କେନ୍ଦୁଝର,୧୯ା୧: ପାଠପଢ଼ା ସହ ଫଟୋଗ୍ରାଫିକୁ ନିଶା ଭାବେ ଗ୍ରହଣ କରିଛନ୍ତି। ନିଜର କଳା ମାଧ୍ୟମରେ ଅଞ୍ଚଳରେ ଯୁବ ସୁଲଭ ପ୍ରତିଭା ଭାବେ ନିଜକୁ ପରିଚିତ କରିପାରିଛନ୍ତି। ବିଭିନ୍ନ ପ୍ରତିଯୋଗିତାରେ ଭାଗ ନେଇ ପୁରସ୍କୃତ ହେବା ସହ କ୍ଷୁଦ୍ର ଚଳଚ୍ଚିତ୍ରରେ କାମ କରିଛନ୍ତି। ଏଭଳି ଜଣେ ଯୁବ ପ୍ରତିଭା ହେଲେ କେନ୍ଦୁଝର ସହରର ଢେଙ୍କାପୁର ଶାସନ ନିବାସୀ ଅକ୍ଷୟ ଦାଶ ଓ ସବିତା ଦାଶଙ୍କ ପୁତ୍ର ସୌମ୍ୟଜିତ୍ ଦାଶ।
ସୌମ୍ୟ ସେଣ୍ଟ ଜାଭିୟର ହାଇସ୍କୁଲର ଏକାଦଶ ଶ୍ରେଣୀରେ ଅଧ୍ୟୟନ କରୁଥିବା ବେଳେ ପାଠପଢ଼ା ଭିତରେ ତାଙ୍କର ଫଟୋଗ୍ରାଫି ପ୍ରତି ନିଶା ତାଙ୍କୁ ବହୁ ସମ୍ମାନର ଅଧିକାରୀ କରିଛି। ସେ ଯୁବପିଢ଼ିଙ୍କ ମନକୁ ଛୁଇଁଲା ଭଳି ସୁନ୍ଦର ଏବଂ ନୂତନ ଭାବରେ ନିଜସ୍ବ ଶୈଳୀରେ ଫଟୋ ଉଠାଇ ବହୁ କମ୍ ବୟସରେ ଅଞ୍ଚଳରେ ଲୋକପ୍ରିୟ ହୋଇପାରିଛନ୍ତି। ତାଙ୍କର ଫଟୋଗ୍ରାଫି ପ୍ରତି ଆଗ୍ରହ ଦେଖି ତାଙ୍କ ମାତାପିତା ତାଙ୍କୁ ଉସତ୍ାହିତ କରି ଆସିଥିବାର ସୌମ୍ୟଜିତ୍ ପ୍ରକାଶ କରିଛନ୍ତି। ଆଗକୁ ଫଟୋଗ୍ରାଫିରେ କ୍ୟାରିୟର କରିବାକୁ ଆଶାବାଦୀ ମଧ୍ୟ ରହିଛନ୍ତି। ସେ ଫଟୋଗ୍ରାଫି ଇତିମଧ୍ୟରେ ଗ୍ଲୋବାଲ ଫଟୋଗ୍ରାଫି ପ୍ରତିଯୋଗିତା, ସ୍ନାପ୍ ଇଣ୍ଡିଆ, ନେହେରୁ ଯୁବକେନ୍ଦ୍ର ପରି ବହୁ ସଂଗଠନରୁ ପୁରସ୍କୃତ ହୋଇଛନ୍ତି। ଏଥିସହ ସିନେଲାବ୍ ପ୍ରଡକ୍ସନର ନୂଆ ସଂକ୍ଷିପ୍ତ ଚଳଚ୍ଚିତ୍ର ‘ସମାରୀ’ରେ ଫଟୋଗ୍ରାଫି ନିର୍ଦ୍ଦେଶକ ଭାବେ କାର୍ଯ୍ୟ କରିଛନ୍ତି। ଭବିଷ୍ୟତରେ ଜଣେ ଦକ୍ଷ ଫଟୋଗ୍ରାଫର ଭାବେ ନିଜକୁ ପ୍ରତିପାଦିତ କରିବାକୁ ସ୍ବପ୍ନ ଦେଖିଥିବା ସେ କହିଛନ୍ତି।
ଦୀପକ ମିଶ୍ର
