ରାୟଗଡ଼ା,୧।୩(ସ୍ବ.ପ୍ର.): ବିଭିନ୍ନ ପଞ୍ଚାୟତରେ ସ୍ବୟଂ ସହାୟିକା ଗୋଷ୍ଠୀ ଦ୍ୱାରା ହିତାଧିକାରୀଙ୍କୁ ପିଡିଏସ୍ ଚାଉଳ ବଣ୍ଟନ କରାଯାଉଛି। ତେବେ କାଶୀପୁର ବ୍ଲକ ଅଡ଼ାଜୋର ପଞ୍ଚାୟତର ୭ଟି ଗ୍ରାମରେ ହିତାଧିକାରୀମାନେ ଠିକ୍ ସମୟରେ ଚାଉଳ ପାଉ ନ ଥିବା ଅଭିଯୋଗ ହୋଇଛି। ଏହି ପଞ୍ଚାୟତରେ ପିଡିଏସ୍ ସାମଗ୍ରୀ ବଣ୍ଟନ ଦାୟିତ୍ୱ ନେଇଥିବା ସ୍ବୟଂ ସହାୟିକା ଗୋଷ୍ଠୀ ମନମାନି ଚଳାଉଥିବା ସରପଞ୍ଚ ସୁରେନ୍ଦ୍ରି ମାଝି ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ତେଣୁ ଉକ୍ତ ଚାଉଳ ବଣ୍ଟନ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ)ଙ୍କ ଦ୍ୱାରା କରାଯାଉ ବୋଲି ସେ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି ା
ଅଡ଼ାଜୋର ପଞ୍ଚାୟତର ସୋରିଷବାଡ଼, ବାରାଙ୍ଗପାସ, କସନାଖାଲ, କରନିଖାଲ, କୁଲେରମସ୍କା ଓ ଡାଲଗୁମା ଗ୍ରାମର ହିତାଧିକାରୀମାନେ ଦାୟିତ୍ୱ ନେଇଥିବା ସ୍ବୟଂ ସହାୟିକା ଗୋଷ୍ଠୀକୁ ଚାଉଳ ମାଗିଲେ ମେଶିନ୍ ଖରାପ ଅଛି କହି ଫେରାଇ ଦିଆଯାଉଥିବା ଅଭିଯୋଗ ହେଉଛି ା ସୋରିଷବାଡ଼ର ହିତାଧିକାରୀ ପାଦମତୀ ନାଏକ ଚାଉଳ ଆଣିବା ପାଇଁ ଯାଇଥିବା ବେଳେ ଏସ୍ଏଚଜିର ଜଣେ ସଦସ୍ୟାଙ୍କ ସ୍ବାମୀ ତାଙ୍କୁ କାଲି ଆସ, ପରେ ଆସ କହି ବାରମ୍ବାର ଫେରାଉଥିଲେ। ପରେ ଅନ୍ୟମାନଙ୍କୁ ଯେତବେଳେ ଚାଉଳ ବଣ୍ଟାଗଲା, ପାଦମତୀ ଆଣିବାକୁ ଯିବାରୁ ତାଙ୍କୁ ସ୍ବୟଂ ସହାୟିକା ଗୋଷ୍ଠୀ ସଭାପତିଙ୍କ ସ୍ବାମୀ ଓ ଅନ୍ୟ କେତେଜଣ ସଦସ୍ୟ ଗାଳିଗୁଲଜ କରିଥିଲେ ା ଏ ନେଇ ହିତାଧିକାରୀମାନେ ସରପଞ୍ଚଙ୍କୁ ଅଭିଯୋଗ କରିବା ପରେ ସେ ସୋମବାର ଜିଲାପାଳଙ୍କ କାର୍ଯ୍ୟାଳୟକୁ ଆସି ପିଡିଏସ ଚାଉଳ ବଣ୍ଟନ ବ୍ୟବସ୍ଥା ପିଇଓଙ୍କୁ ଦେବାକୁ ଦାବି କରିଥିଲେ। ଜିଲାପାଳଙ୍କ ଅନୁପସ୍ଥିତିରେ ସରପଞ୍ଚଙ୍କ ଦାବିପତ୍ର ଅତିରିକ୍ତ ଜିଲାପାଳ ସୋମନାଥ ପ୍ରଧାନ ଗ୍ରହଣ କରିବା ସହିତ ଏହାର ସମାଧାନ କରାଯିବ ବୋଲି କହିଛନ୍ତି ା
