ଜନ୍ମ ପରେ ଏକମାତ୍ର ସତ୍ୟ ହେଉଛି ମୃତ୍ୟୁ। ଯିଏ ବି ଜନ୍ମ ହୋଇଛି ତା’ର ମୃତ୍ୟୁ ସୁନିଶ୍ଚିତ। ତେବେ ମଣିଷ, ଜୀବଜନ୍ତୁ କି ଉଦ୍ଭିଦର ମୃତ୍ୟୁ ବିଷୟରେ ଆପଣ ନିଶ୍ଚିତ ଶୁଣିଥିବେ। କେବେ ନିର୍ଜୀବ ବସ୍ତୁର ମୃତ୍ୟୁ କଥା ଶୁଣିଛନ୍ତି। ମଣିଷର ମୃତ୍ୟୁ ପରେ ପରିବାର ସ୍ବଜନ ତାଙ୍କୁ ଶ୍ମଶାନରେ ପୋଡିଥା’ନ୍ତି କିମ୍ବା କବରରେ ପୋତି ଦେଇଥା’ନ୍ତି। ଜାଣି ଆଶ୍ଚର୍ଯ୍ୟ ହେବେ ଆମେ ଆପଣଙ୍କୁ ଏପରି ଏକ ନିର୍ଜୀବ ବସ୍ତୁ ବିଷୟରେ କହିବୁ ଯାହାର ମୃତ୍ୟୁ ପରେ ସେମାନଙ୍କୁ କବର ଦିଆଯାଏ। ଇଂଲଣ୍ଡରେ ଏପରି ଏକ ସ୍ଥାନ ରହିଛି ଯେଉଁଠାରେ ଜାହାଜମାନଙ୍କର ମୃତ୍ୟୁ ପରେ କବର ଦିଆଯାଏ। ଏହି କାରଣରୁ ଏହି ସ୍ଥାନକୁ ‘ଜାହାଜର କବରସ୍ଥାନ’ ମଧ୍ୟ କୁହାଯାଏ।
ଇଂଲଣ୍ଡର ଗ୍ଲୁକେଷ୍ଟେରେଶେରର ସବର୍ନ ନଦୀ ନିକଟରେ ପର୍ଟନ ହଲ୍କସ ଅଛି। ଏହି ସ୍ଥାନଟି ଜାହାଜର କବରସ୍ଥାନ ଭାବରେ ପରିଚିତ। ପ୍ରାୟ ଡଜନ ଜାହାଜ ମୃତ ପ୍ରାୟ ଭାବେ ଏଠାରେ ପଡି ରହିଛନ୍ତି। ଏହି ସ୍ଥାନରେ ଏତେ ସଂଖ୍ୟକ ଜାହାଜ ଅଛି ଯେ ଏହା ଏକ ଶବଗୃହ ଭାବରେ ଦେଖାଯିବ। କିନ୍ତୁ ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ଏହି ସ୍ଥାନରେ ଥିବା ସମସ୍ତ ଜାହାଜ ଏବେ ପଥରରେ ପରିଣତ ହୋଇଯାଇଛନ୍ତି।
ପ୍ରାୟ ୨୦୦ ବର୍ଷ ପୂର୍ବେ, ସବର୍ନ ନଦୀର ଏକ ବିପଦପୂର୍ଣ୍ଣ ଭାଗକୁ ପାର କରିବା ପାଇଁ ଗ୍ଲୁକେଷ୍ଟେରେଶେର ଓ ଶାର୍ପନିସ ନାମକ ଦୁଇଟି ଅଞ୍ଚଳ ମଧ୍ୟରେ ଏକ କେନାଲ ଖୋଳା ଯାଇଥିଲା। ୧୮୨୭ ମସିହାରେ ଖୋଳା ହୋଇଥିବା ଏହି କେନାଲର ମୋଟେଇ ପ୍ରାୟ ୨୬ ମିଟର ଥିଲା। ଏହା ପ୍ରାୟ ୫.