭର ୨ ଲେଖାଏ ଉଇକେଟ ହାସଲ କରିଛନ୍ତି।
