ଭୁବନେଶ୍ୱର,୯ା୯: ନ୍ୟାଶନାଲ ହ୍ୟାଣ୍ଡଲୁମ୍ ଡେଭଲପମେଣ୍ଟ କର୍ପୋରେଶନ୍ (ଏନଏଚଡିସି) ଲିମିଟେଡ୍ ଏବଂ ବୟନ ମନ୍ତ୍ରଣାଳୟ ଓ ଅଫିସ ଅଫ ଡେଭଲପମେଣ୍ଟ କମିଶନରଙ୍କ ମିଳିତ ସହଯୋଗରେ ଭୁବନେଶ୍ୱରର ପ୍ରଦର୍ଶନୀ ପଡିଆ (ଏକ୍ରାମ ହାଟ ଆଇଡିସିଓ) ଠାରେ ଏକ ୧୪ ଦିନିଆ ସିଲ୍କ ଫାବ ପ୍ରଦର୍ଶନୀ ଓ ବିକ୍ରୟ ମେଳା ନିକଟରେ ଉଦଘାଟିତ ହୋଇଯାଇଛି। ବିଶେଷ କରି ଏହି ମେଳା ୨୦୨୩ ସେପ୍ଟେମ୍ବର ୧୮ ପର୍ଯ୍ୟନ୍ତ ଜାରି ରହିବ। ଉକ୍ତ ମେଳାରେ ୧୬ ରାଜ୍ୟର ୬୦ବ୍ୟବସାୟୀ (ଏଜେନ୍ସି) ଅଂଶ ଗ୍ରହଣ କରିଛନ୍ତି। ବିଶେଷ କରି ଉକ୍ତ ମେଳାରେ ବନାରସୀ, ଜାମଦାନି,ବାଲୁଚାରି, ମଧୁବାଣୀ, କୋସା ଏବଂ ଇକ୍କାଟ ଭଳି ରେଶମ ଦ୍ରବ୍ୟର ଅନେକ ରାଜ୍ୟର ସ୍ବତନ୍ତ୍ର ପୋଷାକ ଉପଲବ୍ଧ। ଅପରପକ୍ଷରେ ଭାରତ ସରକାର ହ୍ୟାଣ୍ଡଲୁମ୍ ଉତ୍ପାଦ ପାଇଁ ହ୍ୟାଣ୍ଡଲୁମ୍ ମାର୍କ ଯୋଜନା, ରେଶମ ଦ୍ରବ୍ୟର ସିଲ୍କ ମାର୍କ ଏବଂ ଉଚ୍ଚ ମାନର ହ୍ୟାଣ୍ଡଲୁମ୍ ଉତ୍ପାଦର ବ୍ରାଣ୍ଡିଂ ପାଇଁ ଇଣ୍ଡିଆ ହ୍ୟାଣ୍ଡଲୁମ୍ ବ୍ରାଣ୍ଡ ଯୋଜନା ଆରମ୍ଭ କରିଛନ୍ତି। ଯାହା ଶୂନ୍ୟ ତ୍ରୁଟି ଏବଂ ପରିବେଶ ଉପରେ ଶୂନ୍ୟ ପ୍ରଭାବ ପକାଇବ। ସେହିଭଳି ରେଶମ ଉତ୍ପାଦଗୁଡିକର ସ୍ବତନ୍ତ୍ରତାକୁ ଆଲୋକିତ କରିବା ସହିତ ଉକ୍ତ ଉତ୍ପାଦଗୁଡିକୁ ଏକ ସ୍ବତନ୍ତ୍ର ପରିଚୟ ମଧ୍ୟ କ୍ରେତାଙ୍କ ପାଇଁ ଗ୍ୟାରେଣ୍ଟି ପ୍ରଦାନ କରିଥାଏ। ବିଶେଷ କରି ସିଲ୍କ ଫାବରେ ଥିବା ସମସ୍ତ ପ୍ରଦର୍ଶକଙ୍କୁ ଉତ୍ପାଦଗୁଡ଼ିକରେ ‘ହ୍ୟାଣ୍ଡଲୁମ୍ ମାର୍କ’, ‘ସିଲ୍କ ମାର୍କ’ ଏବଂ ‘ଇଣ୍ଡିଆ ହ୍ୟାଣ୍ଡଲୁମ୍ ବ୍ରାଣ୍ଡ’ ଟ୍ୟାଗ୍ ପ୍ରଦର୍ଶନ କରିବାକୁ ଆୟୋଜକଙ୍କ ପକ୍ଷରୁ ଉତ୍ସାହିତ ସହ ହ୍ୟାଣ୍ଡଲୁମ୍ ବୁଣାକାର ସମ୍ପ୍ରଦାୟର ରୋଜଗାରରେ ମଧ୍ୟ ଉନ୍ନତି ଆଣିବାକୁ ଲକ୍ଷ୍ୟ ରଖାଯାଇଛି। ଏହି ପ୍ରଦର୍ଶନୀ ୨୦୨୩ ସେପ୍ଟେମ୍ବର ୧୮ ପର୍ଯ୍ୟନ୍ତ ପ୍ରତ୍ୟହ ସକାଳ ୧୧ ଘଟିକାରୁ ରାତ୍ର ୮ ଘଟିକା ପର୍ଯ୍ୟନ୍ତ ସର୍ବସାଧାରଣଙ୍କ ପାଇଁ ଖୋଲା ରହିବ ବୋଲି ଆୟୋଜକଙ୍କ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ, ବର୍ତ୍ତମାନ ଭାରତର ହ୍ୟାଣ୍ଡଲୁମ୍ ସେକ୍ଟରରେ ପ୍ରତ୍ୟକ୍ଷ ବା ପରୋକ୍ଷ ଭାବେ ୩୫ ଲକ୍ଷ ଲୋକଙ୍କୁ ନିୟୋଜିତ କରାଯାଇଛି,ଯାହା ଦେଶର କୃଷି କ୍ଷେତ୍ରର ପରବର୍ତ୍ତୀ କାର୍ଯ୍ୟ କ୍ଷେତ୍ର ଭାବେ ମାନ୍ୟତା ହାସଲ କରିଛି। ଉକ୍ତ ପ୍ରଦର୍ଶନୀରେ ରାଜ୍ୟ ସରକାରଙ୍କ ଏଜେନ୍ସି, ଆପେକ୍ସ ବଡି, ପ୍ରାଥମିକ ହ୍ୟାଣ୍ଡଲୁମ୍ ବୁଣାକାର ସମବାୟ ସମିତି, ଉତ୍ପାଦକ କମ୍ପାନୀ, ବୁଣାକାର ଏବଂ ଅନ୍ୟାନ୍ୟ ହ୍ୟାଣ୍ଡଲୁମ୍ ଏଜେନ୍ସି ଅନ୍ତର୍ଭୁକ୍ତ ରହିଛନ୍ତି।
