ଖଇରା,୨୪।୩(ଉତ୍କଳ ବନ୍ଧୁ ପଣ୍ଡା ): ବାଲେଶ୍ବର ଜିଲା ଖଇରା ଥାନା ଝିଙ୍କିରିଆ ପଞ୍ଚାୟତ ଅଧୀନ ମୁସ୍ତଫାବାଦ ଗ୍ରାମରେ ପୁଅର ଆକ୍ରମଣରେ ବାପା ଲହୁଲୁହାଣ ହେବା ପରେ ବାପାର ପୈତୃକ ଘରକୁ ଭାଙ୍ଗିରୁଜି ନଷ୍ଟ କରିଥିବା ଅଭିଯୋଗ ହୋଇଛି। କେବଳ ଘରକୁ ଭାଙ୍ଗିନାହିଁ ବାପାଙ୍କୁ ପାଣି ନଦେବା ଲକ୍ଷ୍ୟରେ ନଳକୂପକୁ ମଧ୍ୟ ଭାଙ୍ଗି ଦେଇଛନ୍ତି। ଗ୍ରାମବାସୀଙ୍କ ଅଭିଯୋଗ ପରେ ଖଇରା ପୋଲିସ ଘଟଣାସ୍ଥଳରେ ପହଞ୍ଚି ପୁଅ ବିଦ୍ୟାଧର ଗିରି ଏବଂ ସହଯୋଗୀ ଆନନ୍ଦ ଗିରି ଓ ସତ୍ୟଜିତ ଗିରିଙ୍କୁ ଉଠାଇ ନେଇଛି। ବାପା ପ୍ରହଲ୍ଲାଦ ଗିରି(୭୫)ର ଏକମାତ୍ର ପୁଅ ବିଦ୍ୟାଧର ଓ ଗୋଟିଏ ଝିଅ(ବିବାହିତ) ଥିବାବେଳେ ପୁଅ ବାପାଙ୍କୁ ଖାଇବା ପିଇବା ନ ଦେବାରୁ ଝିଅ ପ୍ରମିଳା ଜେନା ବାପାଙ୍କ ପାଖରେ ରହି ରୋଷେଇ କରି ଖାଇବାକୁ ଦେଉଥିଲେ। ବାପା କାଳେ ସମ୍ପତ୍ତିକୁ ଝିଅ ନାଁରେ କରିଦେବେ ସେହି ସନ୍ଦେହରେ ବାପା ଉପରେ ଅନେକ ସମୟରେ ଅତ୍ୟାଚାର କରୁଥିଲେ ପୁଅ। ବାପା ୨ଦିନ ତଳେ ଏ ସମ୍ପର୍କରେ ଖଇରା ଥାନାରେ ଅଭିଯୋଗ କରିଥିଲେ। ଏଥିରେ ଉତ୍ତ୍ୟକ୍ତ ହୋଇ ବିଦ୍ୟାଧର ମଙ୍ଗଳବାର ସକାଳେ ନିଜ କିଛି ସମ୍ପର୍କିୟ ଭାଇଙ୍କୁ ଧରି ଏଭଳି ଅମାନବିୟ କାଣ୍ଡ ଘଟାଇଥିବା ଜଣାପଡିଛି।
