ମୁମ୍ବାଇ: ଭାରତୀୟ ସଙ୍ଗୀତ ଜଗତର କିମ୍ବଦନ୍ତୀ ଗାୟିକା ଆଶା ଭୋସଲେଙ୍କୁ ନେଇ ଏକ ଚିନ୍ତାଜନକ ଖବର ସାମ୍ନାକୁ ଆସିଛି। ଶନିବାର ସାରେ ତାଙ୍କୁ ହୃଦଘାତ (Heart Attack) ହୋଇଛି। ଏଥିଯୋଗୁ ତାଙ୍କୁ ମୁମ୍ବାଇର ପ୍ରସିଦ୍ଧ ବ୍ରିଚ୍ କ୍ୟାଣ୍ଡି ହସ୍ପିଟାଲରେ ଭର୍ତ୍ତି କରାଯାଇଛି।
ଏପ୍ରିଲ ୧୧ ତାରିଖ ସା ପ୍ରାୟ ୭:୩୦ ସମୟରେ ତାଙ୍କୁ ଡାକ୍ତରଖାନା ଅଣାଯାଇଥିଲା। ବର୍ତ୍ତମାନ ସେ ଆଇସିୟୁ (ICU) ରେ ଅଛନ୍ତି ଏବଂ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଥିବା କୁହାଯାଉଛି। ବ୍ରିଚ୍ କ୍ୟାଣ୍ଡି ହସ୍ପିଟାଲର ଡାକ୍ତର ପ୍ରତୀତ ସାମଦାନୀ ଏହି ଖବରକୁ ନିଶ୍ଚିତ କରିଛନ୍ତି।
ହସ୍ପିଟାଲ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଗାୟିକା ଜଣକ ଅସ୍ବାଭାବିକ ଅନୁଭବ କରିବା ସହ ପ୍ରବଳ ମୁଣ୍ଡବିନ୍ଧା ଅଭିଯୋଗ କରିଥିଲେ, ଯାହା ପରେ ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା। ଏପର୍ଯ୍ୟନ୍ତ ପରିବାର ପକ୍ଷରୁ କୌଣସି ଆଧିକାରିକ ବିବୃତ୍ତି ଜାରି କରାଯାଇ ନାହିଁ। ହସ୍ପିଟାଲ ବାହାରେ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ ମଧ୍ୟ ସ୍ବାସ୍ଥ୍ୟାବସ୍ଥା ସମ୍ପର୍କରେ କୌଣସି ଅଧିକ ସୂଚନା ମିଳିପାରି ନାହିଁ। ଏହି ଖବର ପ୍ରଚାରିତ ହେବା ପରେ ସଙ୍ଗୀତ ପ୍ରେମୀ ଏବଂ ତାଙ୍କର ପ୍ରଶଂସକମାନେ ଚିନ୍ତା ପ୍ରକଟ କରିବା ସହ ତାଙ୍କର ଆଶୁ ଆରୋଗ୍ୟ କାମନା କରିଛନ୍ତି।
ଆଶା ଭୋସଲେ ସଂଗୀତ ଜୀବନ ଦେଖିଲେ, ସେ ନିଜର ଦୀର୍ଘ ୭ ଦଶନ୍ଧିର କ୍ୟାରିୟରରେ ପ୍ରାୟ ୧୬,୦୦୦ ରୁ ଅଧିକ ଗୀତ ଗାଇଛନ୍ତି। ୧୯୪୮ ମସିହାରେ ‘ଚୁନରିଆ’ ଚଳଚ୍ଚିତ୍ରର ‘ସାୱନ ଆୟା ହୈ’ ଗୀତରୁ ସେ ନିଜର ଯାତ୍ରା ଆରମ୍ଭ କରିଥିଲେ। ସେ କେବଳ ହିନ୍ଦୀ ନୁହେଁ, ବରଂ ଓଡ଼ିଆ, ମରାଠୀ, ବଙ୍ଗଳା, ଗୁଜରାଟୀ, ତାମିଲ ଏବଂ ରୁଷୀୟ ଭଳି ଅନେକ ଭାଷାରେ ନିଜ କଣ୍ଠର ଯାଦୁ ବିଛେଇଛନ୍ତି। ବର୍ତ୍ତମାନ ସମସ୍ତେ ୯୨ ବର୍ଷୀୟା ଏହି ଗାୟିକାଙ୍କ ସ୍ବାସ୍ଥ୍ୟରେ ସୁଧାର ଆସିବାକୁ ଅପେକ୍ଷା କରିଛନ୍ତି।
