ଭୁବନେଶ୍ୱର,୨।୧୨: ପୁରୀ ଶ୍ରୀ ଜଗନ୍ନାଥ ମନ୍ଦିରକୁ ନେଇ ଅବିବାହିତ ପ୍ରେମୀ ଯୁଗଳଙ୍କ ଉପରେ ଦେଇଥିବା ବିବାଦୀୟ ମନ୍ତବ୍ୟ ପରେ ଖବରଦାତା ତଥା ସୋସିଆଲ ମିଡିଆ ଇନଫ୍ଲୁଏନ୍ସର୍ ଶୁଭଙ୍କର ମିଶ୍ର ମଙ୍ଗଳବାର ଶ୍ରୀଜଗନ୍ନାଥଙ୍କ ଭକ୍ତଙ୍କ ନିକଟରେ କ୍ଷମା ପ୍ରାର୍ଥନା କରିଛନ୍ତି। ତେବେ, ସେ ସିଧାସଳଖ ନିଜର ଦୋଷ ସ୍ୱୀକାର କରିନାହାଁନ୍ତି।
ସେ ତାଙ୍କ ୟୁଟ୍ୟୁବ୍ ଚ୍ୟାନେଲରେ ଏକ ଭିଡିଓ ପୋଷ୍ଟ କରି କହିଛନ୍ତି ଯେ ତାଙ୍କ ପୂର୍ବର ମନ୍ତବ୍ୟ ବ୍ୟକ୍ତିଗତ କଳ୍ପନା ଉପରେ ଆଧାରିତ ନୁହେଁ। ସେ କହିଛନ୍ତି, “ବିଭିନ୍ନ ୱେବସାଇଟ୍ ରେ ଏହିପରି ବିଶ୍ୱାସଗୁଡିକ ବିଷୟରେ ଉଲ୍ଲେଖ କରାଯାଇଛି। ମୁଁ ନିଜେ କିଛି ତିଆରି କରିନାହିଁ।” ବିବାଦ ବଢ଼ିବା ପରେ ସେ ଉକ୍ତ ବିବାଦୀୟ ଭିଡିଓକୁ ହଟାଇ ଦେଇଛନ୍ତି ବୋଲି ସୂଚନା ଦେଇଛନ୍ତି।
ସେ ଆହୁରି ମଧ୍ୟ କହିଛନ୍ତି, “ମୁଁ କୌଣସି ଗୁଜବ ପ୍ରଚାର କରିନାହିଁ, କିମ୍ବା ଜାଣତରେ କାହାର ଧାର୍ମିକ ଭାବନାକୁ ଆଘାତ ଦେଇନାହିଁ। ପରମ୍ପରା ଯେପରି ବର୍ଣ୍ଣିତ ଅଛି, ମୁଁ କେବଳ ତାହା ଉଲ୍ଲେଖ କରିଛି। ଯଦି ମୋ କଥାରେ କାହାର ଭାବନା ଆଘାତ ପାଇଥାଏ, ତେବେ ମୁଁ କ୍ଷମା ଭିକ୍ଷା କରୁଛି।”
ଶୁଭଙ୍କର ମିଶ୍ର ନିଜ ଭିଡିଓରେ ଦାବି କରିଥିଲେ ଯେ ବିବାହ ପୂର୍ବରୁ ଅବିବାହିତ ପ୍ରେମୀ ଯୁଗଳ ଶ୍ରୀମନ୍ଦିରକୁ ଗଲେ ସେମାନଙ୍କ ସମ୍ପର୍କ ଭାଙ୍ଗିଯାଇପାରେ କିମ୍ବା ସେମାନେ ବିବାହ କରିପାରନ୍ତି ନାହିଁ। ଏହି ବିଶ୍ୱାସର କାରଣ ସେ ମା’ ରାଧାରାଣୀଙ୍କ ଏକ ଅଭିଶାପକୁ ଦର୍ଶାଇ ଏକ କାହାଣୀ ବର୍ଣ୍ଣନା କରିଥିଲେ, ଯେଉଁଥିରେ ସେବାୟତମାନେ ରାଧାରାଣୀଙ୍କୁ ମନ୍ଦିରରେ ପ୍ରବେଶ କରିବାକୁ ଅଟକାଇବାରୁ ସେ କ୍ରୋଧିତ ହୋଇ ଅଭିଶାପ ଦେଇଥିଲେ ବୋଲି କହିଥିଲେ।
ଏହି ମନ୍ତବ୍ୟକୁ ନେଇ ଭକ୍ତ ଓ ସୋସିଆଲ ମିଡିଆ ବ୍ୟବହାରକାରୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଏହି ସମୟରେ, ଶ୍ରୀମନ୍ଦିରର ବରିଷ୍ଠ ସେବାୟତ ଗୌରହରି ପ୍ରଧାନ ସିଂହଦ୍ୱାର ଥାନାରେ ଏକ ଏତଲା ଦେଇ ଶୁଭଙ୍କର ମିଶ୍ରଙ୍କୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି।
