ଥୁଆମୂଳ ରାମପୁର,୧୩ା୧୨(ଦୁର୍ଗା କୀର୍ତ୍ତି): କଳାହାଣ୍ଡି ଜିଲାରେ କିଛିଦିନ ଧରି ପାରଦ ଖସିବାରେ ଲାଗିଛି। ଦୁର୍ଗମ ଅଞ୍ଚଳ ଥୁଆମୂଳ ରାମପୁର ବ୍ଲକ ଅଞ୍ଚଳରେ ମଧ୍ୟ ପାରଦ ୫ରୁ ୪ ଡିଗ୍ରୀ ତଳକୁ ଖସିବାରେ ଲାଗିଛି। ଦୁର୍ଗମ ଅଞ୍ଚଳରେ ଶୀତର ପ୍ରକୋପ ବଢ଼ିବାରେ ଲାଗିଥିବା ବେଳେ ବିଭିନ୍ନ ସ୍ଥାନରେ ତୁଷାରପାତ ହୋଇଥିବା ଜଣାପଡ଼ିଛି । ପାରଦ ଖସିବା ଯୋଗୁ ଥୁଆମୂଳ ରାମପୁର ଅଞ୍ଚଳରେ ତୁଷାରପାତ ହେବା ଫଳରେ ଜନଜୀବନ ଅସ୍ତବ୍ୟସ୍ତ ହେବାରେ ଲାଗିଛି। ଯାହା ପାଇଁ ନିଆଁ ଉହ୍ମେଇ ଭରସାରେ ଦୁର୍ଗମବାସୀ ଅଛନ୍ତି । ସନ୍ଧ୍ୟା ହେଲେ ଘରେ ପଶିଲେ ଦିନ ୧୦ ଟାରେ ବାହାରକୁ ବାହାରୁଛନ୍ତି ଲୋକେ। ଶୀତ କାକର ଯୋଗୁ ଲୋକେ କାମ ଅନ୍ବେଷଣରେ ମଧ୍ୟ ଯାଇ ପାରୁନାହାନ୍ତି, ଏମିତିକି ସନ୍ଧ୍ୟାରେ ଅଞ୍ଚଳର ସବୁ ଦୋକାନ ବଜାର ବନ୍ଧ ହୋଇଯାଉଛି । ପ୍ରଶାସନ ପକ୍ଷରୁ କୌଣସି ପ୍ରକାର ପଦକ୍ଷେପ ନ ନେବା ଯୋଗୁ ଗରିବ ଲୋକମାନେ ନାକେଦମ ହୋଇପଡ଼ିଛନ୍ତି । ଥୁଆମୂଳ ରାମପୁର ଅଞ୍ଚଳରେ ତୁଷାରପାତ ହେବା ଓ ପ୍ରବଳ ହାଡ଼ଭଙ୍ଗା ଜାଡ଼ ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ସରକାରୀ ଭାବରେ ଥୁଆମୂଳ ରାମପୁରରେ ତାପମାତ୍ରା ମାପିବା ପାଇଁ କୌଣସି ବ୍ୟବସ୍ଥା ନ ଥିବା ବେଳେ ସରକାରୀ ରିପୋର୍ଟ ମିଳିପାରିନାହିଁ।
ଥୁଆମୂଳ ରାମପୁର ବ୍ଳକର ସିଜି ମାଳି, ତଳଆମପଦର,କୁଟ୍ରୁ ମାଳି, କେଳୁଆ, ସିନ୍ଧିପଦର୍, କର୍ଲାପାଟ, ସୂର୍ଯ୍ୟଗଡ଼, ପୋଡ଼ାପଦର, ତଳନାଗୀ, ସିଲେଟ, କେରପାଇ, ଗୁଣପୁର, କାଣିଗୁମା, ମହୁଲପାଟଣା, ଡୁମେରପଦର, ଥୁଆମୂଳ ରାମପୁର, ଥୁଆମୂଳ, ଗୋପାଳପୁର ସମେତ ବହୁ ଅଞ୍ଚଳରେ ଛାତିଥରା ଜାଡ଼ ଯୋଗୁ ଲୋକେ ନାକେଦମ ହୋଇପଡ଼ଛନ୍ତି। ଗତ ୫ ଦିନ ଧରି ପ୍ରବଳ ଥଣ୍ଡା ସତ୍ତ୍ୱେ ବହୁ ଗରିବ ଲୋକ ଭାଗ୍ୟକୁ ଆଦରି ପଡ଼ିିରହିଛନ୍ତି । ଜିଲା ପ୍ରଶାସନ ପକ୍ଷରୁ ଏଭଳି ଶୀତ କାକରରେ ରହୁଥିବା ଲୋକଙ୍କୁ ଚିହ୍ନଟ କରି ପଞ୍ଚାୟତଠାରୁ କୌଣସି ବ୍ୟବସ୍ଥା କରିବା ପାଇଁ ଆଦେଶ ଥିଲେ ସୁଦ୍ଧା ପ୍ରାକ୍ ପ୍ରସ୍ତୁତି ଯୋଗୁ ବ୍ଲକ ସ୍ତରରେ ଅତ୍ୟନ୍ତ ଗରିବ ଲୋକ ସୁବିଧା ପାଇବାରୁ ବଞ୍ଚିତ ହେଉଛନ୍ତି। ଜିଲା ପ୍ରଶାସନର ପ୍ରସ୍ତୁତି ନେଇ ଗଣମାଧ୍ୟମକୁ ମୁହଁ ଖୋଲୁ ନ ଥିବାରୁ ସାଧାରଣରେ ଉଦ୍ବେଗ ପ୍ରକାଶ ପାଇଛି। ଏଣୁ ରାଜ୍ୟ ସରକାର ଦୁର୍ଗମ ଅଞ୍ଚଳରେ ବସବାସ କରୁଥିବା ଲୋକଙ୍କ ପାଇଁ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି।
Dharitri – Odisha’s No.1 Odia Daily
