ଇଟାନଗର,୨୫ ।୧୨: ଭାରତୀୟ ଜନତା ପାର୍ଟି(ଭାଜପା) ନିଜ ସହଯୋଗୀ ଦଳ ଜନତା ଦଳ ୟୁନାଇଟେଡ(ଜେଡିୟୁ)କୁ ଝଟ୍କା ଦେଇଛି । ବିହାରରେ ନୀତୀଶ ସରକାରରେ ସାମିଲ ଭାଜପା ଅରୁଣାଚଳ ପ୍ରଦଶରେ ନୀତୀଶଙ୍କ ଦଳର ୬ ବିଧାୟକଙ୍କୁ ନିଜ ଦଳରେ ସାମିଲ କରି ଦେଇଛି । ରାଜ୍ୟ ବିଧାନସଭା ଅନୁଯାୟୀ, ପିପୁଲ୍ସ ପାର୍ଟି ଅଫ୍ ଅରୁଣାଚଳ ପ୍ରଦେଶ(ପିପିଏ)ର ଲିକାବାଲି ନିର୍ବାଚନ ମଣ୍ଡଳୀର ବିଧାୟକ କରଦୋ ନିଗୟୋର ବି ଭାଜପାରେ ସାମିଲ ହୋଇ ଯାଇଛନ୍ତି । ପଞ୍ଚାୟତ ଓ ନଗର ନିଗମ ନିର୍ବାଚନ ଫଳାଫଳ ଘୋଷଣାର ଗୋଟିଏ ଦିନ ପରେ ସେ ଭାଜପାରେ ସାମିଲ ହୋଇଛନ୍ତି । ସୂଚନାଯୋଗ୍ୟ, ଯେଉଁ ୬ ଜଣ ଜେଡିୟୁ ବିଧାୟକମାନେ ଭାଜପାରେ ସାମିଲ ହୋଇଛନ୍ତି ସେମାନଙ୍କ ମଧ୍ୟରୁ ୩ ଜଣଙ୍କୁ ୨୬ ନଭେମ୍ବରରେ ଦଳ ପକ୍ଷରୁ ଦଳ ବିରୋଧୀ କାର୍ଯ୍ୟ ପାଇଁ କାରଣ ଦର୍ଶାଅ ନୋଟିସ ଜାରି କରାଯିବା ସହ ଦଳରୁ ନିଲମ୍ବିତ କରାଯାଇଥିଲା ।