୫ ମିଟର ଗଭୀର ଥିଲା। ଏଥିରେ ପ୍ରାୟ ୬୦୦ ଟନ ଓଜନର ଜାହାଜ ରହିପାରୁଥିଲା। ଆମ୍ୟୁଜିଂ ପ୍ଲାନେଟ ୱେବସାଇଟ ରିପୋର୍ଟ ଅନୁଯାୟୀ ୧୯୦୯ମସିହାରେ, ନଦୀର ସେହି କୂଳ ସମ୍ପୂର୍ଣ୍ଣ ଧୋଇ ହୋଇଗଲା। ଏହି ସମସ୍ୟାର ସମାଧାନ ପାଇଁ କେନାଲ ନିର୍ମାଣକାରୀ କମ୍ପାନୀର ମୁଖ୍ୟ ଇଞ୍ଜିନିୟର ଏଜେ କୁଲିସ ଏକ ଯୋଜନା ପ୍ରସ୍ତୁତ କରିଥିଲେ। ପୁରୁଣା ଜଳ ଜାହାଜଗୁଡ଼ିକୁ ନଦୀ କୂଳରେ ରଖିବା ପାଇଁ ସେ ପରାମର୍ଶ ଦେଇଥିଲେ। ଯାହା ଦ୍ୱାରା କେନାଲ ଏବଂ ନଦୀ ମଧ୍ୟରେ ଥିବା ଛୋଟ ଜମିକୁ ବନ୍ୟା ପରିସ୍ଥିତିରୁ ରକ୍ଷା କରାଯାଇପାରିବ। ଜାହାଜକୁ ରଖିବା ଦ୍ୱାରା ବନ୍ୟା ଜଳ ସ୍ଥଳଭାଗକୁ ଆସିବ ନାହିଁ ଏବଂ ଜମି ସୁରକ୍ଷିତ ରହିବ।
ପରେ ସାର୍ପନେସ ଡକ୍ରୁ ଡଜନେ ପୁରୁଣା ଜାହାଜକୁ ଅଣାଗଲା। ସେମାନଙ୍କୁ ନଦୀ କୂଳରେ ଏପରି ରଖାଯାଇଥିଲା ଯେପରି ସ୍ଥଳଭାଗକୁ ପାଣି ଆସିବ ପାରିବ ନାହିଁ। ଜାହାଜଗୁଡିକରେ ଛିଦ୍ର ତିଆରି କରାଯାଇଥିଲା ଯାହା ଦ୍ୱାରା ବନ୍ୟା ଜଳରେ ଆସୁଥିବା ମାଟି ଜାହାଜରେ ଜମା ହୋଇଯିବ। ଏହାଦ୍ୱାରା ଜାହାଜଗୁଡ଼ିକ ଭାରୀ ହୋଇଯିବ। ଏବଂ ସେମାନେ ଜଳପ୍ରବାହକୁ ରୋକିବା ସହ ଭାସିଯିବେ ନାହିଁ। ଧିରେ ଧିରେ ଜାହାଜଗୁଡିକରେ ମାଟି ଜମି କଠିନ ହୋଇଗଲା। ବର୍ତ୍ତମାନ ସେହି ଜାହାଜଗୁଡ଼ିକ ଦୀର୍ଘ ବର୍ଷ ଧରି ସେହି ସ୍ଥାନରେ ଠିଆ ହୋଇଛନ୍ତି। ମାଟି ଜମି ସେଗୁଡିକ ଏପରି ହୋଇଯାଇଛନ୍ତି କି ଯିଏବି ଦେଖିବ ସେଗୁଡିକୁ ପାହାଡ କିମ୍ବା କଠିନ ଚଟାଣ ବୋଲି କହିବ। ସବର୍ନ ନଦୀ କୂଳରେ ବର୍ତ୍ତମାନ ପ୍ରାୟ ୮୦ଟି ଜାହାଜ ମୃତପ୍ରାୟ ଅବସ୍ଥାରେ ରହିଛନ୍ତି। ଯେଉଁଥି ପାଇଁ ସେହି ସ୍ଥାନକୁ ଜାହାଜର କବର ସ୍ଥାନ ବୋଲି କୁହାଯାଉଛି। ବୈଜ୍ଞାନିକଙ୍କନୁସାରେ ସେଠାରେ ଥିବା ଅଧିକାଂଶ ଜାହାଜ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ନିର୍ମିତ ହୋଇଥିଲା।
