ସମ୍ବଲପୁର,୩।୧(ବ୍ୟୁରୋ): ସମ୍ବଲପୁର ସମଲେଶ୍ୱରୀ ମନ୍ଦିର ନିର୍ଦ୍ଧାରିତ ସମୟ ରବିବାର ଭୋର ୬ଟାରୁ ଦର୍ଶନ ପାଇଁ ଖୋଲାଯାଇଛି। ପ୍ରଥମ ଦିନରେ ପ୍ରାୟ ୧୦ହଜାର ସ୍ଥାନୀୟ ଶ୍ରଦ୍ଧାଳୁ ମା’ଙ୍କ ଦର୍ଶନ କରିଥିବା ମନ୍ଦିର ଟ୍ରଷ୍ଟ ପକ୍ଷରୁ ସୂଚନା ଦିଆଯାଇଛି। ମନ୍ଦିର ମୁଖ୍ୟ ଗେଟ୍ ଖୋଲିବା ପୂର୍ବରୁ ଶ୍ରଦ୍ଧାଳୁମାନେ ଧାଡିରେ ଛିଡା ହୋଇଥିଲେ। ଗେଟ୍ ଖୋଲିବା ପରେ ଶ୍ରଦ୍ଧାଳୁ କୋଭିଡ କଟକଣା ଅନୁସାରେ ମନ୍ଦିର ଭିତରକୁ ପ୍ରବେଶ କରିଥିଲେ। ସ୍ଥାନୀୟ ବାସିନ୍ଦା ଆଧାର କିମ୍ବା ପରିଚୟପତ୍ର ଦେଖାଇବା ପରେ ଦର୍ଶନ କରିବାକୁ ଅନୁମତି ଦିଆଯାଇଥିଲା। ପୋଲିସ ଓ ଟ୍ରଷ୍ଟ ପକ୍ଷରୁ ଗେଟ୍ ବାହାରେ ସୁରକ୍ଷା ବ୍ୟବସ୍ଥା କରାଯାଇଥିଲା। ପରିଚୟପତ୍ର ଯାଞ୍ଚ କରିବା ସହ ସାନିଟାଇଜ ଉପରେ ସେମାନେ କାର୍ଯ୍ୟ କରୁଥିଲେ। ଶ୍ରଦ୍ଧାଳୁ ମାନେ ପ୍ରାୟ ୯ମାସ ପରେ ମା’ଙ୍କ ଦର୍ଶନ ପାଇଥିବାରୁ ବେଶ୍ ଭାବବିହ୍ବଳ ହେଉଥିବା ଦେଖିବାକୁ ମିଳିଥିଲା।
ପ୍ରଥମ ପର୍ଯ୍ୟାୟରେ ସକାଳ ୬ଟାରୁ ପୂର୍ବାହ୍ନ ୧୧ଟା ୩୦ମିନିଟ୍ ଓ ଦ୍ୱିତୀୟ ପର୍ଯ୍ୟାୟରେ ଅପରାହ୍ନ ୩ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଦର୍ଶନ ସୁଯୋଗ ରହିଥିଲା। ଅନ୍ୟ ସମୟରେ ମନ୍ଦିରର ନୀତିକାନ୍ତି ଅନୁସାରେ ପୂଜାର୍ଚ୍ଚନା କରାଯାଇଥିଲା। ଶ୍ରଦ୍ଧାଳୁଙ୍କ ଆଗମନ ପୂର୍ବରୁ ମନ୍ଦିର ପରିସରକୁ ସାନିଟାଇଜ କରାଯାଇଥିଲା। ଶୁଖିଲା ଭୋଗ, ଫୁଲ, ଦୀପ, ଧୂପ ସବୁ ନେବା ଉପରେ ରୋକ୍ ଲଗାଯାଇଥିଲା। ଫଳରେ ମୁଖ୍ୟ ଗେଟ୍ ବାହାରେ ଶ୍ରଦ୍ଧାଳୁମାନେ ଦୀପ ପ୍ରଜ୍ୱଳନ କରୁଥିଲେ। ମନ୍ଦିର ଗମ୍ଭିରା ଭିତରକୁ ପ୍ରବେଶ ପାଇଁ ବାରଣ କରାଯାଉଥିବାରୁ ଶ୍ରଦ୍ଧାଳୁମାନେ ବେଢାରେ ଅନ୍ୟ ପ୍ରତିମା ଦର୍ଶନ କରି ମା’ଙ୍କୁ ଗମ୍ଭିରା ଦ୍ୱାରରୁ ଦର୍ଶନ କରୁଥିଲେ। ପ୍ରତିମା ଓ ମନ୍ଦିର କାନ୍ଥ ଛୁଇଁବାକୁ ବାରଣ କରାଯାଇଥିଲା। ସେହିପରି ଜିଲାର ଅନ୍ୟ ସମସ୍ତ ଧାର୍ମିକ ଅନୁଷ୍ଠାନଗୁଡିକ ଖୋଲା ଯାଇଥିବା ସୂଚନା ମିଳିଛି ।
