ନୂଆଦିଲ୍ଲୀ,୨୩ା୧୧: ସିନ୍ଧ ଅଞ୍ଚଳ ଆଜି ଭାରତର ଅଂଶ ନ ହୋଇପାରେ, କିନ୍ତୁ ସୀମା ବଦଳିପାରେ ଏବଂ ଏହି ଅଞ୍ଚଳ ପୁନର୍ବାର ଭାରତକୁ ଫେରିଆସିପାରେ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏକ କାର୍ଯ୍ୟକ୍ରମରେ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ ୧୯୪୭ ବିଭାଜନ ପରେ ସିନ୍ଧ ପ୍ରଦେଶ ପାକିସ୍ତାନକୁ ଯାଇଥିଲା। ତଥାପି, ସଭ୍ୟତା ଦୃଷ୍ଟିକୋଣରୁ ସିନ୍ଧ ସବୁବେଳେ ଭାରତର ଏକ ଅଂଶ ହୋଇ ରହିବ।
ଲାଲକୃଷ୍ଣ ଆଡଭାନୀଙ୍କ ପିଢ଼ିର ସିନ୍ଧୀ ହିନ୍ଦୁମାନେ ଆଜି ପର୍ଯ୍ୟନ୍ତ ସିନ୍ଧର ବିଚ୍ଛେଦକୁ ଗ୍ରହଣ କରିନାହାନ୍ତି ବୋଲି ସେ ଆଡଭାନୀଙ୍କ ପୁସ୍ତକରୁ ଉଦ୍ଧୃତ କରି କହିଛନ୍ତି। ସେହିପରି, ଭାରତର ହିନ୍ଦୁମାନେ ସିନ୍ଧୁ ନଦୀକୁ ପବିତ୍ର ମାନୁଥିବାବେଳେ, ସିନ୍ଧର ଅନେକ ମୁସଲମାନ ମଧ୍ୟ ଏହାର ଜଳକୁ ମକ୍କାର ‘ଆବ୍-ଏ-ଜମଜମ୍’ ଠାରୁ କମ୍ ପବିତ୍ର ମାନନ୍ତି ନାହିଁ।
ରାଜନାଥ ସିଂହ ଦୃଢ଼ତା ସହ କହିଛନ୍ତି, “ଆଜି ସିନ୍ଧର ଭୂମି ଭାରତର ଅଂଶ ନ ହୋଇପାରେ, କିନ୍ତୁ ସଭ୍ୟତା ଦୃଷ୍ଟିରୁ ସିନ୍ଧ ସବୁବେଳେ ଭାରତର ଅଂଶ ହୋଇ ରହିବ। ଏବଂ ଯେପର୍ଯ୍ୟନ୍ତ ଭୂମିର ପ୍ରଶ୍ନ, ସୀମା ବଦଳିପାରେ। କିଏ ଜାଣେ, ଆସନ୍ତାକାଲି ସିନ୍ଧ ପୁଣି ଭାରତକୁ ଫେରିଆସିପାରେ।”
ଏହା ପୂର୍ବରୁ ସେ ମରକ୍କୋରେ ମଧ୍ୟ କହିଥିଲେ ଯେ କୌଣସି ଆକ୍ରମଣାତ୍ମକ ପଦକ୍ଷେପ ବିନା ହିଁ ଭାରତକୁ ପାକ୍ ଅଧିକୃତ କାଶ୍ମୀର (PoK) ଫେରିଆସିବ, କାରଣ ସେଠାକାର ଲୋକମାନେ କବ୍ଜାକାରୀଙ୍କଠାରୁ ମୁକ୍ତି ଦାବି କରୁଛନ୍ତି।
