ମୁମ୍ବାଇ,୧୭।୯: ଶିବସେନା କାହାର ଏହାକୁ ନେଇ ସର୍ବୋଚ୍ଚ ଅଦାଲତରେ ମାମଲା ବିଚାରାଧୀନ ଥିବାବେଳେ ୧୫ ରାଜ୍ୟର ଶିବସେନା ସଭାପତିଙ୍କ ମଧ୍ୟରୁ ୧୨ ଜଣ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ କ୍ୟାମ୍ପରେ ସାମିଲ ହୋଇଛନ୍ତି। ଫଳରେ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କୁ ଶକ୍ତ ଧକ୍କା ହୋଇଛି। ଗୁରୁବାର ୧୨ ରାଜ୍ୟର ଶିବସେନା ମୁଖ୍ୟ ସିନ୍ଦେଙ୍କ ଶିବିରରେ ଏକ ବୈଠକରେ ଯୋଗଦେଇଥିଲେ। ସେମାନଙ୍କ ରାଜ୍ୟରେ ଦଳୀୟ ସଂଗଠନ ବଢ଼ାଇବା ପାଇଁ ସମସ୍ତ ସହାୟତା ଯୋଗାଇଦେବାକୁ ଶିନ୍ଦେ ସେମାନଙ୍କୁ ପ୍ରତିଶ୍ରୁତି ଦେଇଛନ୍ତି। ଶିନ୍ଦେଙ୍କୁ ସମର୍ଥନ ଜଣାଇଥିବା ନେତାଙ୍କ ମଧ୍ୟରେ ଅଛନ୍ତି ଦିଲ୍ଲୀର ଶିବସେନା ସଭାପତି ସନ୍ଦିପ୍ ଚୌଧରୀ, ମଣିପୁର ସଭାପତି ଟୋମ୍ବି ସିଂ, ମଧ୍ୟପ୍ରଦେଶ ସଭାପତି ଥାଡେଶ୍ୱର ମହାଓ୍ବାର, ଛତିଶଗଡ଼ ସଭାପତି ଧନଞ୍ଜୟ ପରିହାର, ଗୁଜରାଟ ସଭାପତି ଏସ୍.ଆର୍. ପାଟିଲ, ରାଜସ୍ଥାନ ସଭାପତି ଲଖନ ସିଂ ପାଓ୍ବାର, ହାଇଦ୍ରାବାଦ ମୁଖ୍ୟ ମୁରାରୀ ଆନ୍ନା, ଗୋଆ ମୁଖ୍ୟ ଜିତେଶ କାମାତ, କର୍ନାଟକ ସଭାପତି କୁମାର ଏ. ହକାରି, ପଶ୍ଚିମବଙ୍ଗ ସଭାପତି ଶାନ୍ତି ଦତ୍ତ, ଓଡ଼ିଶା ରାଜ୍ୟ ପ୍ରଭାରୀ ଜ୍ୟୋତିଶ୍ରୀ ପ୍ରସନ୍ନ କୁମାର, ତ୍ରିପୁରା ଶିବସେନା ପ୍ରଭାରୀ ବରିଭାଦେବ ନାଥ।
