ଆଜିକାଲି ଲୋକମାନେ ପ୍ରସିଦ୍ଧ ହେବାକୁ ଯେକୌଣସି ସ୍ତରକୁ ଯିବାକୁ ପ୍ରସ୍ତୁତ। ବିଶେଷକରି ସୋସିଆଲ ମିଡିଆରେ ଫଲୋଅର୍ସ ବଢାଇବା ପାଇଁ କିଛି ବି କରିବାକୁ ପ୍ରସ୍ତୁତ ଅଛନ୍ତି। ଚାଇନାର ପ୍ରସିଦ୍ଧ ସୋସିଆଲ ମିଡିଆ ବ୍ୟବହାରକାରୀ ଲୁଓ ଶାଓ ମାଓ ମାଓଙ୍କ ସହ ମଧ୍ୟ ସମାନ ଘଟଣା ଘଟିଛି। ସୋସିଆଲ ମିଡିଆରେ ଲାଇଭ ଷ୍ଟ୍ରିମିଂ କରୁଥିବାବେଳେ ଲୁଓ ଶାଓ କୀଟନାଶକ ପିଇଦେଇଥିଲେ। ଫଳରେ ତାଙ୍କର ମୃତ୍ୟୁ ଘଟିଛି। ସବୁଠୁ ଆଶ୍ଚର୍ଯ୍ୟ କଥା ହେଉଛି ତାଙ୍କ ଫଲୋଅର୍ସମାନେ ତାଙ୍କୁ କୀଟନାଶକ ପିଇବାକୁ ଉସ୍କାଉଥିବାରୁ ସେ ଏପରି ଚରମ ନିଷ୍ପତ୍ତି ନେଇଥିଲେ।
କୀଟନାଶକ ପିଇବାର କରିବାର କିଛି ମିନିଟ ମଧ୍ୟରେ ଲୁଓ ଶାଓଙ୍କ ସ୍ବାସ୍ଥ୍ୟ ଖରାପ ହେବାକୁ ଲାଗିଲା। ସେ ନିଜେ ଆମ୍ବୁଲାନ୍ସକୁ ଡାକିଥିଲେ। ଆମ୍ବୁଲାନ୍ସ ତାଙ୍କୁ ତୁରନ୍ତ ଡାକ୍ତରଖାନା ନେଇଥିଲା। ସେତେବେଳକୁ ବହୁତ ଡେରି ହୋଇଯାଇଥିଲା। ଡାକ୍ତରଙ୍କ ବହୁ ଉଦ୍ୟମ ପରେ ମଧ୍ୟ ମାଓଙ୍କୁ ବଞ୍ଚାଇ ଯାଇ ପାରି ନ ଥିଲା। ଶେଷ ଭିଡିଓରେ ମାଓ ତାଙ୍କ ଫଲୋଅର୍ସମାନଙ୍କୁ କହିଥିଲେ, ବୋଧହୁଏ ଏହା ମୋର ଶେଷ ଭିଡିଓ କାରଣ ମୁଁ ଦୀର୍ଘ ଦିନ ଧରି ଡିପ୍ରେସନରେ ଅଛି।
ଡୋଇନ ନାମକ ସୋସିଆଲ ମିଡିଆ ପ୍ଲାଟଫର୍ମରେ ମାଓଙ୍କର ୬୭୦,୦୦୦ରୁ ଅଧିକ ଫଲୋଅର୍ସ ଅଛନ୍ତି। ୧୪ ଅକ୍ଟୋବରରେ ଏହି ଘଟଣା ଘଟିଥିଲା। ମାଓଙ୍କର ଜଣେ ବନ୍ଧୁ କଥିଛନ୍ତି ଯେ, ପ୍ରେମିକ କାରଣରୁ ଡିପ୍ରେସନ୍ରେ ଥିଲେ ମାଓ। କୀଟନାଶକ ଖାଇ ନିଜକୁ ମାରିବାକୁ ଉଦ୍ୟମ କରୁଥିଲେ। କେବଳ ତାଙ୍କ ପ୍ରେମିକଙ୍କ ଦୃଷ୍ଟି ଆକର୍ଷଣ କରିବାକୁ ଚାହୁଁଥିଲେ। କିନ୍ତୁ ବିଭିନ୍ନ ଚାଇନା ଗଣମାଧ୍ୟମରେ ଆଲୋଚନା ହେଉଛି କି, ମାଓ ଫଲୋଅର୍ସ କହିବା ଯୋଗୁ ଏଭଳି ନିଷ୍ପତ୍ତି ନେଇଛନ୍ତି।
